Tuesday, March 4, 2008

غير حياتك


خرجت اليوم لأنجز بعض الأعمال ووجدتها فرصه للمشي
فكم أحب المشي .. فهو يساعدني جدا على تصفيه زهني
مشيت حوالي .. 25 دقيقه تقريبا
فكرت في أشياء كثيره هذه الأشياء هي موضوع بوست اليوم بإذن الله
غير حياتك
هل من الممكن أن يغير الإنسان حياته ؟
ماذا يستطيع أن يغير ؟
صفات .. نمط الحياه .. ردود أفعال .... ؟
هل من السهل ذلك ؟
وهل يستطيع أن يغير إنسان إنسان آخر ؟
بداية .. أيوه ممكن الإنسان يغير حياته .. أكيد كلنا لسنا ملائكه
فينا بعض الصفات .. أو العيوب .. التي نكرهها في أنفسنا
أو يكرهها الآخرون فينا
عصبيه .. ضعف .. خوف .. خجل زائد عن الحد .. فشل
تسرع .. تردد .. كذب .. جهل .. غرور .. بخل .. إسراف
........ الأمثله كثيرة جدا .. وكل واحد فينا عارف مشكلته فين
طيب .. هل حاولت أن تغير تلك الصفه التي تؤرقك
مثلا لا قدر الله لو علمت أنك ستموت اليوم ..هل ستقول ياااااااه يارتني عملت .... كذا ... طيب أبشر
لازال لديك العمر
إتفضل إعمل اللي نفسك فيه علشان تقابل ربك بعد كده وأنت تمام
على أيه حال
أي تغيير سيحتاج لعزيمه بجد
عزيمه لأن تغير نفسك .. وعزيمه لأن تتحمل ردود الأفعال ممن حولك
فعندما ستتغير سيتفاجأ من حولك .. وتبتدي تسمع
إيه ده ؟
هو إيه اللي جرى؟
معقول !
مستحيل !
لذا يجب أن يكون التغيير نابع منك وبإصرار من ذاتك
بعد كده هتلاقي كل شئ سهل
يقول الله تعالى: ﴿.. إن الله لايغير مابقوم حتى يغيروا مابأنفسهم وإذا أراد الله بقومٍ سوءً فلا مرد
له ومالهم من دونه من والٍ ﴾[ الرعد:11]
طيب هو ممكن إنسان يغير إنسان ؟
وهل ممكن أن يتغير إنسان من أجل إنسان ؟

الحوار ده دار في إحدى العيادات .. لم أتعمد الإستماع لكن السيدتين كانتا تتحدثان بصوت عال مشركين
الجميع معهم
السيده 1 : وإيه اللي خلاكي تتجوزيه وإنت عارفه إنه كده( ذكرت صفه ما )
السيده 2 : قلت هيتغير بعد الجواز .. إفتكرت إني هغيره
السيده 1 (حكيمه ) : محدش بيغير حد
المقوله دي سمعتها كتير .. محدش بيعرف يغير حد
لن تستطيع أن تجعل أحد يتخلي عن خوفه أو ضعفه أو تردده أو فشله ...أو .. أو
يعني بلاش تضحك على نفسك وتقول أنا هغير فلان
لأن ده مش بيحصل
اللي بيحصل إن إنسان يتغير من أجل إنسان
إنسان بيحب إنسان فيحاول يعمل اللي يرضيه حتى وإن غير من نفسه
الأب الذي يغير نمط حياته ويمارس أكثر من عمل ليوفر لأبناؤه حياه كريمه
يفعل ذلك لأنه يحب أبناؤه
الإبن البار بوالديه يفعل ذلك لأنه يحبهم .. وإن لم يكن لظروف ما فهو يفعل ذلك لأنه يحب الله
الذي أوصانا بالوالدين فببره لهم يرضي الله
الزوج الذي يعامل زوجته معامله طيبه رغم أنه يتصف بالعصبيه .. لكنه تحكم في ردود أفعاله
يفعل ذلك لأنه يحبها وإن لم يكن فهو يحب الله الذي أوصى بألا يظلمها
تلك المعامله الطيبه والأخلاق النبيله والصفات الحميده .. ديننا أمرنا بها
فعندما نغير من أنفسنا .. نتغير حبا في الله ومحاوله لنيل
رضاه ( تغير نابع من النفس )
أو نتغير من أجل إنسان جعله الله سبب في أن نفعل ما يرضي الله ( تغير من أجل من تحب
هو الحب إذا .. حب الله الذي إذا ملأ قلبك إنعكس حبا على من حولك
فحبك لأي إنسان هو جزء بسيط جدا جدا من حبك لله
حتى وإن لم تدرك ذلك في حينه .. إلا إنه في النهايه يصل بك لحب الله وفعل ما يرضيه
مهما كانت الصعاب
أريد أن أقول
إنك عندما تحب إنسان فتستطيع أن تتغير من أجله
لكنك لن تستطيع بحبك أن تغيره
انك لا تهدي من احببت ولكن الله يهدي من يشاء وهو اعلم بالمهتدين

