Friday, November 9, 2007

رســــــالة إلــــى.... ؟


مش عارفه يا جماعه ..خير اللهم اجعله خير
صحيت مبسوطه حبتين ..ههههههه
فقلت لازم أشرككم معايا
وكمان سمعت الأغنيه دي ... قلت كده عال أوى
لازم أنقل لكم كلماتها
والكلمات دي إهداء خاص .. لمين ؟؟.. لكل واحد أو واحده هو عارف نفسه أو عارفه نفسها
عشنا أد إيه ؟
حنعيش وقتنا .. ونسيب حزننا .. مش هنضيع عمرنا ببلاش
عشنا أد إيه باقي أد إيه ؟ يبقى بس ليه نشغل بالنا
عشنا أد إيه باقي أد إيه ؟ يبقى بس ليه نشغل بالنا
حبيتها ولا ماحبتهاش .
.حلوه الدنيا ولازم تتعاش
ما كفايه زمان .. ضيعت زمان
تحلم بالجنه ولا تطولهاش بص لأدام .. عيش الأحلام
يا ما غيرك طال عمره ولا عاش
عشنا أد إيه .. باقي أد إيه يبقى بس ليه نشغل بالنا
حبيتها ولا ما حبيتهاش
حلوة الدنيا ولازم تتعاش
عشنا أد إيه باقي أد إيه ؟ يبقى بس ليه نشغل بالنا
عشنا أد إيه باقي أد إيه ؟ يبقى بس ليه نشغل بالنا
حبيتها ولا ماحبتهاش .
.حلوه الدنيا ولازم تتعاش
يا سلوى إيه الفكرة ؟ طيب إيه المغزى ؟
الفكرة إننا عايشين في الدنيا دي ... برضانا أو غصب عنا
كل واحد عنده مشاكل .. أو صعاب .. هي كلها إبتلاءات ..
وكل واحد متصور إن مشكلته هي نهايه الدنيا
والأخطر لو وصل لفكرة إن ربنا مش بيحبه وبيعاقبه
الفكرة دي لوحدها تهدم أي إنسان
وللشخص ده أقول
مين قال كده
ربنا بيحبك .. وبيحبك جدا
بس ربنا بيمتحن اللي بيحبه
ويشوفه هيقدر يستحمل لحد فين
وكن على يقين إن ربنا مش هيحملك أكتر من طاقتك
بس إنت خليك أد الإختبار .. علشان تخرج منه بنجاح
وبعدين هو في حد .. بيختار نصيبه أو رزقه
كل شئ بأمر الله
إحنا بس نحمد ربنا
وندخل في الدنيا كده بقلب جامد
ويا إحنا لا هي
إنت بس إعمل اللي عليك .. وسيب الباقي على ربنا
ولا شئ يضيع عند الله
فإن لم تحصل على الصواب في الدنيا .. إذا فموعدنا الآخرة
فلا تقلق
الأغنيه بتقول
يا ما غيرك طال عمره ولا عاش
وساعات بندعي ونقول
ربنا يديلك طوله العمر
هو طول العمر بالسنين ؟
لأ طبعا
العمر بيطول بصاحبه بما ترك خلفه من أعمال .. أو صدقات .. أو زريه صالحه
فتبقى سيرته في الدنيا بالخير إلى ما شاء الله
فالنحاول أن نكون ذلك الشخص
إرمي حمولك على الله
ولا شئ في الدنيا يستحق
بس هنعيش فيها .. غصب عن الدنيا هنعيش فيها
ونحاول نخرج منها منتصرين
وحاصلين على أجمل شئ
وهو رضا الله
سمعني الأغنيه من تاني بقى

40 comments:

مدحت محمد said...

ربنا يزيدك ياسلوى
فعلا احلى حاجة
نرمى حمولنا على ربنا
حسبى الله ونعم الوكيل
افضل كلمة
بتريح اوى
وانى فعلا الانسان مش بطول عمره
الانسان بالانجازات اللى حققها
واللى هتخلد اسمه
كتير من الصحابة
كان عمرهم قصير جدا
بس لو بصينا للحقيقة هنلاقيهم انهم لسة عايشين بذكرهم لحد دلوقتى
وفعلا
طول مالانسان عايش فى حياته باامنية
وهى اغلى امنية رضا الله
عمره ماهيبقى حزين
او مهموم
اللهم انى اسالك رضاك والجنة واعوذ بك من سخطك والنار
ربنا يكرمك

رحــــيـل said...

