Sunday, December 28, 2008

ودن مــــن طين


ودن من طين وودن من عجين
خليكوا يا حكام ساكتين
مطنشين .. منفضين .. مكبرين
طالما أسيادكم عنكم راضيين
يبقى خلاص
بلا عراق بلا لبنان بلا فلسطين
خليكوا نايمين
وموتوا وانتوا حوالينا عايشين
عارفين
العيال في الشارع لكم مكسوفين
نفسي في يوم ألاقيكم غايرين
وألاقي غيركم حكام تانين
اسمهم يا ساده بنى آدمين
للكرامه والعزة والعروبه عايشين
حكام عارفين
يعني إيه بشر .. يعني إيه مسلمين
يعني إيه غيرة .. ويعني إيه دين

16 comments:

صفــــاء said...

.
يبقى هتموتى يا حبيبتى من غير ما تشوفى اى حاجه

لأن كل اللى بتتكلمى عليه دة أوهام ومش هتحصل
أطلبى من ربنا حاجه أسهل شويه من ان دول ربنا يسخطهم بشر
.

منى said...

وانا والله نفسى يا سلوى
خلينا ندعى ونتغير
جاي العالم حوالينا يتغير
ربنا كبييييييييير
ومفيش حاجه كتيره عليه

Anonymous said...

سلوى

لابد من فجر مهما طال الليل .. صحيح اننا نعيش الزمن الردئ .. لكن من قال أن ضياءا ظهر بغير ظلام .. صبرا جميلا

بوست .. قصيدة صادقة

و القادم....أجمل said...

طيب معلش
هما المفروض يعملوا ايه
يعني إيه اقتراحاتك
مثلا نحارب
و لا نديهم جزء من أرضنا
بجد و الله أنا
بسأل مش هزار أو سخرية
لا و الله
بس ايه اقتراحاتكوا للحكام
يعني سؤال مباشر
لو إنتي دلوقتي أصبحتي
رئيسة للدولة و حاكمتها
هتعملي ايه ؟؟؟؟؟؟؟؟؟

http://kasperb4.blogspot.com/ said...

حلوة يا سلوى
بس مين اللي يسمع
وزي منتي عارفة ان المشكلة دي مش مشكلة حكام بس
احنا كمان مشتركين ف كل اللي بيحصل

mostafa rayan said...

دي امنيتنا كلنا
بس علشان تتحقق لازم احنا كشعب الأول نتغير
الحكام جزء من الشعب
صدقيني لواتغيرنا وبقينا احسن ربنا هيكرمنا بحكام احسن
لك كل التحية والتقدير

سلوى said...

صفـــــــاء

مين عارف مش يمكن هما اللي يموتوا

قدمي المشيئه كده :)

تسلم ع المرور صفوء

سلوى said...

منى

فعلا ربنا كبير
والله المستعان

فينك من زمان يا هانم؟ :)

سلوى said...

Sherif

أكيد طبعا لكل شئ نهايه

وهما لهم نهايه

هذا وعد الله


لكن الأمر مخزي ومحزن

شكرا لزيارتك الرقيقه
نورت المدونه :)

سلوى said...

و القادم....أجمل

شوفي يا لولو

لا هقول

نديهم أرضنا
ولا نحارب

أبسط شئ كنا فتحنا معبر رفح علشان الإمدادت تصل للنا اللي بتموت دي

تخيلي
شعب مسلم محاصر ومش معاه حتى سلاح يدافع عن نفسه

دي قبرص وكرواتيا بعتت لهم سفن ومش عارفه توصلها لهم

وإحنا عرب مسلمين وأولى بيهم
دا الواحد بقى مكسوف إنه مصري

زي ما قلت لك أبسط شئ المعبر يتفتح
يجتمعوا ويبقى لهم رأي فعال كده
مش يبقوا لا كلمه ولا قيمه

حسبنا الله ونعم الوكيل

سلوى said...

آلام وآمال

إذا كان رب البيت بالدف ضاربا ...

يا محمود كلكم راع وكلكم مسؤل عن رعيته


حسبنا الله ونعم الوكيل

سلوى said...

mostafa rayan

هو الشعب فاضى يتغير
ده مطحون يا مصطفي

مين عارف
يمكن يحصل شئ كبير
يغير كل شئ
الله المستعان

رفقة عمر said...

روعه سلوى
تسلم ايديكى
يارب يسمعوا
واللى زى ما قلتى ودنهم من طيييييييييييييييين

romansy said...

لا لاسف هيفضلوا نايمين

فى هيفا ونانسى سامعين

وللضرب متطنشين

وللكوره متابعين
دا حالنا
وكمان مش عاجبيبن

الربان said...

تحياتي يا سلوي

و الله كلماتك جعلتني ابتسم...و يبدو
اننا لن نعيش حتي نري هذا الحلم...

لكن الحقيقة ان السيد رئيس مصر انا اقدره جدا لسياسته الخارجية التي لم تجعلنا ننزلق الي مخاطر حروب او صراعات
جديدة...كفانا ما قاسيناه سابقا.

تحياتي و تقديري

Anonymous said...
This comment has been removed by a blog administrator.