53 comments:

Anonymous said...

أول تعليق

فعلا اساس حب اى شئ
هو حب الله ساعتها الحب بيكون اصدق واخلص لان بيكون الدافع له اقوى وكمان اعتقد ان ان اللى بيغير حياته علشان شخص بيلتزم بالتغيرات الجديده دى غالبا امام الشخص ده بس
ان لم يكن مقتنع ذاتيا بالتغيير والا هيكون التغيير صورى او مجرد شكل

على عكس التغيير اللى حبا فى الله وطلبا لرضاه
تحياتي

أختك

الطائر الحزين said...

التغيير شىء صعب وخصوصا اذا كان لشخص اخر تريد انت ان تغيرة

تحاول ان تغير صفة اكتسبها مثلا عشرات السنين

وعلى الجانب الاخر الأمر لابد له من استعداد صادق ورغبة فى التغيير الفعلى من الطرف الأخر

بالاضافة الى قدراته النفسية والذهنية التى تساعدة على التغيير

يعنى ممكن اكون عاوز اتغير لكن قدراتى لا تساعدنى

فانت امام تغييرين

تغير سلوك حاضر و محاربة ما افسدة الدهر

تحياتى

عصفور المدينة said...

أحسنت بارك الله فيك في ربط التغيير بالمحبة ولذلك أعلاه وأدومه وأثبته أن يكون لله ونابع من محبة لله ويحتاج الإنسان أن يتحمل تلك الأصوات المتسائلة والمذكرة بالماضي حتى يعتاد الناس على الوضع الجديد

أما قريحتك التي جادت بتلك الفكرة أثناء المشي فهو يؤيد فكرتي عن تنقيح الذهن بالمشي

klmat said...

عزيزتى سلوى
عارفه لما بدخل مدونتك بحس بأيه ؟
بدون مبالغه هدوء نفسى وراحه وانى مع
واحده صحبتى اوى بتقوللى كلام جميل يفرحنى
دنيا وآخره . حقيقى ياسوسو انتى ماشاءالله
عليكى بتدخلى القلب وبتخاطبى الروح والعقل . كل تدويناتك رائعه
وكلامك صحيح جدا الحب له مفعول السحر فى
تغيير النفوس اللى بيحب بيحاول يرضى
حبيبه حتى لو كان فيه مشقه ايا كان الحبيب ابن او زوج او قريب او ربنا سبحانه وتعالى
التغيير محتاج حب واراده وقناعه باننا
نغير للأفضل فنسعد ونسعد من يحيط بنا
ربنا يحبب فيكى خلقه ويزيدك علم وبصيره
خالص حبى وتقديرى

بنت الصالحين said...

ماشاء اله ياسلوي
اول مره ادخل مدونتك بس ماشاء الله موضوع هايل

الحب في الله
وحب الاشخاص
والتفكير في تغيير صفات سيئه فينا

بارك الله فيكي وذادك علما

shady said...

انك لا تهدي من احببت ولكن الله يهدي من يشاء وهو اعلم بالمهتدين

ربنا يهدى الجميع

الفارس الملثم said...

اعتقد ان لب موضوعك هو الحب..

الحب هو الشئ الوحيد الذي يجعل انسان يتغير ..

