Wednesday, September 3, 2008

تأمـــلات

جئت الدنيا وحيدا
لتبدأ الصراع معها
ثم
تخرج منها وحيدا


سؤالي الآن هو ما موقعك من الدنيا ؟

إيه الألغاز دي :)

يعني هناك ثلاث أشياء
الدنيا .. التي نعيش فيها .. بكل المفاتن والمتع والسعاده والشقاء

وهناك الآخرة
جنه نطمع أن نصل إليها .. ربنا يرزقنا إياها جميعا

ونار ... نعوذ بالله منها

وهناك الإنسان

أنت

هل تستطيع أن تجيب على سؤالي الآن
نسيته
أقول تاني :)
أين موقعك من الدنيا والآخره
أين تقف ؟

أسهلها لك
تعالى نرتب
نضع الجنه في المقدمه
ثم من ؟؟
أنت أم الدنيا ؟؟
كفايه ألغاز كده ..و تعالوا شاركوني الرأي

هناك من يضع الدنيا أمامه يلهث خلفها ..
تجري منه وهو خلفها
يريد أن يصيب منها شئ ما
يكاد يجن إن لم يحصل عليه
وأعتقد أننا جميعا نمر بتلك الأوقات عندما نسعى خلف الدنيا جاهدين لنصل إلى شئ ما نريده
مثل هذا الإنسان موقعه في آخر الصف
يعني بالترتيب كده
الجنه ثم الدنيا ثم هو
فهو يجري خلف الدنيا .. والدنيا تجري منه
قد يصيب منه ما يريد
وقد لا يصيب منها شئ
ولكن المؤكد أنه فقد الآخره

وهناك من يضع الجنه أمامه
يجري خلفها .. يفعل ما يستطيع لينالها
مثل هذا الشخص موقعه في المنتصف
حيث يضع الجنه أمامه
ثم هو
ويترك خلفه الدنيا

هذا الشخص
الدنيا هي التي تجري خلفه :)
سبحان الله

عارفين المثل اللي بيقول .. الدنيا ماتديش محتاج
هو كده بالضبط

يعني إيه ؟
نترك الدنيا وبلاش نعيش ونتمتع بها ؟

لا .. عيش وتمتع ولكن

لا تجعل الدنيا أكبر همك

عيش وأعمل واتعب واجتهد ... عن أنسٍ رضيَ الله عنه عن النبي صلى الله عليه وسلم قال :
( إِنْ قَامَتْ السَّاعَةُ وَفي ِيَدِ أَحَدِكُمْ فَسِيلَةٌ ،فَإِنْ اسْتَطَاعَ أَنْ لَا يَقُومَ حَتَّى يَغْرِسَهَا؛ فَلْيَغْرِسْها )‏.

الفسيله هي .. صغار النخل


نرجع للسؤال تاني
أين موقع من الدنيا والآخره ؟؟
مش عايزة أطول عليكم
المهم
حاول أن تجعل رضا الله أمامك دوما
إجعله غايتك الكبري
واجعل الدنيا خلفك
ولا تنساها
وتأكد مهما كان ما أردته منها ولو تحصل عليه
ففي عدم حصولك عليه هو الخير
كل الخير
فالله يعلم ولا نعلم

معادله صعبه

تفتكروا هنجح فيها ؟؟

على فكرة
سألت نفسي نفس السؤال اللي سألته لكم أول أمس


وأردت أن تشاركوني
إسأل نفسك ودعها تجيبك
فهي لن تخدعك أبدا

28 comments:

رفقة عمر said...

ولا تنسى نصيبك من الدنيا
اللهم لا تجعل الدنيا اكبر همنا ولا مبلغ علمنا
اللهم اعطنا من الدنيا ما تعنا بها على طاعتك
جميله تاملاتك وبجد موضوعك كنت محتاجه ليه جدا
جزاك الله خيرا كثيرا وكل سنه وانت بالف خير

رحــــيـل said...

