Sunday, December 28, 2008

ودن مــــن طين


ودن من طين وودن من عجين
خليكوا يا حكام ساكتين
مطنشين .. منفضين .. مكبرين
طالما أسيادكم عنكم راضيين
يبقى خلاص
بلا عراق بلا لبنان بلا فلسطين
خليكوا نايمين
وموتوا وانتوا حوالينا عايشين
عارفين
العيال في الشارع لكم مكسوفين
نفسي في يوم ألاقيكم غايرين
وألاقي غيركم حكام تانين
اسمهم يا ساده بنى آدمين
للكرامه والعزة والعروبه عايشين
حكام عارفين
يعني إيه بشر .. يعني إيه مسلمين
يعني إيه غيرة .. ويعني إيه دين

Monday, December 15, 2008

صاروخ أرض .. أرض



صاروخ أرض أرض


تحديد الهدف .. الناتج من تراكمات وكبت وقهر وظلم وإحتلال
قوة التصويب ... الناتج من إختزان قوة لأعوام من كبتها
نشان ولا أروع ... وكأن الحذاء يعلم طريقه
سيبقى دوما ... هذا الحدث
وسيتردد دوما .. أن بوش إنضرب بالجزمه في العراق

بس يا سلام لو كانت مفخخه
كنت سعيده جدا وأنا أشاهد الحدث
وعندما تجمع الحراس والأمن حول الصحفي وبدأت اللكمات والتأوهات
شعرت وكأني مكانه
ولكن .. ليكن ما يكون
المهم بوش إنضرب بالجزمه .. شوز بالإنجليزي :)
والعلم الأمريكى إنضرب بالجزمه أيضا .. شوز برضه بالإنجليزي :))
الرمز الأمريكي إنضرب بالشوز يا مينز .. رجاله بالعربي

أعتقد بعد كده هيمنعوا دخول الصحفيين بالأحذيه

وسيصدر قانون ضد إرتداء الأحذيه في المؤتمرات

وسيعد إرتداء الحذاء جريمه حرب :)

تحيه طيبه لمنتظر الزيدي أينما كان

وإليكم هذا المقطع :))

Saturday, October 11, 2008

بين شقي الرحى


جمعني بهن صدفه المكان ..
هي سيده مر على زواجها 15 عام ... والأخرى فتاه مضى على خطوبتها عام تقريبا
ودار الحديث .. حيث نظرت لي السيده فجأة وسألتني
إنت مخطوبه ؟؟
أجبت بالنفي
فقالت بلهجه حاسمه : أوعي تتجوزى واحد تكوني بتحبيه هتتبهدلي يا بنتي .. صدقيني
فوجئت بجملتها ..( وأنا لما أوفوجأ يا جماعه مش بعرف أتكلم
حواسي تقريبا بتقف :) ممكن دقيقه أو أكتر يكونوا كالدهر
بعد كده بقى تعجبت من كلامها .. وكان الحديث قد بدأ بينها وبين الفتاه المخطوبه ..
التي سارعت وقالت : لأ اللي يحب بيستحمل
يا الله .. ألم أقل أني كنت بين شقى الرحى :)
تركت لهم الحديث الذي لم يكن لي فيه لا ناقه ولا جمل
وتذكرت كلام واحده صاحبتي وكانت وقتها مخطوبه
حيث سألتها إحداهن : فرحك إمتى ؟
فأجابت : لكل أجل كتاب
ضحكت السائله وعادت تقول : في كده .. يعني لو قالوا لك فرحك بكره تعملي إيه
فأجابت : وجاءت سكرة الموت بالحق ذلك ما كنت منه تحيد

من كل ما سبق .. أخذت أفكر في ثلاث جمل هي نتاج تجربه كل واحده منهن
1
أوعي تتجوزى واحد تكوني بتحبيه لأنك هتتعذبي

طبعا علشان بدل ما هو يكيل لك من صنوف العذاب أنت التي تكيلين له
:)
2
اللي يحب بيستحمل

بأي منطق .. يكون أحد الطرفين ظالم ويعامل الطرف الآخر ممتهنا كرامته
والطرف الآخر مبتسم ويقول أصل اللي يحب بيستحمل .. لا أدري ؟
3
تساوى الزواج والموت

كيف يصل الإنسان لأن تتساوى عنده بدايه حياه جديده بنهايه الحياه كلها
وتذكرت قوله تعالى :
"وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً إِنَّ فِي ذَلِكَ لَآيَاتٍ لِّقَوْمٍ يَتَفَكَّرُونَ
سبحان الله .. أرأيتم كلمه بينكم في الآيه .. نحتاج أن نضع تحتها مليون خط
بـــيـــنـــكـــــــــــــم
يعني الموده بين الطرفين .. مش واحد يملك كل الود لللآخر .. وهذا الآخر لا يعرف معناها
مش واحد تملأ قلبه الرحمه تجاه الآخر .. وهذا الآخر لا يعرف غير القسوة
إنها حياه .. سكن وأمن وإطمئنان .. ليست موت
وسألت نفسي .. أي منا على صواب ؟؟
ووجدت أننا جميعا على صواب .. ولكن بصورة أخرى
فالقلب يجب أن يمتلأ بحب الله فقط ... ثم حب الآخرين في الله .. وقتها لن يعذبك أحد بحبه
لأن معك الله .. ولأنك تحب في الله
وطبعا اللي يحب يستحمل .. بس مش الإهانه والعذاب
لكن ظروف الحياه الصعبه .. يستحمل مرض الآخر ويسانده
يستحمل معه في الضراء كما شاركه السراء
وفعلا الزواج موت .. لكن موت للوحده .. بإيجادك من تسكن إليه
هكذا أرى الأمر ..
يبقى اني أراه من وجهة نظر نظريه وربما خياليه
أما هم فكلامهم من وحي تجارب وخبرات
يا الله .. لو تخلق كل إنسان بخلق الإسلام
أكيد الدنيا هتتغير .. وتعامل الناس هيتغير

ملحوظه صغيوره : كنت هكتب البوست ده في مدونه
. ولكني ظننت أن نفس الحديث
ممكن أن يدار بين الرجال أيضا .. زي ادبح لها القطه وما شابه
وكأنها حرب :)
كما أن البعض لازال يدخل مدونه كلام البنات متوجسا خيفه ... ( حلوة متوجسا خيفه دي :))
ظنا منه أنها تخص البنات فقط
دمتم لي إخواني وأخواتي :)

Monday, October 6, 2008

الطـــــــائر



الطائر
كان يحلق عاليا في الفضاء الرحب ... يعلو ويهبط مع خفقان قلبه
كان يحيا بهذا النبض الهادئ النقي
لم يكن طائر بل كان قلب له جناحان
كان قلب حر يحيا في عالمه الخاص
عالم من صنعه .. ومن نسج خياله
كان ينظر من خلف حدود عالمه فيرى ألوان من القلوب
كان ينظر بتعجب .. فما عرف تلك الألوان يوما ولا يعرف كيف هي ممزوجه هكذا
رأي الطائر من بعيد صانع القلوب الذهبيه
بل عاشق الذهب

اقترب منه وابتسم وقال
ما رأيت جمالا مثل هذا القلب
فرح الطائر
فقال عاشق الذهب
ولكن ... !!!؟
الطائر : ولكن ماذا؟
عاشق الذهب: لو جعلناه ذهبيا لصار أجمل وأروع
ولأضاء الكون حوله من لمعان بريقه
ولسحر العيون بروعته
الطائر بحذر : وكيف ذلك ؟
عاشق الذهب : لا تهتم فقط اتركه لي ولن تندم