انت عاصي لكن لو احببت الله ستحرص علي ان تتوب من خلال سلك طريق الطاعات تقرب لمن تحب " الله عز وجل "

انت تمتلئ بالعيوب لانك بالتاكيد بشر لكن عيوبك تلك تؤلم وتؤذي ناس تحبهم وقريبين من قلبك فحبك لهم سيجعلك تغير من سلوكك وتصلح عيوبك

اذا لكي تتغير يجب ان تحب بصدق

حقيقي موضوع جميل اوي ويستحق الاشادة

تقبلي مروري

فرنسا هانم said...

تغييييييييييير ؟؟؟؟
دم جديد وفكر جديد ؟؟؟؟؟؟؟؟
هههههههههه
الطبع يغلب التطبع

L.G. said...

رسولنا الكريم قال ما العلم إلا بالتعلم وما الحلم إلا بالتحلم ممكن نتغير بس مننا إحنا أنت أوجزت الفائدة في السطرين الأخرين
نعم نتغير من أجل الاخرين محبة أو من أجل أنفسنا حبا في الله ولا نغير إلا بإذن الله
كذلك تغيير الحياة صعب شوية يعني تغيير مجال العمل الظروف عقلية الناس
صعب قوي خاصة في المنحوسة
أيوة كده امشي كتير

زُمُرده said...

الله عليكي

تمام جدا
مفيش انسان بيتغير إلا لو اراد هو داخليا ان يتغير
اما انك تحاول ان تقنعه او تغيره صعب جدا
بل مستحيل اذا كان رافض

اما عندما تحب فممكن انك تتغير من اجل من تحب

بس الاهم ان التغير يكون للافضل في جميع الاحوال

والاهم نعرف ايه التغير المطلوب وازاي نوصل ليه
وايه الامكانيات المتاحه للتغير
والرغبه الداخليه هي اللي بتحقق التغيير

اشكرك على مرورك وسؤالك
ربنا يخليك ليا

الجنوبى said...

ازيك ياست سلوى
ملكيش حق بقى تلومينى لما اعمل زى الراجل التخين بتاع الكويت


على فكرة ياسلوى انا متشكر جدا على الكلمات الجميلة اللى فرقت معايا كتير
تحياتى
عمورة اللعيب

MKSARAT - SAYED SAAD said...

سلوى ازيك
الطبع يغلب التطبع
هذا هو حال كل البشر
تحياتي

MerMaid said...

ماشاء الله
تعرفي ان انا كمان كنت بتكلم علي نفس الموضوع ده مع صحابي ؟؟
و قلت ان انا هاعمله بوست قريب بس انا مكنتش ختكلم عن ربط المحبة بالتغيير
او كان ممكن اتطرق اليها علي كل حل
المهم
بجد بوست حلو قوي احييكي عليه
تحياتي

سلوى said...

أختى ومش هقدر أقول حاجه

وأنا بقول إيه النور ده

كلامك صح طبعا .. هو أنا أقدر أتكلم

اللهم ارزقنا حبك .. وخب من يحبك .. وحب عمل يقربنا إلى حبك

أسعدتيني

دمتى بكل خير وسعاده

سلوى said...

الطائر الحزين

ليس صعبا أن تغير إنسان
بل مستحيلا

لازم هو اللي يكون عايز يتغير
إما لنفسه أو عشانك

التغيير فعلا صعب
وعجبني ما قلته

فانت امام تغييرين

تغير سلوك حاضر و محاربة ما افسدة الدهر

أسعدني تواجدك كما يسعدني دوما
أيها الطائر السعيد

سلوى said...

عصفور المدينة

تعليقك أستاذي
يعني أستاذ عصفور بيقول ( أحسنت ) دي كبيره جدا

أشكرك جدا

وفعلا المشي بيفيد كتييييييييير

دمت بكل خير وسعاده أنت وأسرتك وكل من حولك

سلوى said...

klmat
إيه ده بقى

طيب ما هو احنا أصحاب وأخوات
وفعلا لما بجد تعليقك ببقى سعيده جدا

بس أنت اللي بتغيبي
وأنا بعد كده هتضطر آخذ إجراء رسمي

وهاجي لحد عندك

أميره أنت بجد بتنوري المدونه

دمتي بكل خير وسعاده عزيزتي

سلوى said...

shady
شرفت المدونه
وطبعا أرجو تكرار الزياره

وفعلا ربنا يهدي الجميع

خالص تحياتي

سلوى said...