لولو

كل سنه وانتى طيبه
شوفي انا عن نفسى وفي تلك اللحظات
بصراحة جدا
مش عارفه انا عايزه ايه
ولا انا فين
ولا بعمل ايه
ولا عشان ايه
انا حتى مش عارفه ايه اللى جابنى هنا؟.
انتي مين؟
وتقريبا بطلت افكر
وخدت اجازه من التأملات
مش بوصل لحل غير انى بتعب بجد

walaa tulip rose said...

والله معاكي حق
كل سنة وانتي طيبه الاول
وبعدين بقي نشرح معاكي حق في ايه
احنا فعلا اوقات كتير بننسي احنا فين وموقعنا ايه بالنسبة للتقسيم اللي قلتيه
الا من رحم ربي

يا ريت نقدر نحدد موقعنا والاكيد ان ده حيعطيني دفعة قوية جدا للامام
وفي الاتجاه الصائب في حياتنا كلها بكافة مجالاتها
يارب اقدر احدد موقعي
واجاوب علي السؤال بشكل صحيح
ويارب كلنا نكون حطينا الاخرة قدامنا والدنيا ورانا
تحياتي لك حقيقي بوست رااائع
وفقك الله

Amgad said...

بجد احييكي علي روعتك في وصف
الفكرة بالطريقة الفلسفية الجميلة دي
فكرة ممتازة
وانا متفق معاكي فروم ايه تو زد
في اللي قولتيه

Anonymous said...

كلامك سليم جدا

والمعادلة اذا اردت ترتيبها تبدأ بكلام رفقة عمر

وايتغى فيما آتاك الله الدار الآخرة "
"ولا تنسى نصيبك من الدنيا

وقول الرسولع عليه السلام
ليكن حظ امرئ منكم كحظ الراكب

يعنى الآخرة فى بالك دائما فى كل شأنك
أما رسالتنا على الارض فهى عمارتها وتحقيق عظمته سبحانه وتعالى بالعلم والفن وكل ماهو ابداع

مسألة تصيب شيئا أو لاتصيبه لاأحد يضمن ذلك .. غير انه الاهم ان تقول مطمئنا .. انا عملت اللى على

كل سنة انت والاسرة طيبين

mohamed emera said...
This comment has been removed by the author.
mohamed emera said...

السلاااااااااااام عليكم ورحمه الله وبركاته
اولا قبل كل شىء كل سنه وانتى طيبه وبالف خير يارب تكونى دايما اقرب لله
واسف جدا على تاخرى دا وغيابى عن الموضوعات الجميله دى
اللى كتبتيه جميل كعادتك
فيه فلسفه قل من تدبرها هناك انسان وهناك دنيا وهناك اخرة اى (خلود)ولهذا الانسان اختياره اما خلود فى الجنه اما فى النار نعوذ بالله منها
والعمل للجنه هو العمل باوامر الرحمن الذى اذا عرفناه وعرفنا طريقه حقا عرفنا السعادة فى الدنيا والاخره
ولكن هنا يظهر طاعه الله اى العمل على طاعته وارضائه العمل ليس فقط التمنى
ولكن العمل للاخرة وللدنيا وان العمل لهذه الجنه يتم فى الدنيا اعتقد ننجح لو اتبعنا امر الله لا اعتقد بل اجزم
ولكن اذا عملنا واذا حددنا هدفنا الجنه وكيف نحصل على هذا الهدف
ولن يضل من كان الحكيم ربه
تحياتى للموضع الرائعواسف على الاطاله
تحياتى وسلامى
اشوفك بين حروفك

canary said...

يعنى يا سلوى احنا بنجرى ورا الدنيا والا ورا الاخرة والا ورا الجنه؟؟؟
احنا فين فى الحسبه دى؟
الحوار والتساؤل الفلسفى اوقات يكون محبط واوقات يكون قاتل للروح
لما نفضل نسئل اسئله زى دى ومنعرفش احنا مكانا فين فى الدنيا
انتى رقيقه وتساؤلاتك جميله زيك
كل سنه وانت طيبه يا قمر

son's egypt said...

