Saturday, March 7, 2009

تاج الطفوله




صنعت تاج .. وأهدته لي .. ووعدتها إنه عندما يعود الطوق
سيكون التاج
وها هو تاج الطفوله من رفقتي الطيبه
رفقه عمر

تاج الطفوله

تخيلوا يا جماعه أنا كنت طفله :))

كانت أيــــــام
كنت أجمع بين حاجتين شقاوة وخجل
إزاي مش عارفه :)
كنت بلعب كتير جدا .. كنت محترفه نط الحبل بلا منافس أو منازع

أحكيلكم بقى
كانت أيام حلوة
أكتر شئ بارز في ذاكرتي هو المولد
أيون كان في المنطقه شيخ بيعمل مولد لجده الكبير ذو الكرامات كل سنه

والناس تيجي من كل مكان .. وتنصب الخيام
كان كل شارع فيه خيمه والخيمه فيها أسرة
وأجمل شئ في المولد هو الليل
يبتدي الذكر والمدح وفي الخيمه اللي هناك في شيخ بيتكلم عن الصحابه
والبياعين هنا وهناك .. غوايش .. اكسسوارات ..
ترمس وحمص ولب وكل شئ
وأنا وصحباتي بنجري هنا وهناك نسمع لده
ونشتري من ده
والمغرب كل واحد على بيته ونكمل فرجه من الشباك أو البلكونات
وساعات كانوا ينصبوا سينما في الشارع يعرضوا فيها أفلام دينيه
وكان أخويا ياخدني ويفرجني
ماهو معندناش بنات تروح سينما لوحدها
:))
كان جو جميل جدا .. مش بنساه
وأفتكر إن الجو ده أثر فيا
نحكي إيه كمان .. أيوه .. الكرتون
فعلا يا جماعه التعليم في الصغر كالنقش على الحجر
اللي بنتعلمه في الصغر بيفضل محفور جوانا
أفلام الكارتون كان لها معنى كنت بحب النحله زينه جدا والسندباد

أقولكم تعالوا أحكي لكم حدوته شفتها كارتون زمان
بس لسه فاكراها :)
كان في 3 كتاكيت
كانت صاحبتهم حطاهم في عشه صغيره وكل يوم تجهز لهم الأكل وتنظف العشه
والكتاكيت كل اللي بتعمله إنها بتلعب وتتنطط وبس
ما عدا كتكوت منهم كان رافض الكسل ده
وفي يوم صاحبتهم ماجتش ولا جهزت أكلهم
الكتكوت قال .. هتفضلوا كده لإمتى
قالوا له أتفضل أنت إعمل اللي انت عايزة
ورينا هتعمل إيه

المهم الكتكوت صمم .. خرج
خرج للدنيا .. وفي رحلته شاف حيوانات وحشرات كتير
كان كل لما يشوف حاجه يخاف
لكن كل حشرة أو حيوان يقابله كان بيعرفه بنفسه
وكان بيعلمه شئ وينصحه بشئ في شكل أغنيه
مثلا الدوده .. أيون هو قابل دوده
كانت بتقوله
أنا دوده دوده .. خيوطي ممدوده .. وروحي مفروده وبفرز أز
أزه وأزه وشغلتي لذه وأهز الهزة الهوى يتقز
شفتوا لسه فاكراها :)
الكتكوت عرف وشاف كتير وكان كل ما يعرف حاجه يغني
يا حلولي يا حلولي حلولي حلولي حلولي ده ايه ده اللي بيحصل لي كل مابملا في عقلي بكبر
بكبر سنتي وملي

ولما خلص رحلته رجع
رجع الكتكوت الي العشة ووجد العنكبوت ملأها والكتاكيت في حالة مرضية شديده

وحدثهم عما وجده في رحلته
وأنهم يجب أن يتغيروا ويقوموا بعمل أشياء نافعه
من الكتاكيت من تغير بالفعل
ومنهم من بقى ومات على حاله

