Friday, August 8, 2008

فين الخشبه ...؟؟؟



تعيش الخشبه
هل تذكرون الخشبه
عندما أراد سنبل أن يتزوج ذيبه ... ولأنه ليس من قبيلتها واجه صعوبات كثيره
حتى وافق والدها وفي يوم العرس
وإتماما للمراسم منحه والدها اللي هو بيج بوس القبيله خشبه صغيره
قلبها سنبل بين يديه وقال جملته الشهيره ( إيشي خيال يا ناس ) طبعا خيال فبقطعه الخشب تزوج
ليه المقدمه دي ؟؟؟
إمبارح إحداهن كانت تتحدث عن قرار غريب أول مرة أسمعه بصراحه
قال إيه أي إتنين سيتزوجوا وإبتداء من العام القادم سيدفعون 3000 جنيه عند كتب الكتاب
طبعا لم أصدق ... ولكن أكتر من شخص أكد الموضوع
برضه مش مصدقه :)
يعني إيه يدفعوا 3000 جنيه وليه ؟ وإزاى ؟
يا جماعه دي إشاعه ولا حقيقه ؟؟ اللي يعرف يقولي من فضلكم
بصراحه لو حقيقه تبقى الحكومه ناس ذوق ذوق ذوق
طبعا ما الشباب عارف يتجوز ومعاه الفلوس بالهبل وده ليه؟
لأن الحكومه موظفه الشباب وبتعطيهم مرتبات عاليه
طبعا علشان يعرفوا يعيشوا ويصرفوا كده و يرشوا رشه ع الحكومه اللي مهنياهم
طبعا أكيد دي نكته ومش حقيقه .. صح ؟
وإلا الحكومه تكون بتشجع الجواز العرفي
ولا بلاش جواز أصلا ... بلا جواز بلا مصاريف ؟..مش هما بيبحثوا قرار ترخيص بيوت الدعاره في مصر
علشان تكمل وتبقى رسمي
طبعا علشان يبقى شغل سليم وأي ضابط يشك في أي واحده من ساكني تلك البيوت .. تقوم تدب الرخصه في عينه :)
ولا يقدر يتكلم .. وبالقانون
بالقانون ممدوح إسماعيل براءه .. من غير حتى توبيخ ولا قرصه ودن ولا حتى لفت نظر
وبالقانون يتحبس أي حد يعترض
إبراهيم عيسى
أيمن نور ... وغيرهم
كده بقت عال خالص
نراجع بقى للخطه الإستراتيجيه المحكمه اللي إحنا بنفذها بلا حولا ولا قوة
ونبتدي من الأطفال
أطفال أهلهم دايرين في ساقيه الحياه يصارعون الغلاء المستمر يحاربون من أجل لقمه العيش
أهل لا يملكون الوقت ليربوا أولادهم إلا من رحم ربي
أطفال أمام الدش أفلام وأغنيات حدث ولا حرج
كبروا الأطفال ودخلوا المدرسه
وهنا أصبحوا كفئران التجارب للناس الذوق اللي بتصلح التعليم .. مش فاهمه إيه التعليم اللي مش نافع معاه تصليح ده
وطبعا بيوصلوا للإعدادي والبعض لا يجيد القراءه ولا الكتابه إلا من رحم ربي
كبروا ودخلوا الجامعه مع حصيله لا بأس بها من التربيه الدشيه والتجارب التعليميه
إتخرجوا
وتبدأ قائمه مفيش
مفيش شغل ... وبالتالي مفيش فلوس وما يتبعها من قائمه مفيش
طبعا البعض بيلاقي شغل بس الأغلبيه في بطاله
الأغلبيه دي إما تسافر أو تنحرف أو مش عارفه بصراحه المفروض تعمل إيه
مش عارفه بعد كام سنه الوضع هيبقى إيه
هو أنا متشاءمه ؟؟
إحنا محتاجين نصحصح شويه صح ؟
فين الخشبه ؟؟
لا شك إنه بوست غريب

20 comments:

الطائر الحزين said...

تقصدى فين ايام الخشبة
لا ملكيش حق 3000 جنية ايه اللى بتتكلمى فيهم دول حاجة دا اقل شاب بيكسبهم فى الساعه بلاش افترا على الحكومة
==========
دعوه للزواج العرفى
او لحاجات تانية
حسبنا الله ونعم الوكيل
لو هذا الكلام صحيح

سلوى said...

أهلا الطائر السعيد
حضرتك تشرف المدونه دوما
أنا اصلا مش عارفه هي إشاعه ولا حقيقه؟؟

كل لما اسال حد استفسر منه
يؤكد الخبر
ويقولي ده ضمان للعروسه علشان لو حصل لا قدر الله تبقى تصرف منهم

الحقيقه مش عارفه
ياريت تطلع إشاعه
أحسن كده زياده أوى

وفعلا فين أيام الخشبه

تحيااتي

رحــــيـل said...