الفارس الملثم

أصبت
فعلا لب الموضوع هو الحب
واسمح لي أن أقتبس من تعليقك هذه الأسطر


انت عاصي لكن لو احببت الله ستحرص علي ان تتوب من خلال سلك طريق الطاعات تقرب لمن تحب " الله عز وجل "

انت تمتلئ بالعيوب لانك بالتاكيد بشر لكن عيوبك تلك تؤلم وتؤذي ناس تحبهم وقريبين من قلبك فحبك لهم سيجعلك تغير من سلوكك وتصلح عيوبك

اذا لكي تتغير يجب ان تحب بصدق

تواجدك أسعدني أيها الفارس
دمت بكل خير

رحــــيـل said...

فعلا ياسلوى كلامك صح جدا

وخصوصا ان فى بجد صفات بتكون صعب انها تتغير جدا جدا
لازم يكون الحد ده عنده استعداد للتغير ويكون كويس من جواه بجد
وكمان لازم الظروف تكون مساعده فعلا ان يتغير

تحياتى وتقديرى لكى

المـــفـــــــقــــــــوعـــــة مــرارتـهــا said...

انا متفقة معاكي ان صعب ان الواحد يغير حد
بس صعب كمان ان حد يتغير عشان بيحب حد
ومن شب علي شيء شاب عليه
فزوجي عصبي كمامته ورغم انه حاول يهدي نفسه لكن مافيش فايدة ... وساعات يطلب مني انبهه لما يتعصب لكنه وقت مابيتعصب بيبقي مش عاوز حد يعارضه ... وانا الصراحة بخاف منه ومابقدرش اعاتبه لاني عارفة ان العتاب ده هاينتهي بخناقة

يبقي صعب حتي ان الواحد يتغير

سلوى said...

فرنسا هانم

أهلا برنسيس
نورتي المدونه

التغيير فعلا صعب
لكن مش مستحيل عزيزتي

خالص تحياتي

سلوى said...

L.G.
إل جي العزيزه

سعيده بتعليقك جدا

وبعدين عايزاني كل يوم أمشي
لك عليا لما آجي أكتب بوست
أروح أتمشى شويه
هههههههههه

شرفتي عزيزتي

دمتى بكل خير

سلوى said...

زُمُرده
إيه ده
زمرده عندنا
أيوة كده
إرجعي وأسعدينا بتواجدك

وما تغيبيش تاني

تحياتي ودمتى بكل خير عزيزتي

سلوى said...

انسان بلا عنوان
إزيك يا عمرو

أنا حاسه إن الراجل التخين هيرفع علينا قضيه
ويقول بنجيب في سيرته
إنت حر
ساعتها ماعرفكش

************
وبعدين بتشكرني على إيه
التدوين أكسبني أخوة وأخوات بجد
وأنا لو في نفس موقفك هلاقيك هنا
بتشجعني وتقول كلام يقويني

صح ولا إيه
إوعى يكون إيه

سعيده فعلا بعودتك يا عمرو

دمت بكل خير وسلام

سلوى said...

MKSARAT SAYED SAAD
إزيك يا سيد

والله تواجدك ده بيسعدني جدا

وبعدين ساعات الطبع مش بيغلب التطبع

لو في سبب حقيقي للتغير

بس برده ساعات كتير الطبع بيغلب التطبع

إن نورتني

دمت بكل خير وسعاده

سلوى said...

MerMaid
شرفتي المدونه بزيارتك عزيزتي

وعايزه زيارات بعد كده
البيت بيتك

سعيده بتعليقك

وياريت تعملي البوست
أكيد هيكون في وجهة نظر تانيه
والفائده تزيد
على فكرة مدونتك حلوة

دمتى عزيزتي بكل خير وسعاده

سلوى said...

ra7eel
سارة العزيزه

تعليقك جميل كعادتك

وأسعدتيني بتواجدك

وما تبقيش تغيبي كده
دمتى بكل خير وسعاده عزيزتي

سلوى said...