السلام عليكم
الدنيا والاخرة
هناك من يسيعي للدنيا بكل ما اوتي من قوة وجهد وهناك من يسعي الاخرة
ساعات بيكون في صراع نفسي داخل الانسان ما بين الدنيا والاخرة
هناك ناس تقول عيش حياتك انت مش ضامن تعيش بكرة
وده طبعا غلط
ده ان دل بيدل علي ان الفكر في قصورة في هذه المسألة
نعيش الدنيا بس نعيشها صح
زي ما قال ربنا وجعلنا النهار معاشا
ولازم نفكر دايما في الاخرة وازاي حنكون
يوم القيامة

Omar El-Tahan said...

الإنسان من ولادته بسير في طريق نهايته هو مصيره اما الى جنة و إما الى نار ... فالناجح هو من يتزود من طريقه بزاد يعينه على تحديد مصيره ... و ما عند الله خير و أبقى .... اللهم قو ايماننا و أعنا على انفسنا ... فشهوة النفس هي العدو الأكبر

سلوى said...

رفقة عمر
رفقه العزيزه سعيده بتشريفك المدونه :)

الحمد لله أنك وجدتي في الموضوع بعض الفائده

اللهم لا تجعل الدنيا اكبر همنا ولا مبلغ علمنا
اللهم اعطنا من الدنيا ما تعنا بها على طاعتك

كل سنه وانت طيبه وبصحه وبخير أنت وكل الأسره

***************************
رحــــيـل
كل سنه وأنت طيبه وبصحه وبخير أنت وكل الأسره

بصراحه جدا
مش عارفه إنتي مين ؟
إعترفي

:)

ربنا يهديكي يا ساره لكل ما يحب ويرضى وينور بصيرتك
دايما منوراني يا لولو :)

سلوى said...

walaa gobashy
إزيك يا ولاء
كل سنه وانت طيبه وبصحه وبخير أنت وكل الأسره

ويارب كل الناس تقدر تحدد هي فين وطريقها إيه
مرة ننجح ومره نفشل
بس المهم نحاول
نورتيني بجد يا ولاء
دمتى بكل الخير
*************************

Amgad
شرفت المدونه أخي وكل سنه وانت طيب أنت وكل الأسره

سلوى said...

Sherif
دايما منورني :)
ودايما تعليقك فيه شئ مميز
ترتيب المعادله *
وعجبني جمله النهايه

مسألة تصيب شيئا أو لاتصيبه لاأحد يضمن ذلك .. غير انه الاهم ان تقول مطمئنا .. انا عملت اللى على

صح
أهم شئ نعمل اللي علينا بجد

دمت بكل الخير أخي يا من ترسم بالقلم :)

*************************
mohamed
ياااااااه
إنت فين يا محمد كل ده؟
أتمنى تكون بخير أنت وكل من حولك
ويكون غيابك لخير
كل سنه وانت طيب وبخر أنت وكل الأسره

سعيده بتعليقك وطبعا مفيش إطاله ولا حاجه
وزى ما قلت أخي
والعمل للجنه هو العمل باوامر الرحمن الذى اذا عرفناه وعرفنا طريقه حقا عرفنا السعادة فى الدنيا والاخره

دمت بكل الخير محمد

سلوى said...

canary
كل سنه وانت طيبه أنت وكل الأسره

نيجي لسؤالك بقى


يعنى يا سلوى احنا بنجرى ورا الدنيا والا ورا الاخرة والا ورا الجنه؟؟؟
احنا فين فى الحسبه دى؟

ماهي الأخرة هي الجنه والنار
وطبعا كلنا عايزين الجنه

:)

إحنا فين بقى من كل ده
كل واحد هيقدر يجاوب على نفسه السؤال ده
وبعدين إيه ده التساؤل مرة محبط ومرة قاتل
مفيش مره محفز :)

ماشي يا كناري
مش هعمل فيكي حاجه علشان رمضان :)
ههههههههههه

وكمان بتقولي
لما نفضل نسئل اسئله زى دى ومنعرفش احنا مكانا فين فى الدنيا
طيب ما نعرفش ليه
وهنفضل ما نعرفش لحد إمتى؟

مش لازم كل فتره كده ع الأقل نحاسب نفسنا ونشوف إحنا فين

دايما منوراني بتواجدك الجميل عزيزتي
دمتى بكل الخير والتوفيق
***********************

