Saturday, March 7, 2009

إلحق ..قدم وإملا إستماره





قابلتها في مقر عملي
نظرت لي وكأنها تعرفني وسألتني مباشرة؟؟
إتخطبتي ؟؟
أنا : ( بيني ويين نفسي) ..يا فتاح ياعليم يا رزاق يا كريم .. مش هنخلص من السؤال ده
لا .. لسه
هي : طيب ليه ماقدمتيش؟؟
أنا : ( فوجئت أو ما فهمتش مش عارفه ) .. يعني إيه أقدم؟
هي : تقدمي على موقع ع النت للزواج
أنا ( يا سلااااام .. هو ده كمان بالتقديم ونملا استمارة وكده .. .. ( بيني وبين نفسي طبعا)
لا والله ما قدمتش
هي : ليه ؟ في ناس كتير بتقدم .. دا أنا أعرف فلانه وفلانه وقريبتي فلانه إتجوزوا بالطريقه دي


..و أنا جاني 100 عريس
أنا : 100 عريس يا ماشاء الله .. واتخطبتي ولا إيه ؟
هي : لأ .. مفيش نصيب .. أغلبهم بيكدبوا
أنا : يا سبحان الله .. هو النصيب
هي .. إنت لازم تقدمي وإلا هقدم لك أنا
أنا : .. لا لا شكرا ربنا يخليكي..
هي : ليه ؟
أنا : علشان ده نصيب .. ونصيبك المكتوب لك هيجي لحد عندك
إنتهى الحوار معها
لكنه يبدأ معكم :)
هو أنا خياليه صحيح ؟ أو أفكاري عفا عليها الزمن ؟
لما أقول إن البنات ربنا كرمها والرسول عليه الصلاة والسلام سماهم القوارير
يبقى لازم تحافظ على ده
أبقى خياليه؟
لما يقيني إن اللي ربنا كاتبه للإنسان هيكون
وما أصابك ما كان ليخطأك
أبقى عايشه في زمن تاني؟
سألت إل جي
وسألت صفاء كناري
عن رأيهم في التقديم .. أهي فرصه بقى :))
قالولي بلا كلام فاضى :)
أصحابي بقى :)) والمرأ على دين خليله
بس قلت أسألكم برضه
إيه رأيكم في النوع ده من الزواااااااج؟؟؟
وتقبل تقدم ؟:)

18 comments:

صفــــاء said...

.
حبيبى الجواز بالذات رزق غريب جدا
يختلف عن أى رزق فى الدنيا
الجواز دة هو نصف بيقسم لنصف بمنتهى التوافق
رزق مينفعش يتاخد أطلاقا بأى طريقه لو مش مقسوم لك
وتخيلى بقى انك ممكن ترتبطى فعلا بزوج لكن ولأنه مش قسمتك ومش رزقك أستحاله يحصل اى تقارب بينكم وكأنه تحريم
فــ رزق السكن والمودة والرحمه والتواصل والتقارب هو أكثر أنواع الرزق غرابه ميجيش بأى طريقه ألا الطريقه المقسوم بيها
وطبعا كل الطرق والمحاولات للحصول على النصف الاخر مقبوله ومتوافق عليها الا ان تكون بطريق مجهوله او انها توقعك فى واحد كداب او نصاب او قليل الدين او او او ... مش المفروض نتعامل مع الموضوع دة بالذات بأى أستهانه او تفريط . طولت انا عارفه

موناليزا said...

:) حساه كده زى مايكون عرض وطلب يعنى اللى عنده بضاعة بيقول عليها واللى عايز يشترى برضه بيقول امكانياته
هو شكله جواز عقلانى بحت بس ده لو الموضوع كان صادق تماما وخالى من الكذب

ورأيى الخاص لا طبعا مش هقدم
لان بكل بساطة ماكان لك سوف يؤتيك
وانا مكتوباله وهو مكتوبلى من قبل مانتولد فخلاص هنشغل نفسنا ليه بحاجة مفروغ منها

رزقنى الله واياكى بالزوج الصالح قريبا ان شاء الله:)

دعاء العطار said...

