Monday, August 10, 2009

سوق الحياه


يا عم يا ساكن سوق الحياه

الاقيش دكان يبيع

فطع غيار انسان

عايزة اشتري قلب

يكون صناعه جنان

لا شغل صين ولا يابان

عايزاه يكون حديد .. لون الرومان

الشكل والفعل قلب

لكنه حجر صوان

يجرح ولا ينجرح

ولا يوم يبات حزنان

يا عم يا ساكن سوق الحياه

الاقيش دكان يبيع

قطع غيار انسان

عايزة اشتري لسان

مش زى اي لسان

لسان يكذب ينافق

يهين ولا يتهان

وعايزة

قوة وظلم وقسوة كمان

عايزه كل ده

بس أمانه

ياعم يا ساكن سوق الحياه

لو لقيت زي ده دكان

اوعى تقولي هو في أي مكان

أخاف اشتري

قطع غيار انسان

أموت وانا بركبها

ويموت فيا الإنسان



24 comments:

صفــــــاء said...

لا يا سلوى
انا مش عاوزة قطع غيار
ولا قلب حجر ولا لسان كداب
عايزة اعيش زى ما ربنى خلقنى
أنسان
واللى مش عاجبه

مش مهم
مش هغير نفسى عشان ارضى حد
اللى عاوز ... يروح يعيش مع صنم

سلوى said...

صفــــــاء

ماهي الحاجات دي مش علشان تعجب الناس بيها

لكن عشان تعرف تعيش بين الناس

وفي الآخر مش هتعيش غير انسان
غير كده تموت

:)

Dr Ibrahim said...

كل انسان مخلوق بحكمة وقدر

وحتى لو اشترينا من الدكان

أكيد مش هنلاقى اللى يناسبنا بالظبط100%

romansy said...

بتنادى وانا سمعتك فى عز السوق
شايفك ليه حيرانه ما تبصى لفوق
مش عاوزانى اشوف الدموع يا ريتها تفوق
وتعرف ان فى السوق
قلوب بس من دهب تستاهل قلبك
لسان بس كل اللى بيقوله بحبك

لورنس العرب said...

خليه على طبيعته افضل بدون تعديلات

Anonymous said...

والله من غير دكان ولا سوق ولا حاجة
بس لو سمحتي
كلمة يا عم
اتذكرت 3 مرات
مين العم دا
هو انتي واقفة فين بالظبط

سلوى said...

Dr Ibrahim

كل انسان مخلوق بحكمة وقدر

فعلا كل شئ بقدر
وحتى لو هيتغير يبقى يتغير للأحسن

ربنا يحفظك دكتور
وكل سنه وانت طيب وبخير وصحه وسلا أنت وكل الأسره

سلوى said...

romansy

والله انت متفائل أخي رومانسى
ربنا يديم عليك هذا التفاؤل
ويحقق أحلامك
وكل سنه وانت طيب والأسره الكريمه

سلوى said...

لورنس العرب

مفيش حل تاني :)

كل سنه وانت طيب أنت وكل من حولك

سلوى said...

Anonymous
محمد فؤاد قال
ياعم حمزة

وسعاد حسنى قالت
يا عم يا صياد

عدويه قال
عم يا صاحب الجمال

ليلي نظمي قالت
ياعم روح

ولا حد سألهم هما فين ولا واقفين فين :)

عادي يعني الكلمه
ولا حضرتك مش من هنا ؟؟ :)

كل سنه وحضرتك طيب أنت وكل من حولك

Anonymous said...
This comment has been removed by a blog administrator.
سلوى said...
This comment has been removed by the author.
حاول تفتكرنى said...

جميل ومرتب
ومعبر ايضا

لكن بالذات الإنسان نريده كما هو ، فإن كان هناك ما يشوهه ن فلن يفيد تبديله

خاصة القلب

الزجل فى مجمله رائع والفكرة ايضا جميلة

نحييك

سلوى said...

حاول تفتكرنى

الله يخليك
سعيده ان المحاوله عجبتك :)

بس المشكله انه مش مشوه
لكن كان المراد تشويهه ليتماشي مع كل القلوب المشوهه :)

وفي الأخر سيبقى كما هو :)

أشكر لك تواجد دوما

ebn roshd 777 said...

بيتهيالي ان لسه فيه قلوب زي القلب الطيب اللي صاحبه زهق منه وعايز يغيره
واعتقد كمان ان اصحاب مثل هذه القلوب
لابد ان يكونوا علي يقين انهم هم الاسوياء وليس العكس
وان الله سبحانه وتعالي قد من عليهم بنعمه القلب الطيب وفضلهم عن كثير من خلقه لان اصحاب القلوب الطيبه دائما هم الرابحون ولن يندموا ابدا علي طيبه قلوبهم وسمو ارواحهم

راجى said...

قلبك ابيض يا سلوى زى الفل

رفقة عمر said...

سلوى انتى مش عارفه ان فيه ناس نسيت انها انسان
وبتتعامل بمعامله الحجر الصوان
الحمدلله اننا مش منهم
وربنا يرحمنا من اصحاب القلوب الحجر

سلوى said...

ebn roshd 777

:)

صح طبعا
أكيد موجودين

كل سنه وانت طيب ابن رشد انت وكل الأسرة

سلوى said...

راجى
ربنا يخليك يارب على حسن ظنك
دا أنا شريريه :)

كل سنه وحضرتك طيب أنت وكل الأسرة وخصوصا العصابه :)
ربنا يخليهم لحضرتك

سلوى said...

رفقة عمر

رفقتي الطيبه
في طبعا

ومش بس قلوبهم حجر دول اشد قسوة

زي ما ربنا قال

{ثُمَّ قَسَتْ قُلُوبُكُمْ مِّن بَعْدِ ذلِكَ فَهِيَ كَالْحِجَارَةِ أَوْ أَشَدُّ قَسْوَةً وَإِنَّ مِنَ الْحِجَارَةِ لَمَا يَتَفَجَّرُ مِنْهُ الأَنْهَارُ وَإِنَّ مِنْهَا لَمَا يَشَّقَّقُ فَيَخْرُجُ مِنْهُ الْمَآءُ وَإِنَّ مِنْهَا لَمَا يَهْبِطُ مِنْ خَشْيَةِ اللَّهِ وَمَا اللَّهُ بِغَافِلٍ عَمَّا تَعْمَلُونَ}.

سورة البقره

Anonymous said...

كل سنه وانتى طيبه
رمضاااااااااااااان كرييييييييييييييييم
مستنيه السحوووووووووووور

Anonymous said...

جميله قوى ياسلوى بس من الواضح ان فى ناس كتير عارفه الدكان ده لان فى ناس اد ايه قاسيه وجارحه
بس اللى يفرح ان القلوب النقيه الطيبه عمرها ما هتتغير
وربنا يعين اصحابها بقا على الحياة
دومتى فى حفظ الله
اختك

Anonymous said...

ياسلام لو كان فى دكاكين للحاجات دى

كنا قفلناها وشمعناها يالشمع الاحمر وعيشنا مرتاحين ولا ايه رايك

L.G. said...

ايون تصدقي
لا كده نافع ولا كده نافع
مش حترتاحي لو بقيتي وحشة ومش حترتاحي لو فضلت كويسة

خليكي كويسة وخلاص واللي نعرفه احسن من اللي منعرفوش

قدر ومكتوب يا حبوب