وستجدني أمينا عليه
الطائر ببراءه : حسنا
أخذ عاشق الذهب القلب .. وصار يحوله لما يريد
وتحول القلب
وما عاد قلب
بل أصبح سبيكه ذهبيه رائعه الجمال أو هكذا رآها عاشق الذهب
سبيكه على هيئه قلب .. قلب أجوف لا ينبض لكنه رائع الشكل
حملها عاشق الذهب وراح للطائر
كان الطائر مختلف ...حزين .. لا يقوى ع الحراك
فقد كان يحيا ويطير بهذا القلب
كان يستمد حياته من نبضاته
ابتسم عاشق الذهب وهو يحمل القلب الذهبي الأجوف وقال
هاهو .. هل رأيت في جماله قط ؟؟؟
كان قلب صامت لا يتحرك .. لا ينبض
الطائر : لا أعرف هذا القلب
ماذا سأفعل به .. إنه أجوف بلا حياه؟؟
كيف سأعيش بدون خفقاته ؟؟
كيف سأحلق عاليا بدونه ؟؟
عاشق الذهب : انظر لجماله .. انظر لروعته .. لقد صنعته كما أحببت دوما
وصنعته كما لم أصنع شيئا من قبل
لم أصنع مثله قط
الطائر
أريد قلبي .. أريده كما هو
بلا ألوان ذهبيه .. بلا زخارف خارجيه .. لا أريد أن ينبهر كل من يراه
لا أريد أن يكون صورة لما تريد .. وكأنك تصنع تمثال بلا روح
أريد قلبي .. أريده كما هو .. أعده لي
أريد أن أحلق معه من جديد
أريده أن يرافقني بنبضاته
عاشق الذهب : لا أستطيع .. لقد منحتنى إياه بإرادتك .. لكي يكون ذهبيا لامعا
وها هو
الطائر مستسلما : أمسك بقلبه و راح يبكي كما لم يبكي من قبل
راح يحمله كأنه يحمل طفله الذى مات
حمله ودخل لعالمه مره أخري وحيدا .. بلا قلب يحمله للأفق البعيد

فقد كان هذه المره هو الذي يحمله
يحمله لمثواه الأخير

Sunday, September 28, 2008

قلم رصاص




أقلب في دفاتري القديمه فوجدت كشكول قديم
ووجدتني في إحدى صفحاته كاتبه خواطر مهداه لقلمي
نعم لقلمي :)
وقلمي يا ساده قلم رصاص عادي ..نصف ملي .. أزرق اللون
كان رفيقي دوما .. عند المذاكره .. ده لما كنت بذاكر يعني
كنت أخطط به أسفل ما أراه هام
وكانت الكتب لا تخلوا من الرسومات به على هوامشها
فهنا رسمت عين وفي الجانب الآخر رسمت عين
وفوق رسمت عين أيضا :) ..
كنت مولعه برسم العيون كنت أثق رغم صغري وقتها أن العين مرآه صاحبها
وأني أستطيع أن أعرف مكنون الإنسان من خلالها
كنت أنجح أحيانا وكثيرا ما كنت أخفق
ربما ليس لأنى أخطأت التقدير ولكن لأن هناك من يستطيع أن يتقن الخداع
المهم
نعود لقلمي :)
الذي كان ريشتي التي أرسم بها مع أخواته ذو النوعيه الشمعيه الخاصه
التي كنت أحب الرسم بها
وبالطبع كان أداتي في كتابه خواطري
الصورة فوق إحدى أعماله :)
**************

Monday, September 15, 2008

صور


رحله بحريه
قبل بدايه رمضان بأيام قليله ذهبت في رحله عائليه أخويه تدوينيه :) إلى مصيف جمصه
من أسرة التدوين كانت موجود العزيزه منى أحاسيس
ذهبنا عصرا .. كان البحر وهمي فأنا أحب البحر جدااااااااااااااا
ولا أمل منه أو من النظر إليه
المهم كان في تفاصيل كتييييير بس أكتر شئ حبيت أكتب عنه هو الصخور
سمعت عن الصخور وتعجبت لأني لم أرها قبل ذلك
ولكن قلت يمكن الرمال طرحت صخور خاصه وأني لم أذهب منذ فترة لهذا المصيف
المهم قررنا أن نتمشى حتى نصل لتلك الصخور ونلتقط كام صورة بجوارها
( على أساس إننا في شرم وكده :) )
مشينا كتير فوق أمواج البحر .. وكنت بقول لمنى ياترى كام مدون ومدونه وسط كل الناس دي
أنا هقول يا جماعه دي منى أحاسيس شفيهم هيعملوا إيه
:)
المهم وصلنا للصخور...محاطه بأسلاك .. تمتد على الرمال حتى تلتقي بمياه البحر
صخور سوداء أحجامها كبيره وارتفاعها ليس كبير حوالي متر أو أكثر بقليل
يجلس فوقها شاب لا يخرج الصفاره من فمه ( لا ليس من فرق الإنقاذ :)
والسؤال الآن لماذا هذه الصخور ؟؟ ولماذا تقسم الشاطئ إلى جزئين ؟؟
الصخور تفصل منطقه خاصه بفندق القوات المسلحه عن باقي الشاطئ
والشاب وظيفته أن لا يسمح بأي تجاوز أو بأي تواجد للناس العاديه داخل تلك المنطقه
ممنوع المروووووووووور للمنطقه الأخرى
كان يحزنني أنا أرى الأطفال تلهو بين الأمواج ..والأمواج تحملها مرة يمينا ومرة يسار
ومرة خلف المنطقه المحظورة .. فيسارع الشاب بصفارته منبها .. لسان حاله يقول دخلتم منطقه محظورة
شويه شويه كان هيطلع الرشاش
كمان كان في أولاد تاهوا من أهلهم .. الأم تسير لا ترى أمامها تبكي وتسأل عن ابنها
ودون أن تدرك تكاد تخترق المنطقه المحظورة .. فيسارع الشاب بصفارته .. ممنوع
وما أثار دهشتي وفاجأني حقا هو عندما ألقيت بنظري خلف الصخور لأري عائلات العاملين بالقوات المسلحه
تخيلوا .. ناس عاديه .. لهم 2 إيد و2 رجل وتخيلوا لهم نفس الرأس وما بها من حواس
طيب ليه الفاصل ده ؟
حمايه مثلا ؟

طيب على كده بقى .. هذه العائلات تسيرفي الشارع تحت حراسه خاصه
مش عارفه بصراحه إيه السبب في أن يقسم الشاطئ هكذا
جلسنا جميعا فوق الصخور وشاهدنا الغروب وقمنا بالتقاط الصور
لتشهد على هذا الزمن
***************************
صورة مفرحه
ما يفعله المدونين من خير
زيارات للمستشفيات ودور المسنين ودور الأيتام وغيرها
بجد صورة مشرفه ومفرحه
ياريت تطبق في كل مكان .. لأن كل مكان فيه من يحتاج ليد العون
ليس شرط أن تسافر محافظه أخرى لتقوم بعمل الخير
ابحث في بلدك عن دور الأيتام والمسنين والمستشفيات
شفهم محتاجين إيه
إجتمع مع أصدقاءك وأهلك ومعارفك
كل واحد يقدم ما يستطيع
واذهبوا في زيارة لهم هتفرق كتير مهاك ومعاهم

بالنسبه للدقهلاويه بلدياتي :)
تابعوا هنا .. حاجات جميله فعلا
و
و
هنـــــــــا

كل سنه وأنتم بخير وصحه وسلام

Wednesday, September 3, 2008

تأمـــلات

جئت الدنيا وحيدا
لتبدأ الصراع معها
ثم
تخرج منها وحيدا


سؤالي الآن هو ما موقعك من الدنيا ؟

إيه الألغاز دي :)

يعني هناك ثلاث أشياء
الدنيا .. التي نعيش فيها .. بكل المفاتن والمتع والسعاده والشقاء

وهناك الآخرة
جنه نطمع أن نصل إليها .. ربنا يرزقنا إياها جميعا

ونار ... نعوذ بالله منها

وهناك الإنسان

أنت

هل تستطيع أن تجيب على سؤالي الآن
نسيته
أقول تاني :)
أين موقعك من الدنيا والآخره
أين تقف ؟

أسهلها لك
تعالى نرتب
نضع الجنه في المقدمه
ثم من ؟؟
أنت أم الدنيا ؟؟
كفايه ألغاز كده ..و تعالوا شاركوني الرأي

هناك من يضع الدنيا أمامه يلهث خلفها ..
تجري منه وهو خلفها
يريد أن يصيب منها شئ ما
يكاد يجن إن لم يحصل عليه
وأعتقد أننا جميعا نمر بتلك الأوقات عندما نسعى خلف الدنيا جاهدين لنصل إلى شئ ما نريده
مثل هذا الإنسان موقعه في آخر الصف
يعني بالترتيب كده
الجنه ثم الدنيا ثم هو
فهو يجري خلف الدنيا .. والدنيا تجري منه
قد يصيب منه ما يريد
وقد لا يصيب منها شئ
ولكن المؤكد أنه فقد الآخره

وهناك من يضع الجنه أمامه
يجري خلفها .. يفعل ما يستطيع لينالها
مثل هذا الشخص موقعه في المنتصف
حيث يضع الجنه أمامه
ثم هو
ويترك خلفه الدنيا

هذا الشخص
الدنيا هي التي تجري خلفه :)
سبحان الله

عارفين المثل اللي بيقول .. الدنيا ماتديش محتاج
هو كده بالضبط

يعني إيه ؟
نترك الدنيا وبلاش نعيش ونتمتع بها ؟

لا .. عيش وتمتع ولكن

لا تجعل الدنيا أكبر همك

عيش وأعمل واتعب واجتهد ... عن أنسٍ رضيَ الله عنه عن النبي صلى الله عليه وسلم قال :
( إِنْ قَامَتْ السَّاعَةُ وَفي ِيَدِ أَحَدِكُمْ فَسِيلَةٌ ،فَإِنْ اسْتَطَاعَ أَنْ لَا يَقُومَ حَتَّى يَغْرِسَهَا؛ فَلْيَغْرِسْها )‏.

