Monday, December 31, 2007

الأول


عندما بدأت التدوين .. وأثناء مروري على العديد من المدونات لإستكشاف هذا العالم
وجدت بعض المواضيع باسم تاج
طبعا مكنتش عارفه يعني إيه .. بس كان البوست بيكون عباره عن أسئله وصاحب المدونه بيجاوب
وقلت ياه .. إمتى حد هيمرر لي تاج .. وهيكون مين ؟
بالضبط كما كنت أتساءل
يا ترى مين أول حد سيضع لينك لمدونتي في مدونته؟
وأول من وضع لينك لمدونتي .. هي مدونه الصحيفه الكاشفه .. وكنت سعيده جدا .. لأني بحترمها
أما التاج
فأول من مرره لي هو الأستاذ عصفور المدينه .. هو بصراحه مرره لكل من يعلق عنده خلال الشهر الذي عرض فيه بوست التاج
وكنت سعيده .. دا من الأستاذ عصفور يا جماعه
نفس التاج مرره لي الأستاذ محمود مدونه


آلام وآمال


وكان كاتب اسم مدونتي .. وأيضا كنت سعيده
لأني أيضا أحترم مدونته جدا
وكمان كاتب مدونتي بالأسم
جاني تاجات تانيه .. إن شاء الله نكمل البوست القادم
المهم خلينا في هذا التاج
طولت عليكم أنا عارفه .. بس أدينا بنحكي
أمس قلت لمنى ..



أنا عندي تاج وهمرره لك .. أحسن لك تجاوبيه
قالت لي هو ليه اسمه تاج ؟
قلت لها مش عارفه
يكنش الموضوع له علاقه بالسلطانيه بتاع عم مرزوق وتاج الجزيرة
ضحكت منى

وفضلنا نضحك
والآن مع التاج

قالوا لك اختار عصر من عصور مصر علشان تعيش فيه تختار أى عصر وفى عهد أى حاكم .. واشمعنى ؟
أختار العصر اللي إحنا فيه .. لأ ما تفهمونيش غلط .. مش علشان هو عصر ما فيش منه
بس ده العصر اللي أختاره لي ربي .. وأكيد في الأمر حكمه


أول أولوية فى حياتك عيلتك ولا شغلك ولا اصحابك
عائلتي طبعا


ايه أكتر حاجة بتحبها فى رمضان ؟
جو رمضان .. وكل شئ فيه .. كل شئ
بروحانياته وطقوسه ولمتنا ساعة الفطار..كل شئحتى بحس برائحه مميزه في الجو .. لأ مش رائحه الأكل
ما تفهمونيش غلط ههههه
رائحه خاصه برمضان



اوصف أجمل فطار ممكن تفطره ؟
لو في رمضان أو في الأيام العاديه
أي فطار بس تكون الأسرة متجمعه

..
لو انت حاكم على مجموعة من الأفراد حتكون عادل ؟ طب حتتأكد أزاى انك حاكم عادل ؟؟
إن شاء الله أحكم بالعدل
وهتأكد .. لأني هستعين بالله


ايه اللى بيبوظ الحكام .. نفسهم ؟ ولا الشعب ؟ ولا الحاشية المقربة ؟؟
الحكام نفسهم بيكون عندهم الإستعداد والرغبه والطمع
وبعدين يجي دور الحاشيه والذي منه


مين أكتر اعلامى مصرى بتحترمه ؟
حمدي قنديل


قريت ديوان ........صاحب بلوج تجربه "......" عن دار ملامح و لا لسه ؟؟
لو اه ايه رايك فيه ؟
كل ما شوف السؤال ده .. معرفش إيه المقصود به بصراحه
فبحثت عن المدونه والديوان
وجدت المدونه أما الديوان أو الكتاب فكان مذكور رابط للأماكن التي يباع فيه


الو ممكن تشتغل شغلانة تانية كنت تتمنى تبقى ايه ؟؟
مرشد سياحي


ايه تانى بلد تتمنى تعيش فيها بعد مصر ؟؟
اسكندريه


اوصف ترتيبات اجمل فرح ممكن تحضره ؟
ذهابي للأفراح قليل جدا
بس أجمل فرح ممكن أحضرة .. اللي أحس فيه إن العروسين سعداء بجد


بتراعى كلام الناس والقيل والقال ؟؟ ولو اه او لا قول ليه ؟
لأ
لأن الناس بتتكلم في كل الأحوال
أنا أستعين بالله وأفكر جيدا وأتوكل عليه وليكن ما يكون


صحيت من النوم ملقتش الموبايل ولا الكمبيوتر ولا الكاميرا الديجيتال ورجعنا لعصر الحمام الزاجل والحصنة هتكون سعيد ؟
ممكن أكون سعيده جدا .. بس لو مع ناس بحبهم ويحبوني
دا حتى هيكون في وقت كبير للتأمل والتفكير


السعادة هى ..؟
الرضا التام


عندك أمل ؟ اسبابك ؟
عندي أمل فقط في الله

لما بتحب تهرب من كل شئ بتروح فين ؟؟
بروح.... هناك............