تعرفى ياسلوى

سبحان الله فيه واحده قريبتى لسه مكلمانى فى الموضوع ده

بتقولى ال اييييييييييه

ان بنت خالها بعتتلها فايل

فبصتلها باستغراب جدا

يعنى ايه فايل ؟

قالتلى يعنى كتبت مواصفاتى وكده فى عريس وعروسه

انا من الدهشه ماقدرتش اتكلم

لان الكلام عمره ماكان هيعبر عن اللى جوايا

لاء وايه كتبت فى الفايل ده رقم موبايلها كمان

وتانى يوم حد بعتلها مسج يقولها ع ظروفه

:::::::::::::::::::::

بجد مش عارفه البنات بتعمل كده ليه ؟؟

هو تهريج ياجماعه ؟

ده جووووووووواز

ومن صحت بدايته صحت نهايته

ياسيتى لو افكارنا دى خياليه وراجعيه

فيامرحبا بالرجعيه لو كل التقدم كده

dodo said...

فعلا الموضوع انتشر جدا بس هل البنات اللى بيقدمه بيحترمو انفسهم طيب لو جالها الطرف الاخر ها يحترمها يعنى يعاملها زيها زى البنت اللى يروح لها البيت ويطلب ايديها ويا توافق او ترفض يا جماعه هما مش عارفين ان الحياء شعبه من شعب الايمان

وعن نفسى طبعا استحاله وعلى يقين ان رزقى هايجى لحد عندى تحياتى ليكى

Anonymous said...

سلوى العزيزة

النت فى وقتنا الحالى هى بديلة الخاطبة زمان

صورة .. ومعلومات .. مدى صحة المعلومات يعتمد على معطى المعلومات نفسه وبياناته

لكننا لازلنا نرفض طريقة الاتصال الحديثة .. والذى هو ليس جادا سيظل هكذا حتى لو اتى البيوت من ابوابها

هناك نقطة اخرى هامة جدا .. التعارف مهم جدا قبل القدوم على اى خطوة .. وانا افضل ان يكون فى مكان عام قبل ان يتقدم الشاب لأهل البنت .. فتكون قد وقف ت على امكانياته وهو كذلك .. وقبل كل شئ يكون القبول من الطرفين قد اتضح .. وهكذا نصف الطريق الى النجاح

نحن نقبل صداقة افتراضية على النت تتحول فى اغلب الاجيان الى حقيقية ولقاءات

فلماذا نتحرج فى التعرف بغرض الارتباط؟

هذه هى وسائلنا الحديثة التى يتحيها ربنا فلماذا نصر على العيش خارج العصر

يقول المولى " ولكن لاتواعدوهن سرا الا ان يكون قولا معروفا" فهل هناك ما يشين؟

اطيب التمنيات لك

Anonymous said...

أنا أحد المعارضين بشدة لمثل هذه المواقع

الأخت الفاضلة، هذه المواقع تعرض البنت العربية الشرقية كبضاعه قابلة للعرض والطلب والقبول والرفض والتمحيص مثلها مثل كتاب أشاهده على أمازون قد يعجبني غلافه لكني لو قرأت تفاصيل الكتاب فربما أبغضه

نعم كان هناك (خاطبة) ولكن كانت البنت بالنسبة للعريس سلعة لها ثمنها ومجرد الذهاب الى بيتها يعني الكثير من التفكير والاستعداد والتجروء على لبس عباءة الرجولة والارتباط، أما أن أختار عروسة من على الانترنت وأنا أدخن سيجارة وأطالع عدد لا بأس به من الملفات وكأني أختار كتاب أو أختار برنامج للداونلوود فهذا أمر ينافي كل الأعراف التي تربت عليها أجيالنا العربية الشرقية المحافظة

وبعد كل هذا نعود ونترحم على الأيام الماضية ونقول أين عاداتنا وتقاليدنا؟

هذه ليست رجعية أو (دقة قديمة) بقدر ما هو اعتزاز بمقدار المرأة وحفظا لقدرها وثمنها، وتمسكا بدين الاسلام الذي حفظها وقدرها في كل موضع ومقال.

أشكرك على طرح هذه القضية الهامة جدا، وأعتذر على على الاطالة

Unknown said...

باختصار شديد
وللاسف
هذه المواقع ليست للتقديم للزواج
ولكنها حيلة خبيثة لتقديم انواع اخرى من الشات والتعارف بين الجنسين
وابتدع هذا الموضوع المجلات النسائية
ولكنها كانت في صورة اكثر احتراما ولو كانت غير صحيحه
لكن العولمة الشبكية على النت لا تسمح بوجود حواجز ولا أسوار

كان الله في عون شبابنا
كان الله في عوننا

عين فى الجنة said...

موش موافق
مافيش احسن من ماما وبابا فى الموضوع ده

سلوى said...

صفـــــاء

هو فعلا رزق غريب جدا زي ما قلتي

ورزقك اللي ربنا كاتبه هيجيلك هيجيلك
ومفيش مخلوق هياخده منك

:)
منوراني صفوء

سلوى said...