الفسيله هي .. صغار النخل


نرجع للسؤال تاني
أين موقع من الدنيا والآخره ؟؟
مش عايزة أطول عليكم
المهم
حاول أن تجعل رضا الله أمامك دوما
إجعله غايتك الكبري
واجعل الدنيا خلفك
ولا تنساها
وتأكد مهما كان ما أردته منها ولو تحصل عليه
ففي عدم حصولك عليه هو الخير
كل الخير
فالله يعلم ولا نعلم

معادله صعبه

تفتكروا هنجح فيها ؟؟

على فكرة
سألت نفسي نفس السؤال اللي سألته لكم أول أمس


وأردت أن تشاركوني
إسأل نفسك ودعها تجيبك
فهي لن تخدعك أبدا

Sunday, August 31, 2008

كل سنه وكل العالم بخير وسلام
ربنا يعيننا جميعا في هذا الشهر الكريم على ذكره وشكره وحسن عبادته

Saturday, August 9, 2008

أقنعه


جلس ثلاثتهم يتأملون السماء ليلا
هم أصدقاء أو هكذا يعتقدون
كل يري السماء من وجه نظره
وكل يرى جمال مختلف عما يراه الآخر
فهذا تشده النجوم وذاك يعجبه منظر البدر والأخير يشده الغموض الساكن في أعماق الليل
وسرعان ما انتقل الحديث بينهم من التغزل في السماء إلى حديث شخصى
ولكن لنتعرف عليهم أولا
الأول : يعتبر الثاني أقرب صديق له والوحيد الذي يأتمنه على أسراره
الثاني : يتصرف وكأنه مدرك لكل شئ ويتصرف كأنه الصديق الذي لا يشبهه أحد
الثالث : هادئ وعميق وانفعالاته غير مبالغ فيها .. يدرك الأمور بهدوء نادر
الأول : هناك موضوع يشغلني بل هي مشكله وأريد أن أصل فيها لحل وقرار حاسم
الثاني : دون أن يسأل يقول
نعم أنت هكذا دوما .. تحيا في عالم ليس عالمنا ... وربما ما تظن أنه مشكله كبيره وبالتالي
يأخد منك وقت في التفكير وتردد في إتخاذ القرار
لا يعد سوى أمرا عاديا عند باقي الناس
الثالث : لنعلم أولا ما الأمر ثم نتكلم .. يتوجه بحديثه إلى الأول .. فأنا أعلم مدى حكمتك وعقلك
الأول : صمت كثيرا ولم يتحدث وكأنه نسى الحروف والمفردات
لم يكن يعنيه الأمر الذي يشغله والمشكله التي تؤرقه
كل ما كان يشغل تفكيره... هذا الصديق التاني
وكأنه يراه ويستمع إليه لأول مرة
كيف لم يراه قبل ذلك ؟
كيف لم يكتشف أنه دوما لا يرى إلا الجانب السلبي في شخصيته
كيف لم يدرك أنه لا يرى إلا أخطاؤه ليجد الفرصه ليوبخه عليها
كيف اعتبره صديق مقرب وهو حتى لم يهتم لمعرفه الموضوع
وسارع يقذف الإتهامات دون أن يفكر
نظر إليه في صمت وتعجب وكأنه يتعرف عليه لأول مره
ونظر للثالث أيضا وكأنه يراه لأول مره
وابتسم ابتسامه لم يفهمها أحد... وانصرف

السؤال الآن هو
..... هل تعرف من حولك جيدا؟
هل تعامل كل واحد بقدره ؟
هل تمنح كل واحد من عقلك وقلبك قدر ما يستحق؟
أم لازالت تخدعك الأقنعه ؟؟؟

Friday, August 8, 2008

فين الخشبه ...؟؟؟



تعيش الخشبه
هل تذكرون الخشبه
عندما أراد سنبل أن يتزوج ذيبه ... ولأنه ليس من قبيلتها واجه صعوبات كثيره
حتى وافق والدها وفي يوم العرس
وإتماما للمراسم منحه والدها اللي هو بيج بوس القبيله خشبه صغيره
قلبها سنبل بين يديه وقال جملته الشهيره ( إيشي خيال يا ناس ) طبعا خيال فبقطعه الخشب تزوج
ليه المقدمه دي ؟؟؟
إمبارح إحداهن كانت تتحدث عن قرار غريب أول مرة أسمعه بصراحه
قال إيه أي إتنين سيتزوجوا وإبتداء من العام القادم سيدفعون 3000 جنيه عند كتب الكتاب
طبعا لم أصدق ... ولكن أكتر من شخص أكد الموضوع
برضه مش مصدقه :)
يعني إيه يدفعوا 3000 جنيه وليه ؟ وإزاى ؟
يا جماعه دي إشاعه ولا حقيقه ؟؟ اللي يعرف يقولي من فضلكم
بصراحه لو حقيقه تبقى الحكومه ناس ذوق ذوق ذوق
طبعا ما الشباب عارف يتجوز ومعاه الفلوس بالهبل وده ليه؟
لأن الحكومه موظفه الشباب وبتعطيهم مرتبات عاليه
طبعا علشان يعرفوا يعيشوا ويصرفوا كده و يرشوا رشه ع الحكومه اللي مهنياهم
طبعا أكيد دي نكته ومش حقيقه .. صح ؟
وإلا الحكومه تكون بتشجع الجواز العرفي
ولا بلاش جواز أصلا ... بلا جواز بلا مصاريف ؟..مش هما بيبحثوا قرار ترخيص بيوت الدعاره في مصر
علشان تكمل وتبقى رسمي
طبعا علشان يبقى شغل سليم وأي ضابط يشك في أي واحده من ساكني تلك البيوت .. تقوم تدب الرخصه في عينه :)
ولا يقدر يتكلم .. وبالقانون
بالقانون ممدوح إسماعيل براءه .. من غير حتى توبيخ ولا قرصه ودن ولا حتى لفت نظر
وبالقانون يتحبس أي حد يعترض
إبراهيم عيسى
أيمن نور ... وغيرهم
كده بقت عال خالص
نراجع بقى للخطه الإستراتيجيه المحكمه اللي إحنا بنفذها بلا حولا ولا قوة
ونبتدي من الأطفال
أطفال أهلهم دايرين في ساقيه الحياه يصارعون الغلاء المستمر يحاربون من أجل لقمه العيش
أهل لا يملكون الوقت ليربوا أولادهم إلا من رحم ربي
أطفال أمام الدش أفلام وأغنيات حدث ولا حرج
كبروا الأطفال ودخلوا المدرسه
وهنا أصبحوا كفئران التجارب للناس الذوق اللي بتصلح التعليم .. مش فاهمه إيه التعليم اللي مش نافع معاه تصليح ده
وطبعا بيوصلوا للإعدادي والبعض لا يجيد القراءه ولا الكتابه إلا من رحم ربي
كبروا ودخلوا الجامعه مع حصيله لا بأس بها من التربيه الدشيه والتجارب التعليميه
إتخرجوا
وتبدأ قائمه مفيش
مفيش شغل ... وبالتالي مفيش فلوس وما يتبعها من قائمه مفيش
طبعا البعض بيلاقي شغل بس الأغلبيه في بطاله
الأغلبيه دي إما تسافر أو تنحرف أو مش عارفه بصراحه المفروض تعمل إيه
مش عارفه بعد كام سنه الوضع هيبقى إيه
هو أنا متشاءمه ؟؟
إحنا محتاجين نصحصح شويه صح ؟
فين الخشبه ؟؟
لا شك إنه بوست غريب

