Friday, May 2, 2008

إيشــــي خيــــال يــا نــاس

البدايه
اتصال من إل جي ...
سلوى أنا في المنصورة .. عايزين نتقابل

ثم اتصال من سلوى ( أنا يعني هههه) لكلا من
سارة أو رحيل ( وعلى ساره أن تتصل بمن تعرفه ) ومنى أحاسيس
ياجماعه الإجتماع بنانيتي .. يعني بنات بس ( علشان ننم براحتنا

تم الإتفاق على أن نتقابل .. أمس الخميس .. العاشره صباحا

وقد كـــان
كان هذا الموجز وإليكم التفاصيل

سارة أول من وصل للموقع ( ملتزمه جدا في ميعادها
ووصلت أنا ومنى ونجوى (أختى ) .. فوجدنا من بعيد فتاه جالسه
ما إن رأيناها حتى قلنا .. ساره
وما إن رأتنا حتى وقفت تستقبلنا
إيشي خياااال يا ناس ههههههههه
طبعا سلمنا على بعض ... وقلنا لها يالا .. إحنا مييين ؟؟

والغريب إنها عرفتنا ...
وقالت إنت سلوى
.. إيشي خياال يا ناس ( عرفتنى إزاي مش عارفه) بعد قليل حضرت إل جي
وبعد السلام دخلنا إحدى حدائق المنصورة
الجنينه كلها ثنائيات يا جماعه إلا عدد قليل من العائلات وإحنا خمس بنات
عمالين نلف في الشمس ومش لاقين مكان ... ليه ؟؟؟
لأن كل اتنين قاعدين في مكان ومستوليين على المساحه حواليه
وكأن هناك اتفاق ضمني غير معلن
إوعى تغلس عليا وتيجي منطقتي .. أحسن أغلس أنا كمان عليك
حقيقي كل واحد كان في حاله
ناس ذوق ..ذوق.. صراحه
ههههههههه
المهم وجدنا مظله كبيييييرة ومش فيها غير اتنين بس
قلنا بس ... هنقعد يعني هنقعد
ودخلنا فعلا وقعدنا وبدأنا نتكلم ونحكي ولا كأن في حد قاعد معنا
الثنائي فضل ساكت وخمس دقايق كده وقام
مش عارفه ليه بصراحه ... ؟؟؟؟؟
ضحكنا كتييييييييير
وإتكلمنا عن حاجات كتير
وعن التدوين
وأفضل المدونين
وعن إنطباعنا عن بعض
كان في رأي بيقول
إن مش لازم المقابله الشخصيه لأنها ممكن تصدم الواحد في الآخر

بس مع احترامي للي بيقول كده .. بقول لأ
صحيح ممكن الكلام ده ينطبق على معرفه الشات
لكن المدونه لأ
لأنها
سلسله من المواضيع ... يعني مش معقول هتحاول
تتجمل في كل موضوع تكتبه وتنجح في كل مرة
النوع اللي بيتجمل ويظهر بشكل غير شكله
إما تكون تدويناته عباره عن إقتباسات دائمه
أو يستعين بشخصيات أخرى تساعده في التدوين
لكن الشخص الطبيعي .. بيكون نفسه .. في كتاباته .. وتعاملاته
بيكون نفسه في كل مكان
مثلا
سارة في الطبيعه هي التي ستجدونها في مدونتها
وكذلك إل جي .. هي .. هي يا جماعه اللي بتكتب في مدونتها
منى بأحاسيسها .. هي هي يا جماعه اللي في مدونتها

أنا اللي بكتبه واللي بكتبه أنا

بالضبط زي الحكمه ما بتقول
تستطيع أن تخدع بعض الناس .. بعض الوقت
ولكن لن تستطيع أن تخدع كل الناس كل الوقت


شخصيتك هتظهر ... هتظهر
مهما تجملت .. وتخفيت ...

ساره ... إل جي ...
سعيده جدا جدا جدا بالتعرف عليكم
وإلى لقاء آخر في اجتماع بنانيتي ( أصلنا عنصريين يا جماعه ههههههه
نجوى أختى ومنى .. طبعا أعرفهم من زمان
ههههه
كل واحده فينا كانت عامله حسابها إن اللقاء ده كبيره ساعتين ويخلص
بس اللقاء استمر لساعااااااااااات
كان في تفاصييييل كتير حصلت
بس مش عايزة أطول عليكم
المهم
إنه كان يوم جمييييييييل جدا جدا

41 comments:

و القادم....أجمل said...

