Sunday, March 30, 2008

تعليقات ولكن



أولا السبب في هذا البوست هو تعليق أحد إخواني المدونين الذين أعتز بقلمهم
مين هو ؟
الأستاذ عصفور المدينه
( شديت إنتباهكم صح)
المهم ندخل في الموضوع ثم سنتعرض لتعليق الأستاذ عصفور
التعليقات يا جماعه أكيد لها مكانه خاصه عند كل مدون
وسأتحدث عن نفسي ..بعض التعليقات يحفر في الذاكره
كتعليق أستاذ عصفور الذي كان سببا لعمل هذا البوست
وهناك تعليق يمر مر الكرام .. تأديه واجب يعني
ونبتدي
تعليق له فرحه
طبعا أول تعليق فعلي للمدونه كان له فرحه خاصه
واللي حصل .. أنا عملت المدونه وكتبت بوست بطاقتي الشخصيه
رشيت أدام المدونه وقعدت على بابها
كل شويه أبص على الكومنت (الحكايه دي بتحصل لحد الوقت )
وفجأه
حد علق
إيه ؟ فين ؟ مين ؟ ليه؟
جري أشوف التعليق
وكان التعليق للأخ
zwawy
شكرا لك فقد كنت أول تعليق لدي
***********************
تعليق مشجع
تعليق للأخ الباحث عن الحقيقه
حيث رد على أحد البوستات وكنت لسه بدأه تدوين
وأشاد بالمدونه وقال إن هيكون لها مكان ما
وكنت سعيده بالتعليق ده جدا لأنى كنت لسه ببتدي وكمان مدونه
الصحيفه الكاشفه مدونه محترمه
أشكرا أخي الباحث
**************************
تعليق تعلمت منه
تعليق الأخ الطائر السعيد
الأخ الطائر السعيد من الناس اللي بيهمني تعليقهم جدا
ومرة علق عندي وأنا رديت بس تقريبا بسبب النت التعليق راح
فوجدته يعلق عندي مرة أخرى ويسألني كأخ
يعاتب إخته عن سبب عدم ردي على تعليقه
وقتها زعلت من نفسي جدا
واتعلمت إنه زي الناس ما بتهتم وتعلق عندي مع إنه
ممكن جدا تقرأ وتخرج بدون أن تعلق
لذا يجب أن أهتم بالرد ومن وقتها
وأنا بعد ما أرد ع التعليقات أعود وأتأكد أنني رديت ع الجميع
شكرا لك أخي الطائر
****************************
تعليق لا أنساه اللي هو سبب عمل البوست ده
كنت كتبت بوست اسمه النور
ورد الأستاذ عصفور وقال
لو أنه عرف قدر نفسه ما سحقته الكلمات ولو أنه تحلى بالحذر ولم يعش في الأحلام ما


أخذته كلمة إلى عنان السماء لأنه حينئذ يكون عرضة للسقوط ولكن الحمد لله أنه فيه النور
هذا التعليق ربما لا يتذكره الأستاذ عصفور
لكنني لا أنساه أبدا .. كلما مررت بظرف ما أتذكر تلك الكلمات
هي كالنور بالنسبه لي تردني إلى حيث أريد
شكرا أستاذ عصفور
**************************
تعليق مستفز
عندما أجد أحدهم ترك تعليق عباره عن إعلان لمدونه أو موقع
دون أن يعلق على ما كتبت سواء بالسلب أو الإيجاب
***************************
تعليق مميز
أصحاب هذا التعليق كتييييييييير لكنى لن أذكر أسماء
بدأوا معي من أول تكويني للمدونه
وإن منعتني الظروف من أن أعلق عندهم
أجدهم هنا يعلقوا ويسألوا
فلا أشعر في تعليقاتهم بالمجامله أو أنهم يردون زيارتي لمدونتهم
إلى هؤلاء تأكدوا أني أعرفكم بالإسم
وعندما لا أجد تعليقكم في بوست ما أذهب لأطمئن عليكم
أشكركم
كنت عايزه أكتب حاجات كتير بس شكلي طولت عليكم
والبوست ده شبه شخصي لأنه خاص بالتعليقات في مدونتي
وسامعه حد بيقول وإحنا مالنا بالتعليقات
معلش ولا تزعل المره الجايه هكتب بوست عن تعليقك
هههههههههههههه
المهم عايزه أقول
إن الكلمه لها تأثير كبير يا جماعه
ياريت ننتقي كلامنا
يارت لا نبخل به لمن يحتاجه
ياريت نحرص على إن كلامنا يكون له معنى وفي مكانه
لأن الكلمه أول ما تخرج مستحيل ترجع تاني

37 comments:

shaimaa elgarhy said...

