Friday, October 23, 2009

حافظوا على زباله مدينتكم


القاهرة تتجمل بألوان من الزباله في عديد من المحافظات وخاصه الجيزة

يظهر ان المشكله دي ظهرت بعد التخلص من الخنازير

الخنازير كانت منضفه البلد يا جماعه

طبعا انا مش من القاهرة لكن بالصدفه شاهدت برنامج

وكان السيد المسئول طبعا موجود وكل الأطراف المعنيه موجوده

وكل التليفونات والمقابلات مع العديد من السكان الذين يشكوا من ان الزباله في كل مكان

أمام المدارس وأكشاك العيش وحول المنازل

خصوصا اننا في ايام حرجه والأمراض الغريبه منتشره

واللي يغيظ إن الناس بتدفع على فاتورة الكهربا مبلغ عشان النظافه

وياتدفع لنشيل العده :)) قصدى نقطع الكهربا

وطبعا النظام عندنا ادفع وبعدين اشتكي

وحتى لو اشتكيت .. ابقى قابلني :) .. أو قابل السيد المسئول أفيد ربنا يديك الصحه والعمر بقى

المهم

السيد المسئول قال ايه ؟

قال ان الشركه الأجنبيه المتعاقدين معها بتمر بأزمه

وطبعا لازم نتحملها.. يعني لو احنا ماتحملناش مين يتحمل ؟!

وفي وسط الكلام قال إنها تمر بضائقه ماليه وأن الحكومه قامت بتسليفها

يا حلاوة يا ولاد

يعني احنا وصلنا لهذه الدرجه من التقدم والرقي والثراء

بنشغل عندنا شركات أجنبيه وعشان إيه؟

عشان تشيل الزوباله

لا ومش كده بس

دي الشركه كمان يا عيني مفلسه واحنا بنسلفها

طبعا انا سمعت كده وجالي هستريا من الضوحك

مش ضحك لأ ضوحك
فعلا شر البليه ما يضحك

35 comments:

أحــوال الهـوي said...

بالذمه الكلام ده صحيح
يعني بتاخد اجرها و علي عمل مش بتاديه و بتاخد سلفيه كمان
ايه الهبل ده
بكرة تجيبي زبالة من برة ترميها في البلد حبا و عرفانا بالجميل

ده تكيه و صاحبها غايب
اذا كان ده كلام المسئول يبقي الناس لازم تساهم بانها تفع فلوس الزباله و تتبرع للشركه ربنا يفك ضيقتها

تحياتي

romansy said...

يبقى انت اكيد فى مصر
دا العادى دلوقتى
ومش بقى فى اييدنا نغير حاجه
بس اهو نتمنى الاصلاح من قلوبنا

حاول تفتكرنى said...

فعلا وبحق

لاحظت ذلك فى الزيارة الأخيرة لمصر
القاهرة تعاني بجد ، كل المناطق بلا استثناء

قديما كنت اعتقد انه سلوك فردي من الناس

لكن دلوقتي اتأكدت ان الحكومة هي اللي بتجبر الناس على كدة

تحياتي

موناليزا said...

شئ محزن ومؤسف

صفــــاء said...

طبعا نستحمل
وشيلنى واشيلك
لو مستحملناش احنا مين اللى يستحمل
واهو يبقى زيتنا فى دقيقنا
او مجارينا فى زبالتنا
ويا وطن ما دخلك وباء

سلوى said...

أحــوال الهـوي

صحيح يا دكتور .. أنا شفت البرنامج
وكنت مستغربه
شركه اجنبيه ونقرضها
دا ايه ده
كمان في اقاويل ان في شراكه بين الشركه الاجنبيه واشخاص مصريين

بس اوعي تجيب سيره لحد
اصل دي اسرار :))

شرفت المدونه دكتور
سعيده بجد بتعليقك وتواجدك

سلوى said...

romansy

ربنا يصلح الأحوال
نتمنى نشوف بلدنا جميله رومانسي

سلوى said...

حاول تفتكرنى
بالفعل
لي أصدقاء بالقاهرة أكدوا هذا
مش الجيزة بس
لكن اغلب المناطق
المشكله ان الموضوع ده انتشر في وقت انتشرت فيه امراض غريبه

سلوى said...

موناليزا
جدا موناليزا
مؤسف جدا ومقزز

سلوى said...

صفــــــاء
مش كده برضه
لازم نتحمل بعض طبعا
والناس لبعضيتها يا صوصو

http://kasperb4.blogspot.com/ said...

حسبي الله
ونعم الوكيل .. بقا يتحكم فينا الرويبضة خلاص

Dr. Ibrahim said...

مصر أصبحت مشهورة بالأهرامات والحمى الروماتزمية والزبالة وطابور العيش
وعجبى

ebn roshd 777 said...

حضرتك بس مش واخده بالك
المشكله مش في الزباله اللي في الشوارع
المشكله بجد في الزباله اللي اسمها
فساد المحليات
بس بجد عجبتني اوي حكايه السلف دي
فعلا احنا اكرم شعب واعبط شعب

karim said...

انا شايف ان دة عادى جداا فى بلدنا كل المسؤليين فيها بتهرج و مش هاممهم شىء, فكرتينى بمقطع من مسرحية تخاريف لمحمد صبحى لما كان حاكم و جمع المسؤولين وقالو ليية بصفتنا مسؤولين احنا مش مسؤولين انما هى مسؤلية الشعب, ربنا يكرمنا ويخرجنا منها على خير

Anonymous said...