سلوى بجد ربنا يكرمك
دايما بتخدينا معاكى لاحساس حلو قوى
الاحساس بالرضا نعمة
مفيش حاجه فعلا تستاهل ان الواحد يحزن عشانها
كل حاجه بتمر وكل لحظه حزن بتنتهى
ربنا يسعدك كمان وكمان
تحياتى ليكى واحترامى

سلوى said...

doha
ربنا يبارك فيك
ويكرمك

شرفت المدونه بجد
وأسعدني تواجدك

تحياااااااتي

سلوى said...

ra7eel
دايما منورة يا لولو
بتواجدك وتعليقاتك

ربنا يبارك فيك

ويسعدك أكتر وأكتر

تحياااتي

Ahmed Al-Sabbagh said...

شكرا شكرا

وربنا يفرحك اكتر واكتر

وشكرا على كلمات الاغنية الجميلة


تحياتى

الباحث عن الحقيقة said...

حاضر اسمعك الاغنية تانى
حبيتها ولا ماحبيتهاش
حلوه الدنيا ولازم تنعاش

روحى يا سلوى يابنت ام سلوى ربنا يسعدك وينور طريقك ويجعل فى كل خطوه سلامه وحسنه قليلة تمنع بلاوى كتيره هنيالك يا فاعل الخير

http://kasperb4.blogspot.com/ said...

رسالة صادقة وجميلة
تسلم ايدك وربنا يصلح احوالنا

Soooo said...

يارب تفضلي دايما منشرحه للحياه كده
ويارب الناس كلها تعيش مبسوطه وسعيده
ويارب يوفقنا جميعا في كل مايحب ويرضى




سلامووووووووووز

سلوى said...

Ahmed Al-Sabbagh

وأنا أشكرك جدا
على هذا التواجد الطيب
وأرجوا أن لا يكون الأخير

سلوى said...

الباحث عن الحقيقة

والله ضحكتني بجد

طيب روح يا احمد يا ابن أم احمد
ربنا يفرحك أكتر ويوفقك
وينور طريقك

وشكلنا كده قاعدين على باب السيدة
هههههههههه
منور أخي بتواجدك وتعليقك

تحيااااتي

سلوى said...

آلام وآمال
تسلم على تواجدك
وربنا يصلح أحوالنا جميعا

تخيااااتي

سلوى said...

Soooo
أشكرك والله ع الدعاء الحلو ده

ويارب ربنا يصلح أحوالنا جميعا ويسعدنا دائما يكل ما يحب ويرضى

منور بتواجدك سوووووووو

وطبعا السلام السلاموزى
سلامووووز

mohand said...

السلام عليكم

ربنا يبارك في عمرك

اللهم امين


وعشنا اد ايه
اهو اللي جاي احلي

منى said...

يا رب يسعدك يا لولو كمان وكمان وبمناسبه انك مبسوطه ممكن اطلب حاجه من غير مترمى حاجه فى وشى
سلوى ما تيجى نطلع رحله؟

محمد جمعه said...

بسم الله أبدأ
فعلا صدقت يا حبيبى يارسول الله بقولك الخير فى وفى أمتى الى يوم الدين

سلوى said...

mohand
ويبارك فيك ربي ويوفقك
دوما
اللهم آمين

نورت المدونه أخي الكريم

تحيااااتي

سلوى said...

بقى كده يا منى
طيب أنا لا حدف فيك حاجه ولا أي شئ
وتعالى ياستي نطلع
بس بشرط
نأخذ منى معنا
ههههههههه

سلوى said...

محمد جمعه
سعدت بتواجدك أخي الكريم

وسعدت جدا بتعليقك
شرفت المدونه أخي

تحيااااتي

kikooooooooo said...

بوست جميل وبيريح أي حد بيقراه
لأن فلا الحياة من حوالينا مليانة مشاكل ومتاعب ولو عقدنا نفسنا وفضلنا نفكر كتير مش هنستريح طول عمرنا
أنا اليومين دول حقيقة بدور علي بوستات فيها أمل واللي فيها تشاؤم ببعد عنها لأني مش ناقص
أنا برضه كاتب بوست مشابه لده عندي
مستني زيارتك
كان معكم ..,
كيكووووووو

klmat said...

سوسو
زى ماعودتينا دايما
مواضيعك جاده وجميله فى نفس الوقت
وبتدى امل
ربنا يزيدك علم
وتسعديناوتفيدينا
ربنا يكرمك
تحياتى لك

محمد جمعه said...

انا جيت المدونة عشان اشوف جديد
فقرأت الموضوع تانى فأجبنى جدا
بارك الله فيكى

ومتحرمنيش من زيارة للمدونه
مش أحلم انا بالحرية
وانتى تعملى لها طوق

دا هزار طبعا
تحياااااتى

على باب الله said...

بوست جميل فعلاً

و مليان تفاؤل

--

خالص تحياتي

الطائر الحزين said...