عايزة اقولك ان فيه مشاكل كتيرة حلصت لناس صحابى بسبب التعليقات اللى مش ظريفه ...وانا واحدة من الناس جت عليا قترة كنت مش عايزة اعمل مدونتى بسبب ان فيه ناس بتدخل وتقول حاجات ....يلا لا داعى للكلام ...اكيد كلنا عارفين حاجات زى ايه؟؟؟؟؟؟!!!!

لكن اللى عايزة اقوله للناس ان مايلفظ من قول إلا ولديه رقيب عتيد
----------------------------------
جزاكى الله خيرا

عصفور المدينة said...

السلام عليكم ورحمة الله
جزاك الله خيرا وبارك فيك
حقيقة أتابع الآن فيما يتبقى لي من وقت قليل من خلال الريدر لانشغالي وقد أحضرتني تدوينتك هذه من حيث الريدر إلى هنا جريا مختلطا لدي مشاعر الفرح بفضل الله ورحمته مع مشاعر التأثر

شوفي يا أستاذة هي دورة

كلام يخرج من القلب
يصل إلى القلب
يتفاعل فيخرج تعليقات تعكس حالة القاريء تجاه الكلام

أحاول دائما أن أستكنه-حلوة دي- الحالة النفسية التي خلف البوست وربما الظروف التي دفعت الشخص لكتابة هذا الكلام ليكون تعليقي مفيدا

ثانيا بخصوص هذا التعليق الذي كتبته وتقولين أني لا أذكره لقد جلست يومها ربع ساعة أفكر بما أعلق وأذكر أنني كتبت عدة كلمات من قبيل "أحسنت" وما شابه ثم محوتها فالحمد لله

فرنسا هانم said...

دائما ما تكون للتعليقات اثرها السحرى على المدون
لان بدون تعليقات يشعر المدون ان كلماته ذهبت هباء
وبالتعليقات يشعر بالتجاوب والتفاعل مع المدونين
تحياتى لكى

رئيس جمهوريه نفسى said...

مش عارف اقولك ايه بس كلنا كده عملنا مدونات وانتظر التعليقات وطبعا فرحتنا كانت كبيره باول تعليق على اول بوست بس جميل منك انك مصنفه التعليقات عندك دليل على انها ليها مكان كبيره عندك

احساس لسه حى said...

عزيزتى

انا بهتم بالتعليقات جداااا

وفى ناس بتخش تعلق اتبات تواجد وكتبادل زيارات

وناس بتعلق علشان تقول رائيها

وناس بتعلق وقلبتها صحوبية وقعدة حريم

معلش دى كلمة ومثل

واكيد بيبان اللى بيعلق وبيقول راى

ولا اللى بيعلق كموافق على البوست من غير ما يقراه

تحياتى

سلام

الطائر الحزين said...

نعم كلنا ينتظر التعليقات ينتابنا بعض التأثر ان لم يعلق احد عندنا

ان الاقتناع بفكرة ما و توصيلها للنفع شىء جميل

واحيانا كثيرة ان يكتب الانسان عن شىء صح ويريد ان يفعله الناس وهو شخصيا لا يفعله لكنه مقتنه به انه الصح او الاصح


ومهم جدا تقبل ردود الفعل فى التعليقات حتى ولو كانت مضاده

فعلا شرفت بتواجد اسمى فى هذه التدوينة

وشكر الله لك حسن الظن

===========================

اسعد جدا عندما ادخل اجد مدونتى على جانب مدونة اناس دخلت عندهم بالمصادفة


===========================

تحياتى

klmat said...

السلام عليكم
عارفه ياسوسو كلامك دايما بيدخل القلب
لانه صادق. انتى عبرتى عن احساسى
بالتعليقات بالضبط. فعلا الكلمه
اللى بتخرج صعب ترجع تانى
انتى كلامك وتدويناتك كلها جميله
ولها معنى صدقنى مش مجامله انا بحس براحه
نفسيه وسكينه لما بزوروك
ياريت كلنا ناخد بالنا احيانا
بنسبب جرح والم دون قصد بكلمه او نرفع
من معنويات حد بكلمه المهم الصدق
والاسلوب الحلو ودول متوفرين عندك الى
جانب العلم انا مش ممكن انسى حوارك
الواعى والمحترم مع د/ ضياء عن الحجاب
انتى جميله وكتابتك بتنقط سكر
خالص حبى وتقديرى

سلوى said...