أول تعليق
بحجز مكاااااااااااااااان
:)

سلوى said...

و القادم....أجمل

مستنياااااااااااااااااااكي

ههههههههههههه

رحــــيـل said...

كده برده طيرتى منى اول تعليق
هههههههههههههههههه

فعلا ياسلوى كان يوم جميل جدا جدا
انا مش مصقه ان احنا فضلنا من عشره صباحا للساعه اربعه ونص سوا انا فعلا محستش بالوقت

انا عرفتك عشان انتى كنتى طيبه ومش راضيه تدوخينى بينكم انتوا التلاته
ههههههههههههههههه
طيب يرضى مين انى افضل محتاره فيكم
يالا يارب نتقابل تانى قريب ان شاء الله

انتى فعلا زى ماعرفتك على النت سلوى الهاديه العاقله
ربنا يكرمك يارب ويوفقك

الطائر الحزين said...

واذا اجتمعت النساء كانت النميمة غذائهن

جميل الموقف والاجمل ترتيبكم

بارك الله فيكن

و القادم....أجمل said...

هيييييييييه
أنا الاول برضوو

ربنا يسعد أوقاتكم دايما يارب
بيبأه تجمع جميل أوي
إنك تقابلي شخصية بتتناقشي معاها
و بتعرفي وجهة نظرها
حاجة ممتعه جدا
ربنا يديم المعروف

مش كنتوا تقولوا
دا بينا و بينكم مفيش فركة كعب
:D

تتعوض إن شاء الله
:)

سلوى said...

ra7eel
ساره العزيزه

فعلا كان يوم جميل
بس أنا مش رضيت إنهم يحيروكي
هههههههه

إن شاء الله نكررة
لأنى فعلا سعيده إني عرفتكم

شكرا لحسن ظنك بي
ويارب أكون كده فعلا

دمتى عزيزتي بكل خير

سلوى said...

الطائر الحزين

كده برده أيها الطائر

إحنا برده بنم ؟؟

هههههههههه

إحنا إتكلمنا عنكم بكل خير والله

واللي خلانا نتكلم عنكم إننا كنا بنعمل تاج .. طبعا ده سر
والتاج ده هتشوفوه إن شاء الله قريب
وهتعرفوا نمينا عليكم في إيه


بارك الله فيك أيها الطائر السعيد
وسعيده جدا جدا بوجودك
ده إحنا نمين عليك نم

ههههه

بضحك والله

سلوى said...

و القادم....أجمل

أهو .. مستنياكي .. ولا اتحركت

هههههههه

ربنا يسعدك ويوفقك

وإن شاء الله تكوني معنا المرة الجايه

لأنه فعلا كان لقاء جميل جدا
ونبقى شله بنات .. عنصريين

ههههههههههه

نورتيني وأسعدني مرورك

رئـــــيسـة حزب الأحلام said...

الله ياريت المدونين كلهم يشوفوا بعضهم فى مرة بجد فكره حلوة نفسى اشوف ناس كتير

عين فى الجنة said...

يعنى مافيش اى تغيير فى الصورة اللى كانت فى مخيلتك عن الاصدقاء اللى قابلتيهم؟ ضرورى فى تعديل فى الصورة السابقة المتخيلة من قبل

فرنسا هانم said...

يعنى نميتوا براحتكم
ما اجمل اللقاء بعد المعرفه فى هذا العالم الافتراضى
تحيه لكى ولكل من كان معكى
اعرف منهم ساره

فرنسا هانم said...
This comment has been removed by the author.
http://kasperb4.blogspot.com/ said...

كلامك صح يا سلوى
معرفة المدونات غير الشات خالص
باستئناء الناس اللي بقالي معاهم فترة كبيرة على الشات لأن بنكون عرفنا تقريبا كل حاجة عن بعض

لكن فعلا اصحاب المدونات اللي اعرفهم ناس محترمين جداا
وحاجة جميلة ان الواحد يقابل ناس اتعرف عليهم من النت عموما لأول مرة
احساس جميل ورائع
انا جربته مره واحدة بس
ونفسي يتكرر تاني مع ناس تانية ان شاء الله

:)

walaa said...

عاااا انا كمان ليا صخحاب من التدوين بس مش شوفت ولا واحده فييهم
قاعدين على الشات وخخلاص
انا اللى نفسى بجد اتعرف عليكم كلكم واقعد معاكم
بس ازاى كل واحده فييينا فى بلد
بس التقاليد الاسريه طبعا ممنوع البنت تخرج بره لوحدها بجد عندهم حق
يا بختكم الللهم ما لا حسد
تحياتى ولاء

سلوى said...