كله على الله

ربنا يكرمك

سلوى said...

kikotalaat

شرفت بزيارتك أخي
وسعيده إنك وجدت في البوست شئ يسعدك
وصدقني لا شئ يستحق

تحياااااااتي

سلوى said...

klmat
هقول إيه
دايما منوراني

ربنا يوفقك

تحياااااتي

سلوى said...

محمد جمعه

منور أخي في أي وقت وكل وقت

وبعدين الطوق
قد يكون للنجاه
وقد يكون قيد

وبين هذا وذاك تتأرجح الحريه

والله سعيده بتواجدك

تحياااااااتي

سلوى said...

على باب الله

أولا أحييك على مدونتك

ثانيا شرفت بزيارتك
التي أرجو أن لا تكون الأخيرة

تحياااااتي

سلوى said...

الطائر الحزين
وربنا يكرمك أخي

فعلا كله علي الله

بارك الله فيك
أسعدتني بزيارتك

تحياااااااتي

Mo3Az said...

ماشاء الله فكرة البوست جميلة

ربنا يتقبل

فعلا لو رمينا همومنا على ربنا هانستريح كتيييير

نعمل بس اللى علينا ونسيب الباقى على ربنا هو ارحم بينا من نفسنا

جزاكم الله خير على الكلمات الطيبات

سلوى said...

Mo3Az

شرفت بزيارتك أخي

وأسعدني تعليقك
جزيت كل الخير

خالص تحياااتي

MKSARAT - SAYED SAAD said...

الانسان بدون امل لا يقدر على المقاومة
ضد تداعيات الحياة
بوست جميل يحمل معاني احيانا يغفل عنها كثيرون
تحياتي

سلوى said...

MKSARAT SAYED SAAD

شرفت مدونتي أخي

وأسعدني تعليقك

نورت بزيارتك وأرجو أن لا تكون الأخيرة

شمعى أسعد said...

ازيك يا سلوى

اشكرك على زيارتك ليا

وبعتذر عن تأخيرى فى الرد

وقلت ارد الزيارة

على فكرة مدونتك حلوة قوى

وعالم الكمبيوتر كمان هايلة

Fantasia said...

3azeezty salwa,
ashkorek 3ala tashreef modawanty b elzyarah. ana shoft kol el 3 blogat btoo3ek, bas 7abeet aseeb ta3lee2y hena. awalan 3alashan esm elmodawanah 3agabny awi, thanyan 3alashan elpost elgameel dah. b7eb awi da3wet elnas leltafa2ol w eltamasok b7ob el7ayah. t7yah laky mn elqalb. atmna laki dawam eltawfeeq.

سلوى said...

شمعى أسعد

سعدت بتواجدك مهندس شمعي

بجد نورت المدونه

صار لك مده لا تزورها

المهم

أرجو أن تكون الزيارة دائمه

خالص تحيااااااتي

سلوى said...

Fantasia

عزيزتي
بجد نورتي المدونه
وأحب أحييك على مدونتك
ما شاء الله

سعدت بزيارتك
وإن شاء الله تكون حياتك كلها تفاؤل


خالص تحياااتي

عليوه said...

ياسلام يا سلوى الكلام حلو اوى وجميل ومقنع بس المشكله فى التنفيذ احنا مهما كان بشر وساعات الاختبارات بتكون صعبه جدا وانا عن نفسى ببقى مش قادر اتحملها بس بفتكر (فما بين غمضه عين وانفراجتها يغير الله من حال الى حال )
وبحاول افتكر اجر الصابرين عند ربنا وبقول لنفس اكيد ربنا هيعوضنى خير وده منايا ونقول يارب

سلوى said...

عليوه

شرفت المدونه أخي الفاضل

وطبعا كلنا بشر
يعني لسنا دائما مبتسمين للحياه

ولكن أنت قلت شئ ينطبق مع ما أقول
وهو

بس بفتكر (فما بين غمضه عين وانفراجتها يغير الله من حال الى حال )
وبحاول افتكر اجر الصابرين عند ربنا وبقول لنفس اكيد ربنا هيعوضنى خير وده منايا ونقول يارب

وهو ده اللي عايزين نوصل له

بجد أسعدتني زيارتك
وأرجو أن تتكرر

خالص تحياااااااتي

عــلاء ســالـــم said...

السلام عليكم

تشرفت بزيارة مدونتك وعجبتني جداً
وبالنسبه لموضوع البوست فمعاكي حف فعلا
الإنسان لازم يعيش الدنيا زي ما هي وماييأسش من رحمة ربنا

سلوى said...

alaa salim

تشرفت بزيارتك أخي

وأرجوا أن لا تكون الأخيرة

وأحييك على مدوناتك أيضا

خالص تحياتي