المفقوعة مرارتها
أولا
شرفتي المدونه
وأرجو تكرار الزياره

بس شفتي
زوجك على الأقل بيحاول
وبيقولك تنبهيه

هى المشكله إن ساعات العصبيه بتون شديده
حتى مش بيكون حاسس بيقول أو بيعمل إيه

بس شفتي
على الأقل بيحاول

نورتيني بجد

دمتى بكل خير وسعاده

mohamed emera said...

السلام عليكم
اسف جدا على المخالفه دى انا مش اقدر اتاخر
يافندم انا جيت ادى تمام
إنك عندما تحب إنسان فتستطيع أن تتغير من أجله
لكنك لن تستطيع بحبك أن تغيره
بوست جميل اوى ياسلوى بجد
مش عارف اعلق اقول ايه
كلامك مش مدينى فرصه للمناقشه خالص
لا املك الا ان اخلع قبعتى احتراما
لهذا النامل المنطقى جدا
ولكن
ما اجمل من الشخص الذى عندما نحبه
نصبح بحبه اقرب الى الله ونتغير الى الافضل
فهذا هو الحب
اشوفك بين حروفك
اعتذارى وتحياتى

klmat said...

سوسو انا جيت برحلى للمره
التانيه قبل اى اجراء رسمى
وانا لما بتأخر انا اللى خسرانه
بيكون غصب عنى بس مدونتك هى
النسمه الجميله اللى مش اقدر ابعد عنها
ربنا يديم محبتنا
خالص حبى وتقديرى

son's egypt said...

السلامعليكم
التغير في حد ذاته مطلوب
ولكن التغير سيكون كيف
التغير بيكون من داخل الانسان نفسه
لان الانسان اذا اراد التغير سيتغير
ولكن سيكون تغيره حسب المجتمع الذي يعيش فيه
وما تربي عليه

تــــ(حـنة)ــــر said...

إنك عندما تحب إنسان فتستطيع أن تتغير من أجله
لكنك لن تستطيع بحبك أن تغيره
انك لا تهدي من احببت ولكن الله يهدي من يشاء وهو اعلم بالمهتدين

**********************
بصراحة كده وصلتى للحل و بكلمتين و خدى الكلام من طرف لسانى
تحياتى ليكى و منتظره تشريفك ليا
تمر حنة

dina seliman said...

سلوى
فعلا محدش بيغير حد
الا ما يحس انه بيحبه
وانو لو اتغير هيسعد حبيبه
ومش شرط حبيب ده يعنى واحد ووحده
يعنى الاب ممكن يتغير عشان ولاده
والولاد يتغيرو لانهم بيحبو ابوهم
كده يعنى
لازم الحب يبقى فى حياتنا
عشان نعرف نتغير

مدحت محمد said...

إنك عندما تحب إنسان فتستطيع أن تتغير من أجله
لكنك لن تستطيع بحبك أن تغيره
كان ليا زميلى دايما اقله يابنى صلى حرام عليك
انت مبتصليش
لحد ماربنا كرمنى ومبقتش انا اصلى
هههههههه
فقررت انى ابعد عنه
ومنصحوش خالص
لو شفته
بجد والله الموقف ده حقيقى
انا شايف ان الاصدقاء شىء مهم جدا
لحدوث التغيير
تحياتى

الهدهد الطائر said...

من واقع التجربة.. المرأة قد تتغير من حال إلى حال.. أما الرجل فلا يتغير فالرجال معادن.. قد تتبدل بعض صفاته لبعض الوقت حسب شدة الظروف المحيطة به.. ولكنه يعود في النهاية إلى ما كان عليه.. إلا من رحم ربك

Rehab Mostafa said...

مع احترامي للي قال الطبع يغلب التطبع
بس كل انسان ممكن انه يتغير ... بس مش علشان انسان اخر علشان نفسه هو ..... لو علشان انسان اخر لو الانسان ده بعد عنه أو فقده لأي سبب من الاسباب ممكن يرجع تاني للي كان عليه
لكن لو الانسان عرف ايه العيوب اللي فيه وحاول يغيرها أكييد هيغيرها بنجاح .... بس العيوب دي نسبيه يعني لازم يعرفها من اللي حوليه

بجد بجد بجد بتعجبني مواضيعك وتفكيرك :)

سارة علي said...