امتى اول مرة خدت فيها نفس طويل وقلت ياااه انا فعلا كبرت ؟؟
هو في بنت بتكبر برضه
ههههههههههههه
بس بجد ساعات بحس إني كبيرة حتى أكبر من سني
وساعات بحس إني طفله
إزاي معرفش


اما بتعمل عمل خير بيكون ايه هو دافعك الاول ؟
الله المستعان


بتشرب سجاير ؟؟ وايه شعورك اما ست او راجل بيشرب سجاير ؟ ليه ؟
لأ مش بشرب
وشعورى إن كل واحد حر


بتعرف ايدك اليمين من الشمال ازاى ؟
بحب اليمين


ايه اكتر الة موسيقية بتحبها ؟
الآلات الوتريه
بس مش مهتمه أوى


فى رأيك ليه الذوق والنخوة اتعدموا ؟
مانعدموش
الخير في وفي أمتى إللى يوم الدين


ايه الحاجة اللى لو حصلت لك حتبقى سعيد اوى ؟
أرضى أبويا وأمي

تحب يبقى عندك ارض زراعية ولااجنس عربيات ولاكام عمارة ولافلوس فى البنك ؟
لوالأرض الزراعيه معاها بيت بجنينه ومزرعه خيول .. يبقى تمام


البحر ولا النيل ؟
البحر .. بس يكون في ميه للشرب


مركب ولا طيارة ؟
مركب


مجنون ولا عاقل ؟
ساعات مجنونه جدا .. وساعات عاقله جدا


تقرا كتاب ولا تتفرج على فيلم ؟
حسب الوقت والحاله


تمرر التاج ده لمين ؟
لكل اللي لينكات مدوناتهم منورة في مدونتي على إيدك اليمين وإنت داخل
وكل اللي ينور المدونه بتعليقه
واللي جاوب التاج ده قبل كده .. يبقى براءه
ويستنى التاج القادم إن شاء الله
ماهو هيجاوب يعني هيجاوب


تحياتي لكم جميعا وعفوا لو كنت طولت حبتين

30 comments:

Rehab Mostafa said...

أول تعليق :)
أنا طبعاً مش هجاوب التاج لسببين الأول ان اسم مدونتي مش منور عندك :D:D:D
الثاني اني جاوبته قبل كده :)
بس عجبتني أوي اجاباتك وحبيت أكتب تعليق
وأكثر اجابات عجبتني

السعادة هى ..؟
الرضا التام


عندك أمل ؟ اسبابك ؟
عندي أمل فقط في الله


علشان طول عمري مقتنعه بان الرضا التام سبب السعاده ويمكن علشان كده مافيش حد في سعاده تامه
وان الأمل دائماً في الله

زُمُرده said...

السلام عليكم
عجبتني اجاباتك اوي
وخصوصا
ارض زراعيه وبيت ومزرعه
مركب
بحر
اسكندريه
السعادة هى ..؟الرضا التام

جميله جدا الاجابات دي

mohand said...

السلام عليكم
اجاباتك جميله قوي

بس لو عايزه تعدلي بجد

حب لاخيك ما تحب لنفسك

هتقدري تعدلي

عصفور المدينة said...

جزاك الله خيرا على الإطراء وأنا أحترم والله مدونتك جدا
وأحترم شخصك الكريم
وبمناسبة السن بقى نظرا لحكمة حضرتك نحسبك كذلك فشلت في تحديد سنك
وده تعليقا على كلمة
ساعات بحس إني كبيرة حتى أكبر من سني

الباحث عن الحقيقة said...

كل سنه وانتى طيبة
التاج ده فرصةكويسة للناس تتعرف على حضرتك اكتر
رغم ان كل اجابة فيه محتاجه نسأل ليه
كنا محتاجينك تتكلمى اكتر من كده
كل سنة وانتى طيبة وان شاء الله تحققى فى السنة الجديده 2008 كل ما تتمنيه

Dr. Diaa Elnaggar said...

كل سنة وانت طيبة يا سلوى

وعام سعيد عليك، وعلى خاصتك وعامتك، ملئه السعادة والسلام مع النفس ومع الغير، وقبل كل ذلك الصحة، ثم الصحة ، ثم الصحة.

عميق تحيتي وخالص مودتي

ضياء

زُمُرده said...

هابى نيو يير ... وحاجات حلوة وطراطير .... وجاتوه وفطير....والأهلي خطير ..... والريس لسه قدامه كتير

مدحت محمد said...