ازيك يا سلوي
ما هو لازم تكون شركة اجنبية
لأن (الزبالة ) بيتعمل لها حاجة اسمها
recycling
اعادة تدوير
وبيطلع منها منتجات
التقنيات دي لسه مش عندنا
دا من غير خنازير ولا حاجة يعني


تامر

دعاء العطار said...

سلوى وحشتينى بجد وبقالك فتره مش بتكتبى

بجد مفتقداكى جدااااااا

اما بالنسبه للزباله فخدى من ده كتير لانك فى المحروسه ومابالك بقى بمسئولين المحروسه

ناس بتخاف على المواطن بجد

ليكى حق والله تضحكى وتموتى من كتر الضحك

احلى سلام لاحلى سلوى

سلوى said...

آلام وآمال
فعلا يا محمود حسبنا الله ونعم الوكيل
دمت يكل الخير والنجاح :)

سلوى said...

Dr Ibrahim

هي بقت مشهورة بكده :))
بسيطه
المعم مش يعتبروا الحاجات دي من العجائب
دمت بكل الخير دكتور وربنا يوفقك

سلوى said...

ebn roshd 777
وحضرتك برضه مش واخد بالك :)
الفساد بقى في كل مكان
مش المحليات بس
تعرف انهم وزهوا ع الأولاد في المدارس كمامات
وطبعا الكمامات دي جايه من بره زي معونه كده
ومع ذلك
اللي اتوزع ع الولاد كمامات اشبه بقطع القماش
يعني مالهاش لازمه اصلا
حسبنا الله ونعم الوكيل

دمت بكل خير ابن رشد وأسعدك الله

سلوى said...

karim
ربنا يخرجنا منها فعلا على خير
لا لنا ولا علينا

شرفت المدونه أخي
حفظك الله

سلوى said...

Anonymous
ما انا عارفه يا تامر انها بيتعمل لها اعاده تدوير :)
قمامه القاهرة غنيه
بالمواد العضوية والورق والزجاج والالمونيوم والقماش والبلاستيك والصفيح والنحاس
طيب عارف ان في دراسه بتقول ان القمامه في مصر من اغنى انواع القمامه
وعارف ان عمليه الفرز والتصنيع ممكن توفر أكتر من 120000 فرصه عمل
طيب مش يبقى احنا اولي من الأجنبي ؟

يا تامر لما كابل النت اتقطع جبنا خبراء من الخارج
لحد امتى نفضل كفيش عندنا تقنيات ولا امكانيات

شرفت المدونه تامر ودمت بكل خير وصحه

سلوى said...

dodoo
وانت كمان وحشاني
ولسه سأله عليكي امبارح :)تمرايه
يارب تكوني بخير وربنا يوفقك في دراستك
ويالا يا ستى اضحكي انت كمان شويه
يالا فرصه
:))

الملتقى الجنة said...

السلام عليكم

جزاكم الله كل خير

نتمنى زيارتكم لمدونه حمله بادر

الملتقى الجنة said...

السلام عليكم

جزاكم الله كل خير

نتمنى زيارتكم لمدونه حمله بادر

مدحت محمد said...

عندنا فى السويس كدة والله

الناس اللى شغالين فى الشركة مش بياخدو مرتباتهم

والبلد زبالة

اينعم هما بيهتمو باماكن واماكن لا

بس بجد بياخدو فلوس على الفاضى

ياسمين said...

محتاجة استفسار منكم من فضلكم
اتفضلوا عندى فى المدونة
ضرورى وشكرا

مدحت محمد said...

انتى ايه اخبارك ياسلوى

طمنينا عليكى ارجوكى

zekra said...

هو بجد شئ مؤسف لكن كل ما نحب نشارك للافضل تلاقى اللى بيطلع و يرجعنا تانى للصفر
تحياتى

Anonymous said...

أحلى كلام ايه بأه وكله عن الزبالة

حكومة ...نظيف طبعا

ال جي من غير توقيع

مدحت محمد said...

حبيت بس اقلك كل سنة وانتى طيبة

سلوى said...

الملتقى الجنة
شرفت المدونه
وإن شاء الله هزور مدونتك
ده شئ يسعدني :)

*******************
مدحت محمد
مش مزعلني غير الفلوس اللي ع الفاضى دي والله
طيب عارف
ليله العيد
سياره الزباله الفارهه عدت من الشارع
الساعه كان واحده تقريبا
راحت واحده من ساكني الأدوار العليا
حدفت الكيس بتاعها
راح نازل ع سلوك الكهربا
الراجل اللي كان ع العربيه دمه نشف وصرخ
طبعا لولا ستر ربنا كانت العهربيه كلها اتكهربت باللي فيها
المهم صمموا يعملوا محضر وبصراحه الست كانت تستاهل
بس الناس هدوهم
بس حلفوا انهم مش هيعدوا من الشارع تاني
وقد كان
يبقى العيب في مين ؟؟؟

سلوى said...

ضحكة مجروحة

حاضر مع اني شكلي هاجي متأخر
سامحيني
***************
مدحت محمد
كل سنه وانت طيب وكل اسرتك يا مدحت
شكرا لسؤالك
ربنا يخليك يارب :)

سلوى said...

zekra
فعلا عندك حق

الله المستعان
شكرا لتشريفك المدونه

سلوى said...

إل جي
شفتي الكلام :))
وبعدين انت مش محتاج توقيع يا لولو
كفايه اسمك بس :)

abdelhamid said...

بجد والله الواحد إتخنق من الحاجات

كل ده وسمعنا إن الصين عرضت على مصر إنها تشترى الزباله بتاعتنا وإحنا ماوفقناش ليه بأه

علشان زبالتنا غاليه علينا وما ينفعش حد تانى يتقرف بيها غيرنا