رئـــــيسـة حزب الأحلام

نورتيني بجد

وفعلا زي ما قلتي
اللقاء ده فكرة حلوة جدا

خصوصا لو هتقابلي ناس فعلا كويسه ومحترمه

تحياااااااتي

زيارات بقى

سلوى said...

راجى

بالنسبه لي مش بحاول إني أتخيل شكل معين

لكن بصراحه ماقولكش

لكن البعض طبعا كان حاطط مواصفات شكليه

بس حتى اللي عمل كده
ووجد الشكل مختلف وطبعا لازم يختلف

الإختلاف ده تلاشى عنده بعد ما ابتدينا نتكلم

وكل واحده ظهرت شخصيته
اللي هي معروفه من خلال التدوين
بعد بالكتير ربع ساعه
خلاص مش بتحس بأي فرق

لأن الروح دايما بتطغى على الشكل

تشجع بس واشترك في لقاء
أكيد إن شاء الله هتنبسط

سعيده بجد بتواجدك راجي
دمت بكل خير

سلوى said...

فرنسا هانم

برنسيس
نمينا عليك
جبنا سيرتك كمدونه جميله

وفعلا اللقاء كان جمييييل جدا

يا ريتك كنت معنا
وأهي البسكليته موجوده يعني مش كنتي هتاخدي وقت في الطريق

سعيده بتواجدك
دمتى بكل خير وسعاده

سلوى said...

آلام وآمال

فعلا يا محمود عندك حق

خصوصا لو بتقابل ناس محترمه

يالا تشجع واعملها تاني

سعيده بتواجدك جدا جدا
وابقى طمنى ع الهارد بتاعك وصلت معاه لفين

دمت بكل خير

سلوى said...

walaa
فين الشاي يا ست لولو

ده كلام يعني

ههههههه

شوفي يا عزيزتي

طبعا معاك حق في رغبتك إنك تتعرفي علينا أكتر
من خلال لقاء

وإحنا زيك تمام
بس إحنا جنب المنصورة وكان فيها دراستنا .. يعني مش روحنا بلد بعيد ولا حاجه
مش مصر مثلا
بس إيه ماقولكيش
على كم التليفونات من الأسره كلها
إل جي كانت بتقول
رجال الأعمال مش بيجيلهم تليفونات كده

هم طبعا عندهم حق يخافوا علينا

المهم إنت ممكن تعملي المقابله في بلدك أو بلد قريب
أنا اتفاجأت بكم المدونين اللي في بلدي بس .. يعني بلدياتي ويمكن جيرانا كمان

هههههههههه

ربنل يسعدك يا لولو يا رب
نورتيني بجد

mohand said...

المهم انبسطوا ؟

ايشي خيال يا ناس



صبحي دا كان عبقري

زى الهوا said...
This comment has been removed by the author.
زى الهوا said...

كويس انكم اتبسطتوا , وفعلا انا معاكى فى إن الواحدة إن تجملت مرة والتانية والتالتة استحالة تعرف تتجمل الرابعة لأنها هتمل بالاسلوب اللى بيناقض شخصيتها , والمدونة اصلا عبارة عن تعبير عن الذات بكل مافيها , مخنوقين يعنى وبنطلع اللى جوانا , يبقى حتى كلامنا اللى جوانا هنعبر عنه كدب وتظاهر ؟؟ , فكرتونى بيا زمان لما كنت مشتركة فى منتدى ما , وكنت اول مادخل بابا الكلية من هنا انزل نم انا وصحبتى عن كل كلمة وكل شخص فى المنتدى هههههههه

Anonymous said...

فعلا اد ايه اليوم كان ما شاء الله جمييييييييييييييييييل
حسيت ان دى مش اول مره اشوفكم وكأنى اعرفكم من زمان يارب دايما اشوفكم على خير
رحيل LGاخواتى
سلوى ومنى
وربنا يوفقكم
طبعا عرفتم انا مين

Anonymous said...

فعلا اد ايه اليوم كان ما شاء الله جمييييييييييييييييييل
حسيت ان دى مش اول مره اشوفكم وكأنى اعرفكم من زمان يارب دايما اشوفكم على خير
رحيل LGاخواتى
سلوى ومنى
وربنا يوفقكم
طبعا عرفتم انا مين

حاول تفتكرنى said...

