Monday, October 15, 2007

عِِــــيد وحــــب .. على رأي كاظم

عيد وحب .. الليلة الناس معيدين
لو أنت وياي الليلة العيد بعيدين
جاء العيد .. وتسلطت على فكرة وأبت إلا أن تنفذ
وهى أن أغلق الموبايل
وأغلقته
وحتى لا تظنوا أنني براويه ومش عايزه اكلم حد
أقول لكم إن الحكاية لها أصل
وأصل الحكايه
حدث أنه في رمضان جاني دور برد بس الحقيقه عمل اللي عليه وزياده
المهم .. لم يسأل على أحد
وأقصد بأحد .. هؤلاء الذين كانوا عندما يتغيبوا كام يوم كده أبادر بالسؤال عنهم
لأطمئن عليهم
وأستمع لهم وأطمئن عليهم
والحقيقه أن الحياة مشاغل زي مانتوا عارفين
وعلشان كده قفلت الموبايل
وقلت اللي ماسألش عني وأنا تعبانه مش محتاجه تهنئته في العيد
ووجدت أن في حاجه اسمها الواجب وفي حاجه تانيه مش عارفه اسمها إيه
الواجب ممكن تعملوا مرغم أو برضاك
لكن الحاجه التانيه دي بتعملها لأنك عايزة تعمل كده
يعني لما بتسأل عن حد
بتسأل لأنك عايز تطمئن عليه
مش علشان ده الواجب أو المفروض
يعني أعتقدت أنهم لازم يسألوا على مش علشان الواجب
لكن لأنهم عايزين كده
وشكلها وحش قوى لو تتصل بحد علشان تقول له إنك محتاجه
لأنه لو بجد صديق
كان هيسأل عليك من نفسه
وتطورت الفكرة في رأسي
لتتسع وتشمل
المعنى الحقيقي لصله الرحم
ففي العيد يتذكر الناس أن لهم أقارب يتذكروهم برنه أو رساله أو مكالمه كام دقيقة
وإزيكوا وعملين إيه .. وكل سنه وأنتم طيبين
هي دي بقى صلة الرحم
معنى صلة .. التواصل المستمر
فتعرف أزماتهم فتكون معهم
وأوقات مرضهم وتكون بجوارهم
وأوقات يحتاجون فيها لمجرد الكلام والفضفضه
فتستمع لهم
هي دي الصلة
صلة دائمه مستمرة مش بس في العيد والمناسبات المختلفه

14 comments:

rack-yourminds said...

كلامك بجد مظبوط للاسف كلنا مقصرين مع اهلينا ومبنفتكرهمش الا في الاعياد او المناسباات

تحياتي لكي وكل سنه وانتي طيبه

son's egypt said...

السلام عليكم
كلامك صح لان في ناس مش بتفتكر بعض الا في المناسبات وبس
غير كده ممكن بيكونوا معيرفوش حاجة عن بعض

Mo3Az said...

ممممممم

اولا كل عام وانتم بخير

ثانيا حمدلله على السلامة من البرد

موضوع باه ان الواحد محدش يسأل عليه فى وقت التعب ، فعلا حاجة وحشة جدا

عن تجربة والله ان الواحد لما بيكون تعبان بيبقى بيتمنة اى حد يسأل عليه او يزوره

ولكن احيانا فعلا بيكون فى اصدقاء اوفياء ولكن فاتهم يسألوا علينا

اما لانهم مش عارفين او كسالى او لانهم مشغولين ، اكيد دا غلط وما يصحش بس مش لازم ان احنا نقلبها بزعل

مش عارف دا اللى جه على بالى اكتبه دلوقتى

:) :)

على العموم كل عام وانتم بخير وبعوده الايام

وفى انتظار جديد البوستات

نسالكم الدعاء

Anonymous said...