وتوته توته خلصت الحدوته

***************
أحكيلكم إيه تاني؟؟
كفايه حكايات .. أحسن أنا اتكلمت كتير :))

ندي التاج ده لمين .. يالا مش هو شغل عيال
هديه لكل اللي يحب يتكلم عن طفولته
وأهديه لناس عرفتهم من خلال التدوين وأحب أعرف طفولتهم
إل جي .. ساره(رحيل ) .. منى (أحاسيس) .. صفاء (عصفور في الأسر)
مروة .. موناليزا .. تمرحنه .. زمرده ..
ومن المدونين
أستاذ راجي .. أستاذ شريف .. الكومي .. جنى .. عمر الطحان

حاول تفتكرني .. الربان

22 comments:

صفــــاء said...

.
وحياة النبى ما هرد يا سلوى
طفوله ايه اللى عاوزانى احكيها دى ؟
دى كانت حاجه أشبه ما تكون بالتشرد
احكى اقول ايه يعنى
اتكلى على الله يا سلوى وشوفى حد غيرى تورطيه الورطه دى بلاش فضايح
والبرنامج دة مكنش كارتون دة كان عرايس وكان بيجي فى سينماالاطفال يوم الجمعه
.

رحــــيـل said...

هههه ايه الكتكوت العفريت ده
عثوووول خالص

المشكله انى لو حكيت طفولتى فيها فضايح اان كنت شيطانه وانا صغيره
هههههههه
بس هحاول اوعدك بجد

موناليزا said...

:) نخيلى انى فاكرة المقطع ده بس
"ياحلولى ياحلولى ده ايه ده اللى بيحصلى"
ومش فاكرة اى حاجة خالص من اللى انتى قلتيها غير المقطع ده

طفولتى ياستى مش هعرف اوصفها بس كنت على ما اظن يعنى هادية اوى ومؤدبة اوى( اللى هو زيادة عن الطبيعى يعنى):)
فاكرة انى كنت بحب الكارتون جدا وخاصة"اليس فى بلاد العجائب" كان بييجى وانا فى اولى ابتدائى
ودنيا الاطفال ده كل يوم وماما نجوى وبقلظ ومازنجر وميكى ماوس وبطوط وتوم جيرى وكعبول والكابتن ماجد وبوجى وطمطم وعمو فؤاد وفوازير رمضان وسلاحف النينجا وباوررينجيرس .... ده اللى فاكراه:)
كنت بحب التلوين جدا واعمل اشكال فنية بالورق والقص واللزق
والقراءة بقى ماقولكيش كان إدمان من اول ميكى لغاية رجل المستحيل:)
ياااه كانت ايام
متهيألى انا كده طولت اوى:) بس انتى اللى طلبتى
وانتى عارفة طلباتك اوامر
اى خدمة ياسلوتى:)

ملحوظة:حاسة انى كتبت حاجات اكتر من اللى انتى كتبتيها وعشان كده عايزين الموضوع يبقى له جزء تانى:)

حاسوباتيه said...

انتي عسوله خالص تعرفي انا نفسي اروح مولد عمري ماروحت بسمع عنهم بس نفسي اروح بجد

وحلوه قوي قوي الحدوته دي حدوته قبل النوم اقوم انام بقى هههههههه

بوست جميل تحياتي ليكي

الميكروباص said...

كانت ايام جميله
كان الواحد على كفوف الراحه
بعيد عنك من اول ما اتخرجت من الجامعه بأت آخد على دماغي
لو عاوزه تشوفي طفولتي البريئه ادخلي الاتوبيس
www.alotobees.blogspot.com
اما دلوقتي يا عيني عليا
اللي يشوفني يستعجب!!

حاول تفتكرنى said...
This comment has been removed by the author.
حاول تفتكرنى said...