بالطبع لم احضر اللقاء
ولم اري المنصورة إلا اربع ساعات بس فى حياتي كلها

لكني لمست فرحة لقاءكم من بين الكلمات

تحياتي

الربان said...

تحياتي

شيء جميل ان تلتقي مجموعة من المدونين
مع بعضهم...و خاصة اذا كانوا متسقين فكريا مع بعض.

الحمد لله انكن قضيتن وقتا سعيدا...

اما العاشقان اللذان فرا من هجمتكن
الشرسة علي موقعهما...فخيرها في غيرهاهههههههههه.

تحياتي و تقديري

منى said...

يااااه
ياسلوى
تعرفى انا مش كنت عايزه امشى
كنت مبسوطه اوى وكان فيه مفاجات جميله
كنت حاسه اننا محتاجين شهر كده عشان نقول اللى عايزينه

ياريت نعملها تانى قريب
ويبقى العدد اكبر المره الجايه
شفتى النيل يا لولو
هههههههههه

سلوى said...

mohand

فعلا يا مهند
الحمد لله إنبسطنا جدا

شكرا لمرورك

وفعلا محمد صبحي محترم و عبقري
جمله وعباراته لسه بتتردد

سلوى said...

زى الهوا
أولا شرفتي المدونه
زيارات بقى
ثانيا

فعلا إنبسطنا

وحقيقي مفيش حد يقدر يخدع الناس طول الوقت

سعيده بمرورك

سلوى said...

Anonymous

نوجا طبعا

فعلا كان يوم جميل وغن شاء الله نكرره

زيارات بقى

سلوى said...

حاول تفتكرنى

سعيده بتواجدك فعلا

حضرتك بقيت من أهل المدونه

وسعيده إني قدرت أوصل ما شعرنا به إليكم

دمت بكل خير

تحياااااااتي

سلوى said...

الربان

والله تواجد حضرتك بيسعدني جدا جدا

وبعدين

إحنا برده هجماتنا كانت شرسه

دا إحنا طيبين خااااااااالص

ههههههههههههه

نورتني بجد

تحيااااااااااتي

سلوى said...

منى

شفت النيل طبعا

وفعلا كان في مفاجآت حلوة

نتقابل قريب إن شاء الله

دمتى بكل خير يا لولو

khobayb said...

ألف مبروك اللقاء الجميل ..

كم هو جميل أن ننزل بالمعرفة من العالم الالكتروني إلى العالم الحقيقي

---

دمتم بخير

Anonymous said...

عزيزتى سلوى

دعوت لك فى الكعبة أن يصلح الله كل شأنك .. ويرزقك الرزق الواسع والصحة والعافية ( طبعا الرزق طبقا للى عايزه كل واحد ..فلوس .. عريس .. جاه .. كله رزق) .. وبأن يحفظك الله من كل شرّ

اللهم تقبل دعائى

سلوى said...

خبيب

أولا بوستك الأخير جمييييييل

ثانيا فعلا

شئ جميل إنك تقابل ناس من العالم الإفتراضي


دمت بكل خير

سلوى said...

Sherif

حمدا لله ع السلامه

مش عارفه أقولك إيه

إنك تفتكرني هناك وتدعي لي
ده مقدرش أوازيه بالكلمات ولا الشكر

شكرا جدا جدا

جزيت كل الخير
وتقبل الله منك ... وإن شاء الله المرة الجايه تكون حج

بجد مش عارفه أقول إيه
دمت بكل الخير ورزقت كل الخير

ammola said...

ازيك يا سلوى ..والله وحشتينى
البوست ده أنا حاسة فيه بفرحة كده وسعادة خلونى أنا كمان أبقى سعيدة وربنا يجمعكم دايما فى الفرح ويديم محبتكم ومحبتنا برضة حتى لو ما اتقابلناش
:)

سلوى said...

ammola

إزيك يا أمولتي

إنت كمان وحشاني

ربنا يديم الود بينا جميعا إن شاء الله

سعيد بمرورك جدا جدا

L.G. said...

دايما سابقة كده مركبة عجل جريتي على المدونة بس مقلتيش كتير اكتبي أكتر وطبعا عرفتك يا نجوي
وياريت المرة الجاية التجمع يزيد متقلقوش يا جماعة الجنينة واسعة

سلوى said...

L.G.

كنت عايزة أتكلم عن الغله

بس مش رديت .. أحسن تزعلي

عموما كملي إنتي

دمتى بكل خير عزيزتي