بداية دى اول زيارة لمدونتك وبجد موضوعك حيوى جدا فى اعتقادى ان المحور الرئيسى للموضوع دة هو الاصرار الداخلى للشخص انوا فعلا يتغير ودة معناة انوا فجاة يلاقى المعنى الحقيقى للتغيير وقتها بس هيلاقى كل الصعاب اللى كانت بتواجة فى حملتة ضد صفاتة اللى عاوز يغيرها فى متناول تفكيرة وخياراتة هتكون اكتر تنظيم وترتيب وممكن وقتها يتغير بجد غير كدة هتبقى مجرد شعارات الكلام سهل لكن الفعل اصعب وهو دة المهم تحياتى وفى انتظار جديدك

عصفور المدينة said...

أستاذة سلوى محتاج حضرتك حكما في تعليق الأستاذة

L.G.
على تدوينتي الإنسان والمدونة
لأني أخشى أن أعلق بأي شيء فيغضبها أو لا أرد فيغضبها أيضا

arsenalwy said...

صح ياسلوى

نقدر نغير ونتغير بس الموضوع صعب جدا خصوصا لو كانت صفة فيك

يعنى انا مشكلتى العصبية فمبقدرش امسك نفسى حتى لو كان اللى قدامى راجل كبير او بنت او اى حد مجرد انى اتعصبت فقولبى على اللى قدامى يارحمن يارحيم

وشكرا

Omar El-Tahan said...

كلمات من ذهب تلك التي ختمت بها الموضوع:
إنك عندما تحب إنسان فتستطيع أن تتغير من أجله
لكنك لن تستطيع بحبك أن تغيره


هي الخلاصة بالفعل أو كما نقول بالبلدي زبد الزبادي :)

بالمناسبة: المقصود في الآية الكريمة:
انك لا تهدي من احببت ولكن الله يهدي من يشاء وهو اعلم بالمهتدين

المقصود ب ولكن الله يهدي من يشاء ليس من يريد الله هدايته .. كلا .. بل من يريد الهداية لنفسه .. يعني من يريد أن يهتدي فالله عونه ومعينه.

تقبلي خالص تحياتي على إضاءة نقطة لم التفت اليها سابقاً وكنت أظن غير ما كتبتي .. ولكن كلامك وتجاربي العديدة أكدوا لي خطأ معتقدي.

وهناك تعقيب أخير خطر في بالي الآن ...هل الحب وحده يكفي لأن اغير نفسي من أجل من أحب ؟؟ قد أحب انسان ولكني أناني ومعجب بنفسي على حالها وأرى أن أفعل ما أريد ويفعل هو ما يريد ولا داعي لأن يتغير أحد من أجل أحد .. ولو فشلت العلاقة فالتفكير المنطقي وقتها هو أننا لم نتفق ... مع أنني أرى في قرارة نفسي أن الحب الحقيقي هو مزيج بين المشاعر والتنازلات ... لابد إن كنت أحب شخص بالفعل أن أتنازل عن أشياء ويتنازل هو عن أشياء كي تنجح العلاقة ... ولكن الأنانية الآن أصبحت هي من يسطر الحرف الأخير في غالب الأحوال للأسف.

عصفور المدينة said...

جزاك الله خيرا

Unknown said...

طبعا انا معاكى قلبا و قالبا و انا فعلا بحاول طول عمرى اغير من العيوب الى فيا مش عجبانى مرة اقدر و مرة لا بس بحاول

بس المشكلة فى حاجات فى حياتنا بتخلى عيوب فينا تتطلع غصب عننا مهما سيطرنا عليها زى العصبية مثلا فيه حاجات تحرق الدم بتخلى الواحد يتعصب مع انه ممكن يكون بيكره العصبية جدا

و هكذا

عين فى الجنة said...

ارجو قبول اعتذارى مقدما ياسلوى ولكنى اختلف معك هذه المرة
فالقدرة على تغيير الاخرين سواء للاحسن او للاسوأ شيء موجود ونراه ونسمع عنه
الرسول الكريم غير الناس باذن الله ونقلهم من الكفر الى الايمان وياله من تغيير
والاب يمكن ان يغير من سلوك اولاده واعادة تشكيل شخصياتهم
والمحب العاشق يمكن ان يغير من سلوك معشوقته لو تفانى فى حبه
والمدير الواعى يمكن ان يغير من سلوك موظفيه من الكسل الى الانتاج بسياسة الثواب والعقاب
دمتى لنا ولكى التحية

Beboo said...