Wednesday, July 30, 2008

آخــــر طبعه




على غرار برنامج آخر طبعه .. والذي يعطي قراءه وتحليل على آخر الأخبار
وأهو البنت لبست النضارة
واشترت قلم فاملي سايز أهو :)

أردت أن ألقى الضوء على بعض التدوينات والتي أعتبرها نتاج إبداع من أصحابها وفعلا أثرت فيا
تدوينه
إلى من يهمه الأمر


تدوينه لــــ حاول تفتكرني
أقتبس منها
الورد رمز لكل جميل
فلا تكره الورود أن وردة ذات يوم جرحتك أشواكها
فبالأشواك خلقت
وبالجمال ايضا

تدوينه كل كلمه فيها ذات معنى وصدى
أحييك أخي
وأنا كنت ممن يهمهم الأمر :)
*******************************************
نيتروجلسرين
تدوينه لــــ حواديت مصريه



أقتبس منها ما أنهى به عمر قصته
.
داعب أزرار هاتفه و هو يعطيه الأمر الذي تأخر كثيرا ... أمر الحرية ... و بينما كانت البيانات يتم حذفها من

الهاتف كان هو يلقي بآخر ما يربط بينهما في النيل ليحمله التيار الهادئ بعيدا و هو يغوص في بطء مغرقا
معه آخر قيد و ساطرا في الوقت ذاته على صفحة النيل كلمات النهاية


الحقيقه قصه رائعه فكرا وتشبيها وأسلوبا
ذكرتني ببعض الكلمات قرأتها في كتاب
ففي مقطع في الكتاب يقول
أن كان هناك من سيحبك ، فاعلم أن هذا الشخص يحبك بالفعل ، وأنه ليس هناك ما ينبغي عليك عمله
لتحظى بذلك الحب . إذا أخبرك البعض أن سبب عدم حبهم لك هو أنك لا تفعل شيئاً ما من أجلهم مثل :
الانصياع لهم ، أو تلبية مطالبهم ، فإن الحقيقة المؤلمة التي تنتظرك هي أنهم لن يحبوك حتى وإن نفذت
أوامرهم ، أو لبيت مطالبهم . إن مثل هذا الحب مشروط
********************************************
قبض الريح
تدوينه لـــ يوميات أموله




أقتبس منها ما أنهت به أموله المبدعه قصتها

تحدث نفسك...ماذا جنيت ؟ أين حلمى ؟؟ هل ضاع أملى ؟؟ تصحو من كابوسك المقيت..تفتح عينيك

وتغلقهما..تحرقهما دمعاتك.. تخنقك العبرات.تنظر برعب الى كفيك الفارغين..تطالع وجهك
فى المرآة بألم..تبكى وتبكى بقلب يحترق...يتناهى الى مسامعك صوتها وهى تختفى عن ناظريك..
.أنا حلمك..أنا أملك..فلتنسنى...فأنا قبض الريح


أموله تجعلك تحيا بين السطور وترى الكلمات بعينيك وكأنك أحد أبطال قصتها
تحكى عن حلم تبخر ولكن من المؤكد أنه طالما أن الإنسان يتنفس فسوف يحلم ويحلم
وسيأتي يوم بإذن الله ويتحقق حلمه
ففساد حلم أو تبخره لا يعني أن نمتنع عن الأحلام

******************************
تدوينه
أيكم زادته هذه إيمانا


أيكم زادته هذه إيمانا
من أجمل ما قرأت لــــ العمر لحظه
وجدت لينك المدونه في مدونه الطائر السعيد
جزاه الله كل الخير
التدوينه لا تحتاج لتعليق فهي رااااااائعه

فقط أقتبس منها

وفي يوم وانا قاعده على الرمل وقت الغروب مع الولاد .. مشمرة بنطلوني.. وبعمل على الرمل عروسة
البحر وظهري للشمس وهي بتغيب.. عدت من ورايا شرابات وملابس طويلة رفعت راسي بعد ما عدوا ..
وفرحت قوي هما ايوه هما .. هما زي ما هما وانا زي ما انا.. ولا كإن عدت سنه طويله..
واتكسفت قوي من نفسي .. ايه اللي انا حققته وزاد علي في سنه؟

القنبله الفوليه لـــ شريف




أقتبس منها
بسم الله بدأت الفطار دون الفول
... وتركته على النار الهادية لكى يتحول الى مرحلة اللوز براحته وفجأة وبدون أى إنذار ... دوى انفجار رهيب ...

نظرت خلفى حيث قدرة الفول ...أملى وسحورى وقرة عينى ... وجدت شيئا لم أر مثله طول عمرى ؟
.............
راااااااااائعه
مررت بتلك التدوينه من فتره
وقتها ضحكت بشكل..! وعندما أتذكرها أضحك
حتى التعليقات على تلك التدوينه
فأشياء كثيرة قد تضحك .. لكنه التوقيت
هذه التدوينه قرأتها في توقيت كنت أحتاجها فيه


وهنا أدرك شهرزاد الصباح :)
أغلقت التعليقات
فالتعليق من حق من أبدع في التدوينات السابقه :)
أنا فقط كتبت هذه التدوينه
لأشكر من ذكرتهم
والذين بين سطورهم وجدت شئ .. وتعلمت شئ
وهم لا يعلمون


Monday, June 23, 2008

كـــان ويامــا كـــان

كان ويا ماكان كان في مدونه اسمها طوق الحريه
كنت أتصفح المدونه ووجدت هذا البوست البوست
عباره عن تاج اذكر 10 أشياء عن نفسك
ولأنه أنا
فقلت أنزله تاني .. تغيير يعني :)
حاجه جديده إنك تنزل بوست كتبته قبل كده
تاج من إخواني الأعزاء مدحت وعمرو
اذكر 10 أشياء عن نفسك أنا كنت فاكرة إن التاج ده خفيف بس لما تيجي
تحله تجده مش خفيف ولا حاجه إنك تذكر 10 حاجات عن نفسك ده شئ كتيرالمهم
(1)
هقولكم سر ألا وهو .. اسمي الحقيقي سلوى
(2)
بكالوريوس تجارة .. محاسبه
(3)
تحديث بسيط أحسن البعض إفتكر إننا 5 بنات إخوات وطبعا الأمانه العلميه تقتضي أن أقول
إحنا أربع أخوات ماشاء الله.. أخان أكبر مني وأخت اصغر مني ..
وأنا رقم
3
(4)
بحب الرسم جدا لدرجه إني لما بكون برسم مش بحس باللي حواليه
بس الوقت مش بقيت أرسم كتير
(5)
بحب الشعر وبحاول أكتب تخاريف كده .. اللي حضراتكم بتقرأوها وأمركم لله
(6)
هو إحنا لسه في رقم 6 ... يا معين ممكن أقول إني بحب الكمبيوتر جدا
(7)..
بجد كده ظلم إحنا لسه في رقم 7بحب أفك وأركب واصلح الأشياء .. وبصراحه ساعات بتتصلح
وساعات لأ
.... بلاش سوء ظن .. لحد الوقت مفيش حاجه فرقعت .. الإنفجاراللي حصل من شويه كان من عند الجيران
(8)
بحس إن ربنا معايا .. طبعا هو معانا كلنا .. بس في مواقف كده بتحصل
تحس فعلا إن ربنا كان معاك وبيحفظك
أحكي لكم موقف مش بنساه كنت في الإعدادي .. وتقدروا تقولوا أن بيني وبين الكهرباء عمار ...
المهم كنت بكوى وكل البيت كان نايم .. وأنا مش بعرف أنام بعد الظهرالمهم فجأه
الفيشه ولعت .. كل المسلسلات والأفلام الأجنبي وأبطالهم حضروا أدامي
ماكجيفر وسوبرمان وكل أبطال الحواديت وأتباعهم المهم جريت أجيب طفايا الحريق ههههههههههههههه
الطفايا كانت من النوع السائل لسه برفع الطفايا وبضغط ع المفتاح علشان أنقذ الدنيا.. وعامله فيها
Women saving
لقيت النار انطفت
والفيشه إتقطعت إيه ده ؟ ... أنا لسه لحقت أعمل حاجه
في نفس الأسبوع شاهدت برنامج في التليفزيون بيتكلم عن الحريق وأنواع الطفايات
وكيف تستخدم والإسعافات الأوليه يومها الضيف قال معلومه مهمه جدا
ألا وهي إنه في حاله الحريق الناتج من الكهرباء لازم نستخدم الطفايا التي تحتوى على بودرة مش سائل ..
طب ليه يا با الحاج ؟
قال علشان اللحظه اللي هتضغط فيها على مفتاح الطفايا السائله
هي نفس اللحظه اللي هتصعق فيها .....لا قدر الله شفتوا كان بيني وبين خبر كان أقل من ثانيه
إييييييييه عمر الشقي ..هههه
**********************
ربنا يحفظكم جميعا ويوفقكم لكل ما يحب ويرضى