سلوى said...

son's egypt
أخي العزيز بن مصر
وعليكم السلام ورحمة الله وبركاته
كل سنه وأنت طيب وبخير وصحه أنت وكل الأسره

سعيده بتعليقك وزي ما قلت

نعيش الدنيا بس نعيشها صح
زي ما قال ربنا وجعلنا النهار معاشا
ولازم نفكر دايما في الاخرة وازاي حنكون
يوم القيامة

دايما منورني أخي
دمت بكل الخير

********************
Omar El-Tahan

كل سنه وانت طيب :)

هقتبس مما كتبت هذا الجزء الجميل

فالناجح هو من يتزود من طريقه بزاد يعينه على تحديد مصيره ... و ما عند الله خير و أبقى

دمت بكل الخير والتوفيق

مدحت محمد said...

اللهم اجعلها فى ايدينا ولا تجعلها فى قلوبنا


فنحركها ولا تحركنا


ويحسن ختامنا

Razi Soliman said...

الدنيا
هى ملذة الانسان يركض ورائها من يريدها ولكنه تسبقه وتركض وراء المؤمن ولكنه يسبقها من اجل اللحاق بدار الخلود

تجد فى ديننا الحنيف كل شىء بايسره
فلم ننهى عن الدنيا ولكننا نهينا عن السعى ورائها بان ننسى اخرتنا ونجتهد فان مهر الجنه ليس ببخس

خذ من الدنيا ما تشاء واعمل لاخرتك فهى الباقيه

من أراد الدنيا فعليه بالقرآن، ومن أراد الآخرة فعليه بالقرآن ومن
أرادهما معا فعليه بالقرآن

جزاك الله كل خير
كل سنه وانتى طيبه

الى اقرب لقاء

رازى

زُمُرده said...

ازيييييييييييك

وحشاااااااااااني وربنا العالم
انت فضلت حطالي البوست بتاع التاج
وانا قلت بتأجز وهتاخد رمضان

اتاريك جيتي ولا تدخلي تعملي دوشه عندي

ينفع كده

انا رديت ع تعليقققك واتمنى تقريه

مش عارفه انت حطيت الترتيب في الشرخ الجنه وبعدين الدنيا وبعدين الشخص

يعني لو الاخره هدفه مكنش هيجر ورا الدنيا

الناس اما
ناس طلبوا و اتمنوا الدنيا فربنا سهلهم و وصلو لكل الي عايزينه

وناس جريت ورا الاخره تماما ورميت الدنيا

وناس ركبت الدنيا للاخره
بمعنى اخدت ددنيتها وسيله للصول للجنه طبعا
من غير تذمت ولا حرمان ولا تشدد
راعت ربنا وسعت لرضاه

ربنا يجمعنا في الجنه ويدخلنا اياها بدون حساب
يااااااارب

كل رمضان وانت لله اقرب ولطاعته ادوم

واعذري التقصير لانه بجد غصب عني او توهان مني
سلام

shirry said...

فعلا الواحد كان محتاجة حاجة زي البوست دا من زمان
كمان اسلوب عرضط الرقيق خلاني اقرأ البوست مرة واتنين

فعلا كل واحد فينا محتاج واقفة مع نفسه ويحدد موقف

ميرسي يا سوسو

بالتوفيق

عــلاء ســالـــم said...

السلام عليكم

كل عام وانتي بخير

وندعو الله تعالى أن يقربنا من الجنه وأن يبعدنا عن النار

وأن يرزقنا عملاً صالحاً يدخلنا به جنته

ونعوذ به من النار ومن كل ما يقرب منها من قولٍ أو عمل

خالص تحياتي لقلمك الذي نتعلم منه الكثير

Anonymous said...

في سؤال محيرني ايه اللي تقصديه بالدنيا هنا ؟ اي نوع من الدنيا ؟ و الى أي نوع فلسفي ينتمي كلامك ؟
و ماهو الأنا التي تتكلمين عنه تحديدا
أرجو سعة الصدر والتحديد

سلوى said...