افتحي الموبايل
احنا احسن منهم
جايز فعلا ماكنوش يعرفوا مرضك
حمد لله على سلامتك
المهم
احنا هنعيد
عليهم علشان نحافظ على اخلاقنا احنا وطيبة قلبنا احنا
اعملى خير وارميه البحر
لأ ..قصدى احتسبيه عند ربنا
كل سنه وانتى طيبة
ما تشغليش بالك بالى سأل واللى ما سأل
اشغلى نفسك بالحب لكل الناس
علشان بس ربنا يحبك لكن مش علشان الناس
اه لو اقدر اسيبها الدنيا..حكم انا تعبت من الناس اوى
كمان مره كل سنة وحضرتك طيبة

http://kasperb4.blogspot.com/ said...

ألف سلامة عليكي وكل سنة وانتي طيبة
معلش اعذريهم لآن فعلا الدنيا بتلهي الناس اوي وخصوصا اليومين دول بالذات قل ما تجدي حد بيسأل على حد عشان هو عايز يسأل عليه للاسف
لكن الحمد لله ما زال فينا بقية من خير في الاعياد والمناسبات وبنفتكر ان لينا اهل واصحاب المفروض علينا ان احنا نسأل عليهم

وربنا يتقبل منا ومنكم
واحب اضيف بس ان صلة الرحم ليها معنى اعمق من كده وهو ان احنا نصل من قطعونا وده ثوابه وجزاؤه عند ربنا اكبر بكتير من اللي يصل من وصله فقط
والاتنين طبعا خير
وفي صحيح البخاري عن عبد الله بن عمرو رضي الله عنهما عن النبي صلى الله عليه وسلم قال: "ليس الواصل بالمكافئ، ولكن الواصل الذي إذا قطعت رحمه وصلها"ا

وكل سنة وانتي بخير والف سلامة عليكي مرة تانية

عصفور المدينة said...

أستاذة ربنا يكرمك صدقت
الحقيقة أن فكرة الصداقة أو القرابة والرحم هي منظومة متكاملة ليست فقط مسجات أو تهنئة في مكالمة تليفونية واللي انت قلت مش عارفة اسمه إيه ده
هو الحب
إن الإنسان يسأل عمن يحب لأنه يحبه وليس عشان الواجب

Desert cat said...

معلشى يعنى يا لولو
انا كذا مرة اسال وابعت رسايل ورنات ومكالمات ومحدش كان بيعبرنى
فى الاخر نفضت للجميع
معنديش غير كام صديقو طلعت بيهم من الدنيا
انما قرايب بطلت من زمان

سلوى said...

rack-yourminds

كل سنه وانت طيب وبخير وسلام

طيب خلينا نفتكرهم أكثر مش في الأعياد بس

خلينا نبتدي بينا

دمت في رعاية الله وحفظه
وسعيدة بزيارتك دائما

سلوى said...

son's egypt

عندك حق

إيه رأيك زي ما قلت سابقا
خلينا نبتدي بأنفسنا

سعيده بزيارتك
وفقك الله

سلوى said...

Mo3Az

كل عام وأنت بخير وسلام وصحه

ثانيا الله يسلمك ويحفظك
والله كفايه وجودكم وسؤالكم
ملأتم حياتي

وبعدين الواحد بيزعل من الشخص العزيز عليه

اللي المفروض لا يشغله شئ عن أصحابه

المهم
كل سنه وانت طيب
وسعيده بتشريفك

سلوى said...

Anonymous

فتحت الموبايل

كلامك بجد طيب
وهدى من نفسي

جزيت كل الخير

سلوى said...

آلام وآمال

الله يسلمك ويحفظك

كلامك مميز كالعادة
بس كنت أحب الناس تفتكر بعض دايما مش بس في المناسبات

لك كل الشكر

سلوى said...

عصفور المدينة
أستاذي الفاضل
شرفت بزيارتك جدا

واللي انت قلت مش عارفة اسمه إيه ده
هو الحب

جملتك هذه وقفت عندها كثيرا

سعدت بزيارتك وتعليقك
بارك الله فيك

سلوى said...

Desert cat
قطتي زيارتك تسعدني

وحاولي تحفظي على الكام صاحبه دول

أحسن الحكايه دي بقت نادرة جدا

دمت في حفظ الله