shaimaa elgarhy
أولا إنت شرفاي المدونه
وأرجو تكرار الزياره
أنا عارفه إن في تعليقات سخيفه وبدون داعي

الحمد لله لم أتعرض لها
وربنا يسلمك منها عزيزتي

وفعلا إنت قلتي المفيد

ما يلفظ من قول إلا ولديه رقيب عتيد

جزيتي كل الخير
زيارات بقى

****************************
عصفور المدينة
وعليكم السلام ورحمة الله وبركاته
جزيت كل الخير ودمت بحفظ الله أنت وكل من حولك أخي
طبعا تواجدك يسعدني جدا جدا
عايزه أقول لحضرتك إنى بقرأ تعليقك وأنا مبتسمه وسعيده والله
يا خبر ربع ساعه علشان تكتب التعليق
هو فعلا أخذ من حضرتك ربع ساعه
لكن أعتقد إنه سيبقى معى ما حييت
شكرا لحضرتك وربنا يبارك فيك

سلوى said...

فرنسا هانم
برنسيس
فعلا والله التعليقات مهمه عندي جدا
عايزه أقولك إني بعد ما كتبت البوست ده
قلت إيه الهبل ده إنت عامله موضوع عن التعليقات
وكنت هحذفه
بس قلت مش مهم هبل هبل
المهم إني أشكر ناس فعلا بعتز بهم
وأقول إن التعليقات مهمه عندي يا جماعه
دمتى بكل خير برنسيس
ودايما يسعدني تواجدك
*************************

رئيس جمهوريه نفسى
فعلا التعليقات مهمه عندي
بس كنت فاكره إن أنا لوحدي اللي كده
طلعتم زيي
أسعدني تواجدك ويسعدني دوما يا ريس
دمت في حفظ الله
************************

سلوى said...

احساس لسه حى
فعلا والله عندك حق
عجبني قوى
واكيد بيبان اللى بيعلق وبيقول راى

ولا اللى بيعلق كموافق على البوست من غير ما يقراه

فعلا والله
في ناس بتعلق بجد وفي ناس بتثبت وجود وخلاص

إنت نورت المدونه
دمت بكل خير
**************************
الطائر الحزين

الله ..هو حضرتك عارف إنك الطائر السعيد
طبعا أنا أشرف بتواجدك جدا
ويمكن حضرتك من الناس اللي لو لم أجد تعليقهم عندي أتأثر
جزيت كل الخير أخي
ودمت بحفظ الله أنت وكل من حولك

سلوى said...

klmat
الأميره الجميله
طبعا إنت عارفه أنا بكون سعيده بتواجدك جدا
وعرفه إنك مش بتجاملي إطمني
أنا بحس إن المدونه مدونتك
وتعليقك مش عارفه أجد كلام يناسبه
أهو إنت اللي جميله
إنت ومدونتك

دمتى بكل خير وسعاده

mohand said...

طيب وانا مين في دول؟


عموما انا بحب اقراء موضوعاتك

تحياتي

سلوى said...

mohand
يعني ده سؤال يا مهند يعني

إنت طبعا من الناس اللي عارفاهم ومكتبتش أسماءهم
واللي بينوروني سواء زرتهم أو منعني شئ من زيارت مدوناتهم
إنت والأستاذ عصفور والطائر السعيد
وناس تانيه كتير برده عرفاهم

دمت بكل خير مهند

رحــــيـل said...

اخبارك ايه ياسلوى
ياااارب تكونى بخير وسعاده

انا كمان التعليقات ليها عندى معانى كتير
وفى تعليقات بيتفضل جوايا مش بنساها ابدا وبتعلم منها بجد

عالم التدوين ده ربجد بجد رائع والواحد عرف منه ناس حلوه كتير

تحياتى وحبى

الجنوبى said...

فعلا تعليقات على البوست بتكون حافز لبوست جديد افضل
يمكن يكون دا بالنسبة ليا انا بس

ولذلك اسمحيلى احكيلك نكتة علشان البوست اللى جاى يبقى جامد

بيقولك واحد صعيدى بيقول لواحد صاحبه انا بيجينى ارق كتير ومش عارف اعمل ايه قام قاله انت لما تحس انك عايز تنام ومش قادر حط راسك على المخدة وعد من واحد لمية
قام اخينا راح وعمل زى ما قله بالظبط ولما وصل لغاية سبعين كبس عليه النوم ..راح غسل وشه ورجع كمل عد

تحياتى
عمرو

Unknown said...

والله انا بالذات عندي في موضوعات التعليقات دي مشكله
اكتر حاجه بتجيبلي اكتئاب
ويمكن اسيب التدوين بسببها

ammola said...