Sunday, June 15, 2008

عندما ينتهى الكلام



عندماينتهى الكلام و يجف المداد
وتتوه الخطى وتضيع البلاد
ويغرق الأمل .. ويحترق الفؤاد
ويتساوى كل شئ .. فالموت يشبه الميلاد
وتقف .. كل ما فيك يرتجف .. يستسلم للموت..
إلا بقيه من عناد
بقيه .. تريد الإبتعاد
فقط تريد الإبتعاد
عن كل شئ واي شئ
تريد أن تهرب .. وتهرب
وتبدأ العدو
تجري وتجري
تهرب من نفسك .. ونفسك تلاحقك
تهرب من الأيام .. والأيام تلاحقك
وتجري وتجري
إلى أين ؟
لا تعلم
فقط تريد أن تهرب
و تقف .. كل ما فيك يرتجف .. وتظل بقيه من عناد
تنظر خلفك ... تراك لم تبعد سوى خطوة
فتجري من جديد
إلى أين ؟ لا تدرى
فقط تشعر أن بداخلك بركان صامت ..
وددت لو انفجر بلا ميعاد
ومن جديد تقف .. وكل ما فيك يرتجف
وتظل بقيه من عناد
بقيه تريد الإبتعاد
وتبدأ من جديد تجري وتهرب
إلى متى ؟؟ إلى أين ؟؟
ليس هناك إجابه إلا رغبتك في الإبتعاد

Friday, June 13, 2008

لغتنا العربيه


لغتنا العربيه .. لغه القرآن
إقترحت العزيزه إل جي أن نكتب بوست لنشارك به

ونساند فيه دعوته لإحياء لغتنا العربيه




الحقيقه لم أكن أعلم ماذا أكتب فالدكتور كتب في موضوعه كل ما يمكن أن يقال
ولكن سأقول شئ كان يغيظني فعلا
وهو
في اللقاءات التليفزيزنيه والبرامج
عندما كان يتحدث الضيف بلغته العربيه
ثم يقحم بعض الألفاظ الأجنبيه في حديثه
وكأن هذا رمز للثقافه أو الرقي
ما كان يغيظنى هي أن تلك الألفاظ الأجنبيه من أبسط ما درسنا
Ok ... yes .. no .. sure..
وما شابه ... بمعنى أن تلك الكلمات ليست مقياس للعلم الخارق
طبعا الكلمات دي بنستخدمها في الشات أيضا
شئ آخر
البعض يكتب العربيه بحروف إنجليزيه
الحكايه دي أنا فاشله فيها جدا
بالرغم إن في ناس محترفه فيها
طبعا لازم نتعلم لغات أخرى
فمن أراد أن يأمن شر قوم تعلم لغتهم
المهم
طبعا أنتم تلاحظون أن اسمي في البروفيل salwa
إن شاء الله هغيره لـــ سلوى
ياريت تشاركونا هذا الموضوع
يعني إنت اسمك عربي فاكتبه بالعربي
عارفين ليه؟
تخيل إنك فتحت مدونه أحد الأجانب ( أمريكي .. فرنسي .. إنجليزى .. ) ووجدته يكتب البروفيل

خاصته باللغه العربيه
ماذا سيكون شعورك ؟؟؟
طبعا ستسعد وستشعر بالفخر بنفسك ولغتك
الآن بدل الوضع
لما نجعل الآخرين يشعرون بالزهو فقط لإلتصاقنا بهم وبلغتهم
هل لغتهم أحسن من لغتنا ؟؟ هل هي أفضل ؟؟
أن لغتنا هي لغه القرآن .. كلام الله

كما ستلاحظون إن شاء الله جمله في بدايه المدونه
تعلن أن هذه المدونه لفتاه مسلمه عربيه
فأنا أحب مدونتي وأفخر بها
وأفخر بكوني مسلمه وكفي بها نعمه
وأفخر بكوني عربيه رغم كل ما يكون
شاركونا لنشر لغتنا العربيه والإعتزاز بها
هل تعجبك الفكره ؟؟
إذا من سيشارك ؟؟؟؟

Thursday, June 5, 2008

مــن الحيـــاة

تحديث : هذه تدوينه لأخي الفاضل د:أبو يحيى وآدم
التدوينه عن الثقه بالنفس كيف ننميها في أنفسنا وأبنائنا
والحقيقه أنها من أجمل ما قرأت
وهي قد تكون ذات صله بموضوعنا
*************
تدخل الآباء في حياة الأبناء يصل إلى أي مدى ؟
هناك قول مأثور .. فيهم من قال إنه لعمر بن الخطاب
ومنهم من قال أنه لعلى بن أبى طالب
والحقيقه أني كنت أظن أنه حديث نبوى
وعندما كتبته هنا وأردت أن أتأكد من صحته
لم أجد له أي أثر أو إسناد
والله أعلم
المقوله بتقول
لاعبوهم سبع وأدبوهم سبع وصاحبوهم

( سبع ثم اتركوا لهم الحبل علي الغارب).. (فهل هذا ما يحدث ؟
ما جعلني أتطرق لهذا الموضوع .. مواقف حدثت أمامي .. فأردت أن أنقلها لكم
لنتعرف سويا ع المشكله وحلولها
وإليكم هذه الأحداث الحقيقيه
الحـــــاله الأولى
الحدث : فرح زيه زي أي فرح .. وبعد أن إنتهى الحفل كان في انتظار العروسان السيارات
لتبدأ زفه كبيره بعدها يتم توصيل العروسان لبيتهما
وقبل أن يركب العروسان عربيه الزفه ...والده العروس ووالده العريس شدوا مع بعض
قال إيه مين اللي هيركب الحلزونه .. قصدى مين فيهم اللي هيركب مع العريس والعروسه
في عربيه الزفه
كلمه من هنا وكلمه من هناك .. والحقيقه في المواقف دي يوجد المئات الذين يتبرعون بالكبريت
والبنزين .. لحد الدنيا ما ولعت من الخناق وما كان من عريس الغفله إلا أن ألقى اليمين على العروس
لينتهى الفرح بتلك المأساه
الحـــــاله الثانيه
شاب تخطى الثلاثين ميسور الحال .. يستشير والدته في كل صغيره وكبيره
لا يتخذ أي قرار دون الرجوع لها .. تقدم لخطبه فتاه ومعه الوصايا العشر
لا تتهاون ... لا تجيب طلباتهم مباشرة ... لا تظهر كرمك حتى لا يطمعوا فيك..إلخ
والنتيجه .. ظهر بمظهر ابن أمه ... فكلما تحدث مع والد العروس في الترتيبات ..