الف مبروك التاج
ياسلوى بجد انتى تستحقيه
تحبى تعيشى فين تانى برة مصر
اسكندرية
يعنى جوة مصر برضه
ايه الوفاء ده ياعم
كمان بتؤمنى انى المرأة ينفع تكون رئيس جمهورية
وجهة نظر برضه بحترمها
على العموم كل سنة وانتى طيبة وسنة جديدة سعيدة عليكى
ابتدت بتاج
تقبلى منى احترامى وتقديرى
وتحياتى

سلوى said...

Rehab Mostafa
شرفت المدونه وعام سعيد إن شاء الله
وبعدين اسمك منور في التعليقات وحالا سيضاف على إيدك اليمين وإنت داخله
فمدونتك جميله ومميزه
وبعدين في تاج جاي قريب
يعني هتجاوبي هتجاوبي التاج ماتحاوليش

أسعدتيني بتواجدك رو
وأرجوا تكرار الزياره
البيت بيتك بقى

تحيااااااااتي

سلوى said...

زُمُرده
منورة المدونه عزيزتي

والتاج تاجك طبعا
لو مكنتيش جاوبتيه
فتفضليه ..
يسعدني أن تقبليه

وبجد سعيده بتواجدك وإحنا في أول السنه
إن شاء الله عام سعيد

دمتى بكل ود
زيارات بقى .. ماشي
البيت بيتك

تحيااااااااااتي

سلوى said...

mohand
وعليكم السلام ورحمة الله وبركاته

عام سعيد مهند
ودايما كده منور المدونه بتواجدك وتعليقك

مش عارفه التاج ده جاوبته ولا لأ
إنت عارف .. لينك مدونتك على اليمين وإنت داخل
إنت فاهم بقى

وعارف فعلا لو كنت هحكم بجد
أنا ممكن أحكم وانسى نفسي
يعني وقتها هفضل الغير
بس ساعات لما تيجي تحكم
بتكون محتاج خليط من الشده والرحمه
وخليط كده غريب من الإحساس بالغير وللغير
حاجه صعبه جدا
علشان كده قلت إني هستعين بالله

مهند خالص تحياتي
وبجد يسعدني وجودك دايما أخي
تحياااااااتي

سلوى said...

عصفور المدينة
جزيت كل الخير أستاذي
وكلام حضرتك شهاده أعتز بها
وبعدين أنا لا أجامل
ما شاء الله حضرتك لك مكانه عند كل المدونين
ومحل إحترام الجميع

بارك الله في حضرتك وأسرتك
ودمتم بحفظ الله
أما عن السن
ففعلا والله
ساعات أشعر أني أكبر من عمري
وأحيانا طفله
فالعمر عندي هو ما أشعر به
وليس الرقم في شهاده الميلاد
مش عارفه إيه الجنان ده
بس برضه أنا قلت في التاج
إني ساعات مجنونه وساعات عاقله
ربنا يستر بقى
ويبعدنا عن السرايا
لأ مش الصفرا
أقصد الخضراء

*******
حضرتك نورت المدونه
وتواجد حضرتك بجد يسعدني دائما
وذلك لإحترامي لحضرتك ولقلمك
حفظك الله أخي الكريم

سلوى said...

الباحث عن الحقيقة
كل سنه وحضرتك طيب
عام سعيد إن شاء الله

بالنسبه للإجابات
أنا بس ما حبتش أطول عليكم
أكثر مما طولت
خالص أمنياتي بالتوفيق

تحياااااااتي

سلوى said...

Dr. Diaa Elnaggar
كل سنه وحضرتك بصحه وسلام وراحه بال
ودمت بحفظ الله أنت وأسرتك
ومن حولك

والله تواجد حضرتك يسعدني جدا
وبجد بتنور المدونه بتعليقاتك

وكم أسعدني تهنئتك بالعام الجديد
خالص تحياااتي أخي الكريم

سلوى said...

زُمُرده
نسيت أرد السلام في التعليق الأول
فأولا
السلام عليكم ورحمة الله وبركاته
إيه النور ده بس

عزيزتي
كل سنه وأنت طيبه وبخير وصحه وسعاده
أنت وأسرتك وكل من حولك
وتسلمي لي على الفطير والجاتوة
بس الله يخليكي خليه بالشيكولاته
محسوبتك مدمنه
ههههههههههه
بس إيه الريس لسه قدامه كتير دي
تفاءلي خير يا لولو

بجد والله أسعدتيني

خالص تحياتي عزيزتي

سلوى said...

doha
أول تعليق العام الجديد

عام سعيد إن شاء الله
وكل عام وأنت بخير وبصحه وسلام أنت وأسرتك وكل من حولك

وفعلا أنا بحب إسكندريه
يمكن علشان البحر
لأني برضه بحب البحر

وبعدين هو سؤال الحكم وإن كنت هحكم بالعدل أو لأ
المقصود به رئاسه الجمهوريه؟
بس مش مهم ولا يهمني
رئاسه رئاسه

المهم
إنت بجد نورت المدونه وتواجد يسعدني فعلا أخي

دمت بحفظ الله

تحيااااااااااتي

منى said...