السلام عليكم
والله يا عزيزتى مدونتك من المدونات التى احترمها جدا
وتعليقى لديك وان كان جاء متأخرا الا انه يزيدنى شرفا بعد ان تمتعنى تدويناتك
وبالفعل..رويدك يا قلمى
تقبلى احترامى ومودتى

عبده الرايق said...

التعليقات دايما ترموميتر المدونه
وبدونها لم يستطيع المدون معرفه مدى قبوله عند الناس

walaa said...

فعلا فى تعليقات بتخلى الواحد يقف وفقه جامده ويقول هو كده صح ولا لا
ربنا يوفقك
بس من ساعة ما عملت المدونه محدش قال كلام وحش الا واحده بس الله يسمحها
الى مزيد من التقدم
ولاء

Mo3Az said...

:)
جميل الموضوع بجد
شىء طبيعيى ان الواحد يهتم بالتعليقات ، لانها توضح مدى تفاعل الناس مع الكلام المكتوب ورأيهم فيه

وجميل منك انك تتكلمى فى بوست مخصوص عن كدة ، تقديرا لهؤلاء الفضلاء

بجد جميل
(F)

الراقـــص مع الذئـــــاب said...

السلام عليكم

فعلا التعليقات هي روح المدونة
وبالذات من اشخاص تحبي انهم يعلقوا عندك وتعتزي بتعليقاتهم
زي استاذنا الكبير عصفور المدينة
اتمني لك التوفيق

khobayb said...

تدوينة عن التعليقات ..

أمر مبتكر ، وجميل فعلا

---

لكن يا خوفي ..

كده الواحد كل شوية هيخاف تعليقه يتصنف :

"تعليقات سخيفة" - "تعليقات دمها تقيل" - "تعليقات ملهاش لازمة"

ربنا يستر

---

التعليقات هي الهدف أصلا من المدونة

تفاعل الناس
ووصول رسالتك
وتقبلهم لها
أو اعتراضهم عليها ومناقشتهم لك

وهي مقياس تأثيرك في الناس من خلال تدويناتك

ومقياس انتشارك

أهمية بالغة

---

دمت بخير

الفارس الملثم said...

حقيقي كلامك صحيح تماما , فالتعليق للمدون يشبه تصفيق الجمهور للمثل علي خشبة المسرح , هو التفاعل الايجابي الذي يجعله يواصل الكتابة بحماس ,

طبعا بالنسبة للتعليق المستفز هو كاتبه اصلا يعاني من قصر نظر لانه لن يحظي باي اهتمام حتي ولو كان ما يكتبه له قيمة ..

اخيرا اشكرك علي البوست بجد لانه يشير لقضية التفاعل المطلوب واهمية التعليق الشديدة في عالم المدونات وبالتاكيد عدد التعليقات ليس دليل كافي علي قيمة المدونة ..

مع خالص تحياتي

سلوى said...

ra7eel
ساره الجميله
الحمد لله موافقه

أنا بخير يا لولو

المهم إنت أخبارك إيه

طمنيني عليكي

سلوى said...

انسان بلا عنوان
أعتقد التعليقات بتكون حافز للجميع يا عمرو
وبعد النكته دي
هجري أشوف ايه البوست الجديد بتاعك

نورت يا عمرو
دمت بكل خير

***********************************

أنا إنسان
أولا نورت المدونه وشرفتها بزيارتك
ليه بقى زعلان من التعليقات

مع ان مدونتك جميله

دمت بكل خير

*****************************************

سلوى said...

ammola
تواجدك هنا هو الذي يزيدنا شرف
فعلا أنا بكون سعيده بتعليقاتك جدا
وبعدين ماتعمليش فرق يا ستي
زيارات بقى
دمتى بكل خير وسعاده
******************************
عبده الرايق
عندك حق طبعا
ويظهر اننا كلنا موافقون
شرفت المدونه مستر عبده
دمت بكل خير

سلوى said...

walaa
دايما منوراني
ويارب كل التعليقات عندك تكون مصدر سعاده لك
دمتى بكل خير وسلام
**************************
Mo3Az
مرورك هو الأجمل
وفعلا دول ناس كلماتهم اتحفرت عندي
دمت بكل خير معاذ

سلوى said...