اهلا سلوي

مفيش شك أنك عبرت عن مرحلة الطفولة تعبير جميل ، وواقعي ، وصلنا بكل نقاءه فالطفولة مرحلة إن لم نستطيع تعايشها مرة ثانية فاننا كثيرا ما نستحضرها ، فتسعدنا ونسعد

اشكرك على تمريرك ( للمايك ) لاكتب ، ولكني اخشي عدم القدرة عليها ، فالحديث عن هذه المرحلة يتطلب مواصفات خاصة ، وهذه المرحلة لدي كانت من زمن بعيد جدا ، لكن أعدك بالمحاولة يوما ما

تحياتي

سلوى said...

صفـــــاء
يا صفاء
بلاش تواضع
هستناكي تتكلمي عنم الطفوله :)

سلوى said...

رحــــيـل
كان كتكوت زي العسل يا بنتي

إنت بس ماتوعيش عليه
ههههههههههه

سلوى said...

موناليزا

كنت عايزاكي تكتبي عنها في مدونتك
علشان الناس تعرفك أكتر

سعيده بتعليقك جدااااااااااااا

سلوى said...

موناليزا

كنت عايزاكي تكتبي عنها في مدونتك
علشان الناس تعرفك أكتر

سعيده بتعليقك جدااااااااااااا

سلوى said...

حاسوباتيه

إنت اللي عسوله
المولد شئ ظريف جدا
حاله خاصه كده

بس يا خسارة الشيخ ماهدش بيعمله

وتعالي كل يوم وأنا أحكيلك حدوته :)

سعيده بتشريفك جداااااا

سلوى said...

لورنس العرب
فعلا كانت أيام

كل اللي اتخرج من الجامعه بياخد على دماغه :))

وإن شاء الله هشوف الأتوبيس

دمت بكل الخير وربنا يوفقك

سلوى said...

حاول تفتكرنى
كل الناس بتتهرب من التاج

ماشي :)

أتمنى طبعا إنك تكتب عن المرحله دي
وسعيده بتواجدك

Anonymous said...

حاضر ياسلوى

هحاول استرجع العصر الحجرى اللى كنت عايش فيه لانى كبرت جدا

ومع ذلك فذكريات الشورت والقميص موجودة برضه

سلوى said...

Sherif

أيون كده

أخيرا حد هيوافق يعمله:)

حضرتك شرفتني
وإن كان لي عتاب لتغيب حضرتك مده طويله :(

رفقة عمر said...

جميله قوى اجاباتك
رجعتنى لا يام حلوة وجميله

سلوى said...

رفقه عمر

الفضل لك عزيزتي

والتاج من صنعك :))

Anonymous said...

أرق مافيها .. الكتاكيت

وان لم تخلو من شقاوة

سلوى said...

Sherif

:))

شقاوة برضه
أمال بوست حضرتك يبقى إيه؟؟ :)

بس برضه كان في شقاوة :))

life said...

ايه الطفولة الجميلة دى مولد وعرايس وكمان لسه فاكرة الاغانى
انا لسه فاكرة البرنامج بتاع يوم الجمعة سينما الاطفال لأنه الوحي اللى كان بيعرض كارتون قبل طبعا أن يصبح هناك العديد من القناوات التى وعلى ما يبدو من كثرت حرمانى من الكارتون زمان اتابعه جميعاها الأن
طيب على العموم ياست البنات ولو أنها توريطة بس هكتب عن طفولتى اللى مش فاكرة منها حاجة فيبدو أن البنى أدم كلما تقدم فى السن فقد ذاكرته أو لعله لا أملك الكثير من اللحظات الجميلة فى طفولتى لذا ذاكرتى محتها هههه
ياه تصدقى أنى فعلا مقصرة فى حق الزيارة ياسولى ومن فترة ما دخلتش مدونات بس انتى عارفة السبب لذا ستعذرينى

مودتى لأحلى صديقة

سلوى said...

life
إيه الجمال ده
وسينما الأطفال

وكرتون

طيب هستنى البوست بتاعك

وأنا طبعا عارفه السبب في التقصير
ولا يهمك ميرو :)