لولولولولولوى
وكمان فتحتى التعليقات حمدالله على السلامه بجد

انا اول مره اسمع الكلام ده ده هما كده بيزودوا الطينه بله

تعرفى بقى لو حصل فعلا المفروض الناس مش تسكت

هما ازاى يعمولوا حاجه زى كده
دول الشباب بيجوزا بالعافيه اصلا

طيب كويس انى عامله اضراب

سلوى said...

لولولوى
دي علشاني
تسلمي يا ساره
أنا نفسي مش عارفه دي حقيقه ولا لأ
بس أكتر من حد بيأكدها
تكونش أوشاعه
يارب تكون كده
أنا كتبت علشان أسألكم
نورتي يا ساره العزيزه

ربنا يحفظك وتتنحي عن الإضراااااااااب

الزواج.....روضة الحب said...

متشائمة
مييييييين قال كدة
يالا عود أحمد
بس زعلتي أحمد ليه
دة حبيبي


بصي يا سلوي
ولقد خلقنا الإنسان في كبد
يعني الدنيا دي مافيهاش راحة أصلا
فنطلعها من دماغنا عشان نرتااااااااااح
وماتنسيش العفاسي
بس اوعي اوعي اوعي

سلوى said...

الزواج.....روضة الحب

هو أحمد إشتكالك ؟
بس أحمد مين هو إنتي تعرفيه
هههههههههههه
ماشي يا موننا
العود أحمد
تسلمي

بس تاني
أوعى أوعى أوعى

أوعي إيه بس فهميني :)

مدحت محمد said...

لا ال3000 جنيه دى اشاعة

هو بس الكشف الطبى قبل الجواز

عارفة لو الحكومة عملت كدة

والشعب وافق

الشباب اساسا مش معاه يتجوز

ويفتح بيت

مش عارف بجد رد الفعل هيكون ايه

تقريبا هيوافق ساعتها انه يطلع رخصة

اللى بتنادى بيها

ايناس هانم الدغيدى

يارب ارحمنا يارب

احنا مش اد عذابك

بجد انا سعيد اوى انك رجعتى ياسلوى

وابقى طمنينا على منى

بقالها فترة مش بشوفها منورة بتعليقاتها

حاول تفتكرنى said...

صراحة أول مرة أسمع الكلام ده ، يمكن عشان خارج مصر ومش متابع أوي مواضيع الزاوج

لو الكلام ده حقيقى أكيد هيكون بسبب الزيادة السكانية

يعنى لو تكاليف الزواج زادت ، الكثافة السكانية هتقل ، لو هو ده السبب اللى دائما نسمعه يبقى الناس اللى عندنا اتجننت ،

ومش بعيد انه يأتي يوم لو الشرطة مسكت واحد متجوز ولا مدام معاها عيالها فى الشارع ، يتم اعتقالهم

بس ياريت
نتحاكم ونهرب مالبلد ونعيش فى لندن ذى ممدوح أسماعيل

تحياتي

سلوى said...

مدحت محمد
أهلا يا مدحت ( باشا زي ما بتقول ):) سعيده بزيارتك

أنا برضه سمعت عن الكشف الطبي

وواضح إنك سمعت الست الفاضله إيناس الدغيدي
ربنا يهدي

وبمناسبه إن الشعب يوافق أو لأ
كنت بتناقش مع إحدي المدونات العزيزات
فقالت لو القرار ده نزل
أنا أعمل مظاهرات ونقلب الدنيا :)
ربنا يعفوا عنا

وحاضر هشوف منى مختفيه فين

سلوى said...

حاول تفتكرنى

أهلا بحضرتك
فعلا يبقوا اتجننوا
أصل المشرحه بصراحه مش ناقصه قتله

بس إيه نتحاكم ونهرب زي ممدوح إسماعيل
هو الراجل هرب لا سمح الله
ده كان بيتعالج
وفي روايه أخرى
إنه خاف من أهالي الضحايا

وبعدين أصلا يهرب ليه
هو عمل حاجه

Anonymous said...

لاأدرى الى اين نحن ذاهبون

نعم ياسيدتى أعرف قصة الخشبة ولكنى أقسم انى لاأعرف حكاية ال3000 جنيه

ربما نكتة .. لكنها ليست لطيفة على الاطلاق

هونى على نفسك

سلوى said...

Sherif
بجد يسعدني جدا تواجدك :)

في ناس بتقول إشاعه
وفي ناس بتقول حقيقه
وفي ناس مش فارقه معاها

وفي ناس قربت تطق بصراحه

ربما فعلا تكون نكته
لكنها غير طريفه بالمرة كما تفضلت وقلت
دمت بكل الخير والسعاده

walaa tulip rose said...