خبيب

وتعليقك من النوع
أممممممممممم

الجديد
أسعدني تشريفك جدا
وأرجو تكرار الزياره
وفعلا التعليقات مهمه



وخاصه المؤثر منها

دمت بكل خير وسلام
*************************
الفارس الملثم

نورت المدونه

التعليق المستفز ده بيكون فعلا مستفز

وفعلا التعليقات مهمه جدا
والحمد لله
كلنا موافقه
دمت بكل خير وسلام أيها الملثم

الباحث عن الحقيقة said...

اسمى مكتوب
طويب
اقول كل سنة وانتى طيبه
وتعيشى وتفتكرى
ههههههه
كويس انك فاكره
ده انا كنت نسيت
ونسيتى تكتبى كمان انى عرضت عليكى تشاركينا انا وابن حجر فى مدونتنا وانتى رفضتى
ماشى ماشى
بالتوفيق دايما

Anonymous said...

جميلة الفكرة .. كما هى جميلة اختياراتك من بين التعليقات على مدونتك وتصنيفها

معك فى ان الكلمة تثرى المدونة .. أو هى فى الواقع المكمل لها .. والتى تعطيها معنى .. وبغيرها .. تصبح المدونة كالصحراء .. لانبات فيها يقتات عليه القراء

تحياتى

http://kasperb4.blogspot.com/ said...

اولا انا بعتذر عن التأخير معلش

وثانيا لا شك ان التعليقات مهمة جدا واحيانا كتير بتكون موجهة(بكسر الجيم) لصاحب الموضوع
ربما تغير اتجاهه في فكرة ما او عمل ما كان سيقوم به ثم يأتي تعليق ليجعله يفكر مرة اخرى في الأمر
الحاجات دي بتحصل معايا فعلا

تــــ(حـنة)ــــر said...

كلامك مظبوط
انا حتى نفس الفكرة دى عملتها عندى فى المدون بس كان الكلام دة فى أول السنة الجديدة
تحياتى ليكى و اتمنى أكون من اللى تعليقاتهم مش بتعدى مثل مرور الكرام

منى said...

انا برضه بتهمنى التعليقات جدا
احيانا بستفيد منها خصوصا لما يكون راى مخالف وبتعلمنى ازاى ارد
انا على فكره بهتم بالردود جدا
يمكن متضايقش لو علقت عند حد ومعلقش عندى لان مش بالضروره مدونتى تعجبه طالما مدونته عجبتنى لكن بتضايق من اللى مش بيرد على التعليقات
على فكره يا سلوى الموضوع ده مهم بجد
واعتقد ان هو جوهر التدوين
الا وهو تفاعل المدونين مع بعض
احنا ممكن نقرا الا راء او الاعمال الادبيه اللى بنشوفها فى المدونات فى كتاب او مجله
لكن فى عالم التدوين
احنا سوا بنتكلم ونسمع ونحلل ونرد ونستفيد
اشكرك بصفه خاصه على الموضوع
وعلى المساحه الكبيره اللى اخدتها فى التعليق
سلوى
ادعيلى
تحياتى

سلوى said...

الباحث عن الحقيقة
أخيرا الباحث عندنا
يا أهلا
طبعا انا فاكره .. وكل تعليق له معنى عندي
أسعدنس تواجدك وشكرا على كل تعليقاتك فعلا بعتز بها
*****************************************

Sherif
جميل أوى تشبيهك
وبغيرها .. تصبح المدونة كالصحراء .. لانبات فيها يقتات عليه القراء
أسعدني تشريفك للمدونه
وأرجو تكرار الزياره
دمت بكل خير
*

سلوى said...

آلام وآمال
ولا يهمك
إنت تنور المدونه في أي وقت
وفعلا التعليقات بتكون موجهه أعتقد لكل مدون
وفعلا التعليقات مهمه .. بس الإيجابيه منها
دمت بكل خير يا محمود
****************************
تــــــــــ(حـنة)ـــــــر
خساره إني لم أقرأ بوستك
وبعدين تعليقاتك بتسعدني يا تموره
وتواجدك هنا شئ جميل
دمتى بكل خير وسلام

سلوى said...

منى
أخيرا منى عندنا
إنت فين يا لولو

وبعدين مساحه إيه اللي بتشكريني عليها
المدونه مدونتك يا بنتي

وعلى فكرة تعليقك جميل وعندك حق فيه

ربنا ينورك بصيرتك يا منى ويسعدك ويوفقك
ويهديكي لكل ما فيه رضاه

Anonymous said...

أول مرة أقرأ المدونة وكان المفروض انى أقرأها من زمان بس بجد المدونة دى بالنسبة لى عملة كأنها صديقتى اللى كان نفسى اسمع منها الكلام ده ربنا يوفقك ودايما تكون موضوعاتك مفيدة وجديدة