يحدث أحد أمرين
إما أن يتخذ قرار فوري ثم بعد الذهاب للبيت يرجع في قراره

طبعا بعد نقاش مع والدته
أو لا يعطي قرار إلا بعد مشورة والدته
والنتيجه ... إنتهت الخطبه مبكرا .. فالعروس وأهلها يريدون رجلا .. يتخذ قراراته
يستطيع أن يحمي زوجته ... ولكن مثل هذا الإنسان ماذا سيفعل لو توفيت والدته ؟
الحـــــاله الثالثه
إتفق العروسان على كل شئ حتى تم تحديد موعد الزفاف
وهنا ظهر طلب جديد من أهل العروس ...وما كان من العريس وأهله إلا الرفض
فتوصلت العروس لحل يرضي الجميع حتى تسير المركب.. وعرضته ع العريس الذي وافق
مباشرة ..بعد ذلك ذهب العريس لبيته
وذهبت العروس لبيتها ... ساعات وفوجئت بالعريس يزورهم ومعه عاصفه من الغضب والعصبيه
وإصرار على عدم تلبيه طلب أهل العروس
ماذا حدث إذاً ؟ ألم يكن منذ قليل مقتنع وموافق؟
إنهم أهله الذين لم يعجبهم الأمر .. وكيف إن ابنهم رضخ لطلب أهل عروسته
واشتد الخلاف بين الطرفين ... حتى إذا ما هدأ الأمر .. ظهر أشخاص
من الطرفين ( لهم صله قرابه من بعيد ) ليختلقوا المشاكل من جديد
والأمثله كثيره جدا

ما هذا ؟؟؟؟
إلى أي مدى تستمر سيطرة الأهل على الأبناء؟؟
لنعود للمقوله المأثورة
لاعبوهم سبع ... في فترة الطفوله حتى يتمتع الأبناء بالحنان والصحه النفسيه
أدبوهم سبع ... وضع أساس لبناء هذا الإنسان ليتعلم الطريق السليم
صاحبوهم سبع ... نسمعهم ونمنحهم خبراتنا ليواجهوا الحياه بعد ذلك
وبعد ذلك نتركهم يخوضوا في الحياه ... وربما نراقبهم من بعيد لنطمئن عليهم
فهل هذا ما يحدث ؟
أم أننا نتدخل في حياتهم حتى نفسدها ؟
مجرد تساؤل



Friday, May 30, 2008

العمــــــــــــر



عمر الإنسان
يمضي الإنسان في الحياه حاملا على أكتافه أيام وسنين هي كل عمره
قد يكون هذا الحمل ثقيلا جدا تنحني معه هامة هذا الإنسان
وقد يكون حملا لا يذكر
فيمشي في خيلاء
لا شك أن عمر الإنسان لغز ككثير من ألغاز الحياه التي قد نفك شفرتها .. وقد لا نستطيع
فكثيرا ما نجد شاب .. عندما تسأله عن عمره يقول مبالغا 60 وتشعر بالفعل أنه كهل
وكم من كهل عندما تراه أو تحدثه تشعر أنه شاب في مقتبل العمر
فكيف هذا ؟
منذ فترة قصيرة قرأت دراسه يابانيه تقول أن عمر الإنسان المكتوب بالسنين يختلف


عن عمر خلايا جسده
فقد يكون شخص في الأربعين وعمر خلاياه ستين والعكس
فعلا أمر محير
في رأيي أن هناك ثلاثه أعمار للإنسان
عمر يحسب منذ مولده .. تاريخ ميلاده على الورق .. مجرد تاريخ على الورق
وعمر للروح .. عمر داخلي .. وكلما تمتعت هذه الروح بسلام ورضا وجمال ... شعرت بأن
صاحبها شابا مشرقا
وعمر للجسد وخلاياه .. فكم من شاب يبدو أكبر من عمره
حتى قد تجد شاب صغير غزا شعره المشيب
وقد تجد كهلا يبدو كشاب في كامل لياقته
ترى ما الذي يشكل هذا الفرق في عمر وشكل وروح الإنسان ؟
أهي متاعب الحياه ومشاكلها وصدماتها وأحزانها وآلامها وأفراحها ومتعها ؟
أهو الإيمان القوى والسلام الداخلي ؟
أهي رغبه الإنسان نفسه في تمسكه بالحياه والتمتع بما فيها ؟
أم سأمه منها ورغبته في التخلص منها ؟
أهي الجينات .. والطفرات التي قد تحدث في الإنسان؟
أم هناك شئ خفي كأشياء كثيرة نجهلها ؟
لا أدري .. بالفعل لا أدري
فهل تدري أنت ؟؟؟ .
؟؟؟؟؟
جاء على بالي الآن مثال
طبعا تذكرون كلام الإعرابيه ونحكي من الأول

سئلت اعرابيه متقدمة في السن وقد احتفظت بنضارة شبابها وروعه جمالها _
أي مواد التجميل تستعملين؟؟

فأجابت: استخدم لشفتي الحق والصدق.. ولصوتي الصلاة.. ولعيني الرحمة وغض البصر
وليدي الإحسان ولقوامي الاستقامة
ولقلبي الحب
إنه جمال وشباب من نوع آخر
فجمال العقل .. بالفكر
وجمال اللسان .. بالصمت
وجمال الوجه .. بالعبادة
وجمال الفؤاد.. بترك الحسد
وجمال الكلام .. بالصدق
إتكلمت كتير أنا كالعاده عن الشباب والشيخوخه
ولكن ليس هناك أجمل من الطفوله وبراءتها
وعالمها النقي البسيط
ليتني أعود لهذا العالم

هل هناك من يحب أن يعود إليه؟؟؟

Tuesday, May 20, 2008

أسئله




لماذا أنت ؟
لماذا حلمت أن تتبدل بك كل أيامي ؟
ولماذا ظنتت أنك ستبدد كل آلامي ؟
وكيف تهت محلقا فيك ؟
وكيف عدت محطم فوق صخور أوهامي ؟
ولماذا أنت؟
توقعت أن تكون غير البشر؟
ولماذا رأيتك ملاك نزل دون موعد كالمطر؟
لا .. لا تقل شيئا .. فأنا الملام
أنا من ظننت أنك إنسان قد ندر
وشعرت أني بك اسكن القمر
فسافرت فيك .. وارتحلت دون خوف أو حذر
وظننت أنك تملك قلب
وما كان قلبك إلا حجر
إستأذنتها .. قبل أن أترجم أحاسيسها
بتلك الكلمات السابقه

Thursday, May 15, 2008

تاااااااااااااااج


عدنا مع التااااااااااااج
تاج من جنى
زي ما قالت هي كانت بتزور مدونه تأملات قلب بس مش كانت بتعلق
والمرة دي علقت و ماهنش عليها تيجي وإيدها فاضيه
فجابت لي التاج
يا حلولي .. يا حلولي
طبعا هديه مقبوله وسعيده بتشريفك ليا
بس بعد كده عايزة .. زيارات وتعليقات
أحسن أزورك أنا ..وبرده مش هتبقى إيدي فاضيه
بس هاجيب إيه ياترى؟؟؟
شاكوش ؟؟.. مفتاح إنجليزى ؟؟.. ولا فرفر؟؟
إوعي تزعلي أنا بضحك معاكي
إنت بجد نورتيني وسعيده إنك إفتكرتيني بالتاج ده
نجاوب بقى
توكلنا على الله
نركب آله الزمن ونعود للوراااااااااااء
الأول
أذكر خمس أحلام على الاقل ..تخص ماضيك وتحلم فيها بتغيير اشياء ..ماذا ستعدل وماذا ستترك؟؟
1
أحلامي الماضيه كانت متمرده جدا
مثلا كان أحد أحلامي أن أدخل كليه الشرطه
لكن عدلت عن هذا الحلم لأنه ضد طبيعتي
يعني ببساطه ..أنا أي حد يقول لي حاجه بصدقه
تخيلوا بقى لو بحقق مع مجرم مثلا وفضل يحلف إنه برئ ومظلوم
طبعا هفرج عنه ... بدون مناقشه
كمان مش بحب العنف مهما كانت صورة سواء باللفظ أو بالفعل أو حتى نفسي
لا أحب أمارسه ولا أحب من يمارسه ولا أحب أن يستخدم معي
2

حلمت إني اكون بيزنس وومان
بس كان الحلم ده رغبه في التمرد مش أكتر
الحلم ده اتعدل بعد ما دخلت كليه التجاره ..
فحلمت تاني إني أكون بيزنتس وومان بس المرة دي النيه إتجددت يعني
أنا عايزة كده لأني بحب ده ومش ينفع أكون غير كده .. عايزة يكون لي دور
مميز لأن أكيد ربنا خلقني لشئ مميز.. فهمت نفسي أكتر .. لقتني مش بحب أشتغل
في مكان ويكون فيه رئيس للعمل
وكل شويه يدي أوامر لمن هم دون مستواه الإداري رغبه في التسلط وخلاص
المهم حلمت إني أكون بيزنس وومان وفي نفس الوقت
أشتغل شئ أحبه ويناسبني كفتاه مسلمه
الحلم ده إتحقق بفضل الله .. إلى حد ما
إزاي؟؟ بجد مش عارفه .. غير إن فعلا ربنا بيساعد اللي بيساعد نفسه
فأصبح لدي الآن مشروعي الخاص .. أينعم صغير .. لكنه عندما بدأته كان أصغر
رفضت أي مساعدة من الأهل لتطويره .. لأني حبيت أكبره بنفسي
.. على فكرة متعه كبيره إنك تلاقي عملك بيكبر بإيدك
واهو بيكبر شويه بشويه
وأنا مؤمنه إن كل شئ بقدر
والله المستعان