مدحت محمد
آمين يا مدحت
دايما منور المدونه
دمت بكل الخير

********************

ELHAWARY
حمدا لله ع السلامه
نورت المدنه

دمت بكل الخير رازي
من أراد الدنيا فعليه بالقرآن، ومن أراد الآخرة فعليه بالقرآن ومن
أرادهما معا فعليه بالقرآن

***************************

سلوى said...

زُمُرده
وإنت كمان وحشاني

مش بتيجي ليه
يعني أعمل فيكي إيه الوقت :)

ربنا يخليكي يا زمرده
وشكرا على سؤالك بجد
وكل سنه وأنت طيبه
*************************

shirry
إزيك يا شيري
منوراني بجد
والحمد لله أنك وجدتي بعض الفائده في البوست
دمتى عزيزتي بكل الخير

سلوى said...

علاء سالم
كل سنه وانت طيب وبخير وصحه أنت وكل الأسره
ولك بمثل دعاءك

ربنا يتقبل منك ويوفقك لكل ما يحب ويرضى
*******************

سلوى said...

Anonymous

أولا كل سنه وانت طيب :)

في سؤال محيرني ايه اللي تقصديه بالدنيا هنا ؟ اي نوع من الدنيا ؟
و الى أي نوع فلسفي ينتمي كلامك ؟
و ماهو الأنا التي تتكلمين عنه تحديدا
أرجو سعة الصدر والتحديد

بدايه
البوست اسمه تأملات
يعني تلاقيني كده بتأمل أشياء واللي يطلع يطلع :)
لي مدونه مخصصه لكده اسمها تأملات قلب

بس كتبت البوست ده هنا
المقصود بالدنيا
يتلخص في جمله كتبتها في البوست وهي

أن لا تجعل الدنيا أكبر همك
يعني عيش واشتغل واجتهد
واطلب علم أو منصب أو مال
لأننا مخلوقين لتعمير الأرض
مش مخلوقين علشان نعتكف في المساجد مثلا ليل ونهار
أو نتعبد ليل ونهار
العمل عباده
والموؤمن القوى خير من الضعيف
والقوة تكون بالعلم والمال والشخصيه

لكن وانت بتطلب كل ده لا تجعل الدنيا أكبر همك
يعني اجري ورا العلم والمال والسلطه ولكن لا تكون عبد لهم
فأنت تطلبهم لتعمير الأرض
نيتك في طلبهم رضا الله

مش عارفه وصل قصدي ولا لأ؟؟

النقطه التانيه
كلامي لا ينتمي لأي نوع فلسفي
كما قلت سابقا البوست اسمه تأملات
فهي مجرد تأملات

النقطه التالته
ما هو الأنا
الحقيقه لم أفهم ماذا تقصد :)
أرجو التوضيح
وطبعا حضرتك شرفت المدونه
وأهلا بك أو بكِ في أي وقت
دمتم بكل الخير

منى said...

تعرفى يا سلوى الصوره اللى رسمتيها
واحد بيجرى ورا الدنيا يعد ما ضيع منه الجنه
لو حاطينها قدام عنينا ع طول
هتفرق معانا كتير
بس يعنى لو مغمضناش عشان مش نشوفها
ربنا يجعلنا من الراغبين فى الجنه بحق
تحياتى

عاشق الورد said...

سلام عليكم
فى حديث فيما معناه بيقول
اذا احب الله عبدا نادى فى السماء قال ياملائكتى انى احب عبدى فلان فاحبوه
فتحبه الملائكه
فتنادى الملائكه فى الارض
ايها الناس ان الله يحب عبده فلان فاحبوه
فيحبه الناس ويجعل الله القبول له فى الارض
صدقت ياحبيبى يارسول الله
صلى الله عليه وسلم
كده اكيد بانت الحكايه
واكيد طبعا كله بيصدق كلام الرسول صلى الله عليه وسلم
ودى اجابتى على السؤال
على فكره ياجماعه
اى حاجه محتاجين لها فى اى وقت واى حاجه بمعنى الكلمه دورا كويس حتلاقوها فى ديننا العظيم

Anonymous said...
This comment has been removed by a blog administrator.