كل سنه وانتى طيبه يا لولو
مبروك عليكى السلطانيه
يوه قصدى التاج
وطلعتى بتحبى اسكندريه كمان
ماشى يا ستى ان شاء الله انا رايحه هناك قريب لو تحبى تيجى معايا
ممكن افكر
عجبنى قوى يا سلوى ردك على سؤال العصر اللى تفضليه
تحياتى يا جميل

سلوى said...

منى
كل سنه وإنت طيبه يا لولو ودايما يارب سعيده وبصحه إنت وكل الأسرة وكل من حولك

وإن شاء الله سنه سعيده

ورايحه إسكندريه كمان يا ست هانم من غيري

ماشي يا ستي رحله سعيده

وما تنسيش تجاوبي التاج بالتي هي أحسن

ماشي يا لولو

أسعدتيني والله بتواجدك

دمتى بكل ود

klmat said...

السلام عليكم
كل سنه وانت واسرتك وحبايبك بخير
اجابات جميله من انسانه رائعه
وعجبنى انك اختارتى العصر ده
رغم جماله دى مشئه ربنا
ربنا يحقق كل امانيك ويسعدك
يااارب
سلاااااااام

عين فى الجنة said...

كل عام وانتى بخير

Unknown said...

كل سنه وانت طيبه
انا برضه لسه مطخوخ تاج من يومين
بس الحمد لله تمت العمليه بنجاح
هيييييييييه شده لابد منها
:)

سلوى said...

klmat
الجميل هو تواجدك دايما في مدونتي عزيزتي

بجد إنت دايما لك طله كده

ربنا يوفقك دايما
وعام سعي إن شاء الله

وما تنسيش التاج
لو مكنتيش جاوبتيه قبل كده

تحياااااتي

سلوى said...

Ragi
كل عام وأنت بخير وصحه وسلام وكل أسرتك وكل من حولك


تحياااااااتي

سلوى said...

Mask

كل سنه وإنت طيب وبخير وصحه
أنت وأسرتك وكل من حولك

ويا سيدي تاج يفوت ولا حد يموت
هات منديل بقى

بس بجد شئ حلو لأنه بيعرف المدونين على بعض

نورت المدونه يا سامح وربنا يوفقك

تحيااااتي

رحــــيـل said...

عزيزتى سلوى

اجاباتك لذيذه وتنم عن شخصيه بجد عاقله جدا ورقيقه
معلش انى اتاخرت عليكى
هروح بقى انا اتابع اللى فاتنى فى بوست الحجاب

تحياتى وتقديرى لكى

فرنسا هانم said...

كل تاج وانتى طيبه
اجاباتك جميله
لكن
انا كل ما اروح فرح الاقى العروسين فرحانين
اصل الزعل بيجى بعد كده
مش قبل الفرح

Ahmed Mubarak said...

عندي أمل فقط في الله

الرضا التام

بجد أحسنتي الإختيار..أحييك بجد..
وأنا سعيد بمروري على مدونتك

تحياتي

سلوى said...

ra7eel

عزيزتي ساره أشكرك على تعليقك وكلماتك الرقيقه
دمتى بكل ود

**************
فرنسا
عزيزتي إنت منوراني وشرفتي المدونه
بس في أحيانا عروسين بيكونوا صحيح سعداء للزواج
بس فارحه كده والسلام مش بجد
أنا أقصد الفرحه اللي بجد

دمتى بكل سعاده

***************
Ahmed Mubarak
أنا الأسعد بمرورك أخي
إنت شرفت المدونه

وأرجو أن تتكرر الزيارة إن شاء الله
خالص تحياتي

L.G. said...

سبحان الله التدوينة ديه برضه في آخر 2007 والناس ممعلقة عليها حتى في السنة الجديدة
يارب برضه بعد 4 سنين تكون سنتنا السنة ديه سعيدة
يمكن كنا لسه متصحبناش اديني بعلق بعد 4 سنين لو قلتلك تعجبت من اجاباتك مش حتصدقي لأنك فعلا مرايتي لو كنت جاوبت على الاقل 90 % من الإجابات حتكون واحدة
دمتي بكل خير واعتقد لو راجعتي اجاباتك مش حتغيريها
تحياتي

سلوى said...

رجعتيني لزمان اوى سمسمتى
بس في حاجات كتير اتغيرت

ربنا يسعدك يارب ويفرحك دايما