3
حلمت إن يكون لي أصدقاء كتير .. الحلم ده انتهي مع أول حركه نص كم من إنسانه كنت بعتبرها صديقه
من وقتها مش بقيت أفكر في الموضوع أصلا
ومعنديش استعداد أكرر نفس الألم
ودايما في دماغي جزء من حديث شريف بيقول
من أراد صديق لا عيب فيه فالله يكفيه
4
حلمت إني أكون من رواد الفضاء
دايما بحب السماء والنجوم ولا يراودني الملل
وأنا أنظر إليهم حتى لو أمضيت الليل كله في التجول بنظري
بين النجوم ( لأ مش بعدهم ههههههه ) بس تلاقي كده كل نجمه مميزة بشئ
في سنه من سنوات الدراسه كنا بندرس الكواكب والنجوم
كنت بذاكر الماده دي بنهم شديد .. والنتيجه جبت 40 من 40 فيها وطلعت
الأولي ع المدرسه
لأ ما تفهموش غلط .. طلعت الأولي في الماده دي بس ) ههه
قال يعني اللي هيطلع الأول هيعطوه منحه دراسيه ع القمر
المهم كنت بحلم إني أطلع القمر أو المريخ وأكتشف هناك حاجات بقى
وكنت أتخيل إن عليهم حياه وحاجات من دي
طبعا الحلم ده صعب حبتين.. تلاته.. أربعه كده
5
حلمت إني أكون من الشعراء المشهورين
بس لقيتني معنديش الجرأه إنى ألقى الشعر ده أو أنشره
لأن مسأله الخجل عندي شئ زايد جدا بشكل بيضايقني
المهم اكتفيت بالكتابه من وقت للتاني وطبعا بعرض هنا في المدونه بعض مما أكتب
اتكلمت كتير ولسه في أسئله تانيه
إستحملوا بقى
الثاني

أذكر خمس أحلام على الاقل ..تخص مستقبلك .
1)
بحلم إني أزور بيت الله الحرام
2)
بحلم يرجع للمسلمين هيبتهم وكرامتهم في كل مكان ويكون لي دور في ده
3)
بحلم أشوف قدرة الله على أعداء الإسلام والمسلمين
4)
بحلم إني أموت وربنا راضي عني
5)
بحلم بحاجات كتير كلها بين أيادي الله
الثالث
أذكر شخصين على الأقل .متواجدين فى حياتك حاليا ..كنت تود وجودهم قبل الآن بزمن
طيب نخلي السؤال ده للسنه اللي جايه
يمكن يكون بقى في حد .. هههههههه
الرابع
أذكر شخصين على الأقل غير متواجدين فى حياتك حاليا كنت تود وجودهم الان او فى حياة اولادك مستقبلا ..
جدي لأمي .. رغم إني لم اراه .. لكن كان نفسي أعرفه عن قرب وأتحدث معه
خال والدي .. أيضا لم أراه .. لكن أيضا كان نفسي أعرفه
الشخصين دول .. الكلام عنهم رحمهم الله بيقول إنهم كانوا حكماء
رحم الله موتانا وموتى المسلمين

أمرر التاج بقى .. نياااااهاها ( ضحكه شريره ) هههههه
.. ساره .. مدحت .. سيد شبل .. عمر الطحان .. ابن مصر .. شريف
.. خبيب ...الهدهد الطائر ...شمعي أسعد ..
صالح سعيد .. واحده مفروسه .. سمراء ..انسان بلا عنوان .. الزواج روضه الحب .. دكتور ضياء ..
علاء سالم .. محمد .. معاذ
القادم أجمل ... رحاب مصطفي .. راجي .. أحمد مصطفي ..سيد مكسرات .. تمر حنه ..
.زمرده .. مهند .. ولاء ..حائر في دنيا الله .. تامر نبيل
كلمات .. موناليزا .. رئيسه حزب الأحلام .... حاول تفتكرني .. جنى ..سندباد ..عفراء
..د: هيما .. عاليا حليم ..الهواري .. سكر
كان في ناس تانيه بس التاج اتمرر لهم للأسف

Friday, May 9, 2008

عاش الزعيم


وصلتني أمس عبر الإيميل .. وحبيت أعرضها لكم
**********

دا شعب فقرى
أحمد فؤادنجم



نظرا لأن النعمة فاقت حدها
ولأننا مش قدها
ولأن فعلا انجازاتك فوق طاقتنا نعدها
ولأننا غرقنا في جمايل مستحيل حنردها
نستحلفك ....... نسترحمك
نستعطفك .......نستكرمك
ترحمنا من طلعة جنابك حبتين
عايزين نجرب خلقة تانية ولو يومين
اسمع بقى
إحنا زهقنا من النعيم

ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد 'غازه' لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض ماء وماء وماء
ونفض سيرة الانتماء
وبلاها نعرة وطنطنة
تبقى البلاد 'مستوطنة '
متسلطنة بالسرطنة
إيه اللي خدناه م الكرامة والإباء
حبة خطب وكلام...كلام
إحنا راهنا على النظام
ورضينا بخيار السلام
بخيار حنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم


يحيا الزعيم

********

ملحوظه .. شكرا لكل من سأل عني .. هي بس ظروف العمل .. ولي عوده إن شاء الله

Tuesday, May 6, 2008

إجازة إلكترونيه


تحدث أستاذنا عصفور المدينه عن الحياة الإلكترونيه
وعن الموت الإلكتروني .. والإنتحارالإلكتروني
وطالما أن هناك حياه وموت وانتحار أيضا
فمن المؤكد أن هناك إجازة إلكترونيه
وهذا ما سأفعله الفترة القادمه رغما عني .. نظرا لبعض الأشغال
من المؤكد أني سأفتقدكم جميعا
ومن المؤكد أيضا أنني سأزوركم .. كلما استطعت ذلك
أترككم في حفظ الله
ولكن قبل ذلك جمعت لكم بعض المقتطفات التي أحبها

*******************




برنامج اذكارى ...
برنامج رائع .. به جميع أذكار المسلم
كما يعرض رسائل ذكر اختياريه
والبرنامج متعدد اللغات

بجد جميل

************




























Friday, May 2, 2008

إيشــــي خيــــال يــا نــاس

البدايه
اتصال من إل جي ...
سلوى أنا في المنصورة .. عايزين نتقابل

ثم اتصال من سلوى ( أنا يعني هههه) لكلا من
سارة أو رحيل ( وعلى ساره أن تتصل بمن تعرفه ) ومنى أحاسيس
ياجماعه الإجتماع بنانيتي .. يعني بنات بس ( علشان ننم براحتنا

تم الإتفاق على أن نتقابل .. أمس الخميس .. العاشره صباحا

وقد كـــان
كان هذا الموجز وإليكم التفاصيل

سارة أول من وصل للموقع ( ملتزمه جدا في ميعادها
ووصلت أنا ومنى ونجوى (أختى ) .. فوجدنا من بعيد فتاه جالسه
ما إن رأيناها حتى قلنا .. ساره
وما إن رأتنا حتى وقفت تستقبلنا
إيشي خياااال يا ناس ههههههههه
طبعا سلمنا على بعض ... وقلنا لها يالا .. إحنا مييين ؟؟

والغريب إنها عرفتنا ...
وقالت إنت سلوى
.. إيشي خياال يا ناس ( عرفتنى إزاي مش عارفه) بعد قليل حضرت إل جي
وبعد السلام دخلنا إحدى حدائق المنصورة
الجنينه كلها ثنائيات يا جماعه إلا عدد قليل من العائلات وإحنا خمس بنات
عمالين نلف في الشمس ومش لاقين مكان ... ليه ؟؟؟
لأن كل اتنين قاعدين في مكان ومستوليين على المساحه حواليه
وكأن هناك اتفاق ضمني غير معلن
إوعى تغلس عليا وتيجي منطقتي .. أحسن أغلس أنا كمان عليك
حقيقي كل واحد كان في حاله
ناس ذوق ..ذوق.. صراحه
ههههههههه
المهم وجدنا مظله كبيييييرة ومش فيها غير اتنين بس
قلنا بس ... هنقعد يعني هنقعد
ودخلنا فعلا وقعدنا وبدأنا نتكلم ونحكي ولا كأن في حد قاعد معنا
الثنائي فضل ساكت وخمس دقايق كده وقام
مش عارفه ليه بصراحه ... ؟؟؟؟؟
ضحكنا كتييييييييير
وإتكلمنا عن حاجات كتير
وعن التدوين
وأفضل المدونين
وعن إنطباعنا عن بعض
كان في رأي بيقول
إن مش لازم المقابله الشخصيه لأنها ممكن تصدم الواحد في الآخر