اصعب شىء على الانسان ان يغير شخصا لا يريد ان يتغير فهذا اشبه بالنقش على الهواء
ولكننا نرى كثيرا ان هناك اشخاصا تغيروا من اجل من يحبون فهناك من يتغير من اجل ارضاء حبيبه ولكن كم مننا تغير من اجل ارضاااء ربه؟؟؟؟

وهل التغيير من اجل ارضاء الله كالتغيير من اجل ارضاء الحبيب؟؟

بالطبع لا
وكلنا رأينا أناس يتغيرون من اجل حبيبهم ولكنهم حينما يحدث الفراق فيعودون اسوأ مما كانوا ولكن من يتغير من أجل رضاء ربه فهو فى تقدم مستمر فلماذا لا نتغير جميعا من اجل إرضاء رب العزة؟؟؟

بجد موضوع رائع يا سلوى وانا سعيد بجد انى قريته واستفدت منه كتير
ربنا يوفقك
سلاااااااااامى ليكى

روابط said...

رغم كونى أنسان كسول , أعيش دوما أسير عاداتى , الا أننى مقتنع بأن التغيير ممكن , وصعوبته فقط فى تفكيرنا السلبى ..تعجبنى كذلك مقولة .. أنت سيد مصيرك , وأتمنى أن أطبقها على نفسى

walaa said...

فعلا كما قال سيدنا عمر
حاسبوا انفسكم قبل ان تحاسبوا وزنزا اعمالكم قبل ان تزن عليكم
تحياتى ولاء

Anonymous said...

والله انا متابعاكى بس مقصرة معاكى
التدوينة دى حلوة اوى...اننا نتغير علشان اللى بنحبهم
عارفة الحب ممكن يخلينا نعمل ايه كمان؟اننا نعذر اللى بنحبهم لو ما قدروش يتغيروا ونقبلهم على ما هم عليه
انا اللى خسرانة انى اتاخرت عليكى
تحياتى ليكى
ammola

سندباد said...

كل سنة وانتي طيبة
انا بس جاي اعيد واطمن ولقيت فكرة بوست جميلة جدا
كل واحد فينا لو صمم هايقدر يغير كل حاجة من حوليه ومن نفسه المهم الصدق مع النفس
تحياتي

رئيس جمهوريه نفسى said...

كل سنه وانتى طيبه الله ما احسن ختاما اجمعين ووفقنا لما فيه الصالح لنا عاجلنا واجالنا

سلوى said...

mohamed
ماشي يا فندم لحقت نفسك من المخالفه
وتعليقك جميل جدا وخصوصا

ما اجمل من الشخص الذى عندما نحبه
نصبح بحبه اقرب الى الله ونتغير الى الافضل
فهذا هو الحب
أسعدني تواجدك جدا
تحيااااااااتي
-*******************
Whispers just for a Night
أشكرك ع الرابط ونورت المدونه
*************************
klmat
إنت يا حبيبتي تنوري
وبتسعديني جدا
ولما مش بتيجي ببقى أنا اللي خسرانه يا لولو
دمتى بكل خير
***************************
son's egypt
طبعا وجهة نظر طيبه
المهم الإنسان يكون حابب يتغير
إضافتك بتسعدني ابن مصر
تحياااااتي
*******************

The Queen said...

عزيزتي سلوى

كلامك جميل جدا وموزون ما شاء الله عليكي بس أنا في رأيي اني ممكن اكون سبب في تغيير شخص ما .. ممكن يقتنع بيا او بكلامي فيتغير مش شرط يحبني او يكون قريب اوي مني بس الحكايه اكيد مش سهله بتمنى كلنا نحاول نساعد بعض علشان كلنا نغير حياتنا للأفضل

جزاك الله كل خير عزيزتي

سلوى said...

The Queen

كبعا إنت عندك حق والحقيقه إن أفكاركم المختلفه فعلا أضافت للموضوع

أسعدتيني بجد بتشريفك

دمتي بكل خير