3000 جنيه ايه طب دي الاشاعة في اسكندرية وصلت ل 6000 جنيه النصف علي العروسة والنصف علي العريس
يعني الجوازة حتقلب بجنازة وخناقة ويخرجوا من عند الماذون فاسخين الخطوبة قبل ما يكتبوا الكتاب
لاكن الحمد لله انها اشاعة وطلع الموضوع مجرد كشف طبي عشان الامراض المعدية والوراثية والمستعصية اعوذ بالله
ورغم ان ده كان موجود لاكن ما كنش اجباري
دلوقت بقت رسمي وطبعا كده الحكومةبتعمل اللي عليها وبتحمينا من الامراض ... يعني حيكفونا عيش ولا علاج ....!!!؟؟
لاكن اللي ما حدش يتصوره بقي ان فيه 3 خطوبات اتفسخت للاسف اما عرفوا الموضوع ده ( لا مش اشاعة الفلوس موضوع ان الشهادة الصحية الزامية لكتب الكتاب )
اييييييوه بالضبط كده
كل عريس قال وليه اعرض نفسي لمشكله ويمكن اكون مريض والعروسة تسيبني لا اسيبها انا من الاول احسن
والعكس في الخطوبة التانية
اما الثالثة فكانت عن حب لاكن الحب هرب اما فكروا بالعقل وممكن يكون الوضع ازاي لو اهل واحد فيهم اصر علي فسخ الخطوبة لو مصاب بمرض لا قدر الله
فبعد الحب اصح العقل بس اللي بياخد القرار وفسخوا الخطوبة وفضلوا يكونوا اصدقاء
يعني الحكومة بقالها قروون بتنادي بتحديد النسل .... وفي الزمن اللي ناس مش لاقيه فيه تتجوز اصلا عرفوا ازاي يخلونا نحدد النسل لالالالالا نقطع النسل خاااااااااالص لان اصلا مش حيكون فيه جواز
ودي عينات والله يا جماعة زمايلي يعني شوفت بعيني ما حدش قالي
وحسبي الله ونعم الوكيل

سلوى said...

ولاء العزيزه

وكمان وصلت إسكندريه
:)

على فكرة أنا برضه عرفت إن في كشف طبى إجباري
بس الجديد إنه كان سبب في فركشه الجواز

حكومه دمااااااااغ صحيح

دمتى بكل الخير

انسان وبس ! said...

لا شك ان انتى ضايقك اوى انهم يضيقوا على الشباب اكتر فى الجواز
وانفعلتى مما دفعك لمهاجمة الحكومه من كتر خوفك على ان الشباب مش هتعرف تتجوز
الحكومه دى عايزاكوا تعنسوا خلوا بالكم
ههههههههههه

ربنا يستر عليكم
وعلينا
تحياتى

Omar El-Tahan said...

لا أعتقد في موضوع ال 3000 جنيه ده مطلقاً ... و لا أعتقد أنهم سيعيدون تقنين بيوت الدعارة ... أراها اشاعات ... المد الديني و تأثير الإخوان و انتفاضات المحامين و غيرهم أعتقد ستكون رادع ... هذا غير أنه البلد مش ناقصة ترخيص ... أصلاً اي واحدة من دول ليها اسلوبها في تثبيت اي ضابط يوقفها سواء بالحنية أم بالمال أم بالنفوذ ...

أما موضوع التشاؤم فأعتقد ان كلنا متشائمين ... و لما جمال يمسك الوضع هايسوء اكتر لأنه من مشجعين رجال الأعمال و نفوذهم .. و اللي بيحصل في البلد دلوقتي و هو امين السياسات هايصل قده الف مرة و هو رئيس ...

سلوى said...

انسان بلا عنوان
كل سنه وانت طيب
العود أحمد أخي :)

المسأله مش مسأله عنوسه
أنا فعلا إضايقت

لأن الشباب فعلا الضغط عليهم شديد
الله يكون في عونهم

دمت بكل الخير أخي

سلوى said...

Omar El-Tahan

الله
ده مش أنا بس اللي متشائمه :)

بس على رأيك البلد مش ناقصه ترخيص

نورت المدونه
ودمت بكل الخير :)

عاشق الورد said...

والله ياخت سلوى مشكلتنا اننا بنتمسك بالحاجه اللى مش مهمه
معلش 3000 جنيه مش حاجه
اذا كان فى قريتنا مثلا الشبكه ومش عارف ايه مش اقل من 1000 او 15 او20000 الف جنيه
يعنى والله الشباب دول مظلومين مش عارفين حيجيبوا الشقه ولا المهر ولا الشبكه ولا الغرف ولا ايه ولا ايه
يعنى اهل البنت ظالمينوه
وبعدين كده كده الشباب مش عارفين يتزوجوا اصلا
يعنى مشروع الحكومه ده خسران خسران
:)

وده كله على راس البت والواد فى النهايه
اه والله
على رسنا يعنى
ربنا يسهل
تعرفوا ان فى الهند العريس ما عليه اى حاجه غير المهر بس
والعروسه عليها كل حاجه
من شبكه لامهر لشقه
والله انا فكرت اتجوز من الهند او الحتت دى
:)

عاشق الورد said...

وادينا اما نشوف حنتزوج ولا لا فى السنين دى مع بابا حنسى وماما سوزانيتا