موناليزا

هو فعلا جواز عقلاني
بالورقه والقلم

جميله دعوتك :)

ربنا يرزق بنات المسلمين جميعا بالأزواج الصالحه

سلوى said...

dodoo

أيوة بتكتب الموبايل وكل شئ

يالا خليكي زينا
يا دقه قديمه
يا رجعيه :)

نورتيني دودوو
ربنا يحفظك حبيبتي

سلوى said...

dodo

أهلا دودو إزيك

أنا والله قلت اللي قلتيه ده

هل يا تري هيحترمها بعد كده

صحيحي العقول بتتفاوت وفي استثناءات
بس أحنا بنتكلم عن السواد الأعظم


يالا تعالي إقعدي جنبنا :)
مع الدقه القديمه :))

سلوى said...

Sherif

الخطبه
كانت عارفه كل بيت بتدخله
وعارفه كل واحد بتحاول تجوزه

كانوا ناس بتتكلم جد
وهيدخلوا البيوت من أبوابها

لكن النت والمواقع دي
نسبه الصدق فيها كام ؟
ونسبه اللي داخل يتسلي كام ؟

طبعا إختلاف الرأي لا يفسد للمدونين قضيه
:)

سلوى said...

مدونة الكومي
بص
هرد في كلمتين

الله عليك

وطبعا مفيش إطاله ولا حاجه
رأيك وتعليقك يمكن يفيد ناس كتير هتقرا الموضوع
ويمكن تكون بتفكر تقدم :)

سلوى said...

أنا إنسان

فعلا الأغلبيه بتدخل المواقع دي
للغرض ده

وفي ناس بتكون جاده بس بتتعب كتير

حضرتك شرفتني
وأسعدني تعليقك
دمت بكل الخير

سلوى said...

راجى
وأنا مع حضرتك طبعا :)

life said...

انا شايفة ياسولى أن المواقع مجرد وسيلة تعارف جديدة لا أكثرولن تكون الخطبة الالكترونية بديل عن الخطبة بتاعت زمان
لان خطبة زمان كانت بتدخل كل بيت وعارفة كل واحد فيه وبالتالى كانت معلوماتها دقيقة
أما الخطبة الالكترونية فتعتمد على معلومات قد يكون نصفها مزيف
وبغض النظر عن ذلك ففى احد المرات زرت تلك المواقع ويبدو أن أغلب من فيها يمزح فهناك أسماء اباحية وايضاً صور لفتيات لا يتعدون العشرون فالبتأكيد هى مواقع ليست جدية
وفوق ذلك الزواج قسمة ونصيب ورزق من ربنا
لذا لا تعيري صديقتك انتباه
فلو كان الموضوع بتلك السهولة لم يكون هناك نسبة عوانس كبيرة فى مصر

صدفة جميلة said...

السلام عليكم ورحمة الله وبركاته
مش عارف ابدء منين وياترى هاتشوفى تعليقى ولا لا
المهم مش عيب ان الانسان يحمى نفسه ومش عيب انه يسعى مش بقولك انك ترمى نفسك على صفحات النت وما اكثر الكذب والخداع ولكن اقول لكى انتى عاوزة تتجوزى سؤال جوبى عليه بينك وبين نفسك وصدقينى لو كنتى عاوزة بجد هاتتجوزى ادعى ربنا كمان عمرك ماهتلاقى فتى احلامك كما فى كتالوج فكرك يجب ان يكون فيه بعض التنازولات ليس على حسابك ولكن اه سبب العنوزة فى مصر العمليه صارت بيع اجساد الدين الاسلامى حرر المراءة والان المرءة ترجع بيدها لسوق الرق والبيع والشرء وانتى تعلمى ما اقصد صدقينى هناك شباب كتيره نفسها تعف نفسها بس للاسف المتطلبات الذائده تقف عائق يمنعهم فهل تبدئى انتى بهدم تلك الموانع انظرى حولك ستجدى قلب يخفق ويسعد لرؤياكى معاكى الموضوع دا نصيب وقدر وكل واحده ليها نصيب بس مش عيب الدنيا صارت زحمه والمشاغل ياما يعنى مثلا انا بالنسبه ليه اشتغل فى شركة بترول اسبوعين واسبوعين اجازة الاسبوعين الاجازة بيطيروا يمكن بخرج قليل فيه صراع مش عيب انك تبحثى عن زوج وصدقينى هاتلاقيه