بس مع احترامي للي بيقول كده .. بقول لأ
صحيح ممكن الكلام ده ينطبق على معرفه الشات
لكن المدونه لأ
لأنها
سلسله من المواضيع ... يعني مش معقول هتحاول
تتجمل في كل موضوع تكتبه وتنجح في كل مرة
النوع اللي بيتجمل ويظهر بشكل غير شكله
إما تكون تدويناته عباره عن إقتباسات دائمه
أو يستعين بشخصيات أخرى تساعده في التدوين
لكن الشخص الطبيعي .. بيكون نفسه .. في كتاباته .. وتعاملاته
بيكون نفسه في كل مكان
مثلا
سارة في الطبيعه هي التي ستجدونها في مدونتها
وكذلك إل جي .. هي .. هي يا جماعه اللي بتكتب في مدونتها
منى بأحاسيسها .. هي هي يا جماعه اللي في مدونتها

أنا اللي بكتبه واللي بكتبه أنا

بالضبط زي الحكمه ما بتقول
تستطيع أن تخدع بعض الناس .. بعض الوقت
ولكن لن تستطيع أن تخدع كل الناس كل الوقت


شخصيتك هتظهر ... هتظهر
مهما تجملت .. وتخفيت ...

ساره ... إل جي ...
سعيده جدا جدا جدا بالتعرف عليكم
وإلى لقاء آخر في اجتماع بنانيتي ( أصلنا عنصريين يا جماعه ههههههه
نجوى أختى ومنى .. طبعا أعرفهم من زمان
ههههه
كل واحده فينا كانت عامله حسابها إن اللقاء ده كبيره ساعتين ويخلص
بس اللقاء استمر لساعااااااااااات
كان في تفاصييييل كتير حصلت
بس مش عايزة أطول عليكم
المهم
إنه كان يوم جمييييييييل جدا جدا

Tuesday, April 29, 2008

آن للقلب الحزين .... أن يستكيــــــــن

عندما تتوه أنفسنا .. نفقد الكلمات .. نفقد الثبات
يختل التوازن .. نوشك أن نقع
ننظر يمينا ويسار .. ألف يد تمتد لتدفعنا إلى الوقوع
بينما هناك .. يد صديق
صار بيننا وبين الوقوع خطوة
تسرع إلينا وتمتد يد الصديق

نمد لها يدنا ... نقربها أكثر ... نتشبث بها أكثر
تلمع أعيننا من السعاده .. بعد أن لمعت من الدموع
نبتسم.. نفرح
ولما لا ؟ ولقد جاء من نظن أنه طوق النجاه
نمد له يدنا ... نتعلق به بكل ثقه
فيدفعنا .... نفس اليد التي نتشبث بها
!هي من تدفعنا للوقوع


نقع ......
ترى ما السبب ؟ أمن المفاجأه ؟ أم من الدفعه القويه ؟
ولما السؤال الآن
النتيجه واحده .. مهما اختلفت الأسباب
قد نتألم .. قد نجرح .. قد ننزف

لكننا لازلنا نتنفس
ننظر حولنا
الكل سعيد .. في عينيه نشوة الإنتصار
وهاهم هموا بالرحيل .. تتعالى أصواتهم بالضحكات
لكننا لازلنا نتنفس
لازال هناك حياه
دوما الأنفاس تبدأ بها الحياه
هي أول صرخه للطفل عند وصوله للدنيا
هي أول إشارة للحياة
الحمد لله
لازلنا نتنفس
وطالما هناك أنفاس
فإن هناك حياة
ننظر للسماء ... ولازلنا نتنفس
نحاول أن نقف
مرات ومرات
تارة نقع ... وأخرى نفشل ... ولكن في النهايه ومع المحاولة .. نقف من جديد
ننظر للسماء ... ونبدأ من جديد
ربما لم يقتلنا الوقوع
ولكن ...
ترى ...
هل سيحتمل القلب المزيد ؟؟؟
في تأملات قلب

Tuesday, April 22, 2008

تـــــــــــاج

تاج من إخواني الأعزاء
مدحت وعمرو


اذكر 10 أشياء عن نفسك
أنا كنت فاكرة إن التاج ده خفيف
بس لما تيجي تحله تجده مش خفيف ولا حاجه
إنك تذكر 10 حاجات عن نفسك ده شئ كتير

المهم
(1)
هقولكم سر ألا وهو .. اسمي الحقيقي سلوى
(2)
بكالوريوس تجارة .. محاسبه
(3)
تحديث بسيط أحسن البعض إفتكر إننا 5 بنات إخوات
وطبعا الأمانه العلميه تقتضي أن أقول
إحنا أربع أخوات ماشاء الله.. أخان أكبر مني وأخت اصغر مني .. وأنا رقم 3
(4)
بحب الرسم جدا لدرجه إني لما بكون برسم مش بحس باللي حواليه
بس الوقت مش بقيت أرسم كتير
(5)
بحب الشعر وبحاول أكتب تخاريف كده .. اللي حضراتكم بتقرأوها وأمركم لله
(6)
هو إحنا لسه في رقم 6 ... يا معين
ممكن أقول إني بحب الكمبيوتر جدا..
(7)
بجد كده ظلم إحنا لسه في رقم 7
بحب أفك وأركب واصلح الأشياء .. وبصراحه ساعات بتتصلح وساعات
لأ بلاش سوء ظن .. لحد الوقت مفيش حاجه فرقعت .. الإنفجار
اللي حصل من شويه كان من عند الجيران
(8)
بحس إن ربنا معايا .. طبعا هو معانا كلنا .. بس في مواقف كده بتحصل تحس فعلا
إن ربنا كان معاك وبيحفظك
أحكي لكم موقف مش بنساه
كنت في الإعدادي .. وتقدروا تقولوا أن بيني وبين الكهرباء عمار ... المهم
كنت بكوى وكل البيت كان نايم .. وأنا مش بعرف أنام بعد الظهر
المهم فجأه الفيشه ولعت .. كل المسلسلات والأفلام الأجنبي وأبطالهم حضروا أدامي
ماكجيفر وسوبرمان وكل أبطال الحواديت وأتباعهم
المهم جريت أجيب طفايا الحريق ههههههههههههههه
الطفايا كانت من النوع السائل
لسه برفع الطفايا وبضغط ع المفتاح علشان أنقذ الدنيا.. وعامله فيها
Women saving

لقيت النار انطفت والفيشه إتقطعت
إيه ده ؟ ... أنا لسه لحقت أعمل حاجه
في نفس الأسبوع شاهدت
برنامج في التليفزيون بيتكلم عن الحريق وأنواع الطفايات وكيف
تستخدم والإسعافات الأوليه
يومها الضيف قال معلومه مهمه جدا ألا وهي
إنه في حاله الحريق الناتج من الكهرباء لازم نستخدم الطفايا التي تحتوى
على بودرة مش سائل ..
طب ليه يا با الحاج ؟
قال علشان اللحظه اللي هتضغط فيها على مفتاح الطفايا السائله هي نفس
اللحظه اللي هتصعق فيها .....
لا قدر الله
شفتوا كان بيني وبين خبر كان أقل من ثانيه
إييييييييه عمر الشقي ..هههه
كفايه كلام عن نفسي بقى ... إيه الرغي ده

اختار 5 ومرر لهم التاج
مش عندي الكلام ده
إنتم عارفين سياستي الديمقراطيه التعسفيه
كل اللى لينكات مدوناتهم عندي
وكل اللي يحب يجاوبه يتفضل على طول
**************
لو تحب تضيف مقطع صوت لمدونتك + اشياء أخرى
تفضل في مدونه عالم الكمبيوتر من هنــــــــا