Tuesday, April 22, 2008

تـــــــــــاج

تاج من إخواني الأعزاء
مدحت وعمرو


اذكر 10 أشياء عن نفسك
أنا كنت فاكرة إن التاج ده خفيف
بس لما تيجي تحله تجده مش خفيف ولا حاجه
إنك تذكر 10 حاجات عن نفسك ده شئ كتير

المهم
(1)
هقولكم سر ألا وهو .. اسمي الحقيقي سلوى
(2)
بكالوريوس تجارة .. محاسبه
(3)
تحديث بسيط أحسن البعض إفتكر إننا 5 بنات إخوات
وطبعا الأمانه العلميه تقتضي أن أقول
إحنا أربع أخوات ماشاء الله.. أخان أكبر مني وأخت اصغر مني .. وأنا رقم 3
(4)
بحب الرسم جدا لدرجه إني لما بكون برسم مش بحس باللي حواليه
بس الوقت مش بقيت أرسم كتير
(5)
بحب الشعر وبحاول أكتب تخاريف كده .. اللي حضراتكم بتقرأوها وأمركم لله
(6)
هو إحنا لسه في رقم 6 ... يا معين
ممكن أقول إني بحب الكمبيوتر جدا..
(7)
بجد كده ظلم إحنا لسه في رقم 7
بحب أفك وأركب واصلح الأشياء .. وبصراحه ساعات بتتصلح وساعات
لأ بلاش سوء ظن .. لحد الوقت مفيش حاجه فرقعت .. الإنفجار
اللي حصل من شويه كان من عند الجيران
(8)
بحس إن ربنا معايا .. طبعا هو معانا كلنا .. بس في مواقف كده بتحصل تحس فعلا
إن ربنا كان معاك وبيحفظك
أحكي لكم موقف مش بنساه
كنت في الإعدادي .. وتقدروا تقولوا أن بيني وبين الكهرباء عمار ... المهم
كنت بكوى وكل البيت كان نايم .. وأنا مش بعرف أنام بعد الظهر
المهم فجأه الفيشه ولعت .. كل المسلسلات والأفلام الأجنبي وأبطالهم حضروا أدامي
ماكجيفر وسوبرمان وكل أبطال الحواديت وأتباعهم
المهم جريت أجيب طفايا الحريق ههههههههههههههه
الطفايا كانت من النوع السائل
لسه برفع الطفايا وبضغط ع المفتاح علشان أنقذ الدنيا.. وعامله فيها
Women saving

لقيت النار انطفت والفيشه إتقطعت
إيه ده ؟ ... أنا لسه لحقت أعمل حاجه
في نفس الأسبوع شاهدت
برنامج في التليفزيون بيتكلم عن الحريق وأنواع الطفايات وكيف
تستخدم والإسعافات الأوليه
يومها الضيف قال معلومه مهمه جدا ألا وهي
إنه في حاله الحريق الناتج من الكهرباء لازم نستخدم الطفايا التي تحتوى
على بودرة مش سائل ..
طب ليه يا با الحاج ؟
قال علشان اللحظه اللي هتضغط فيها على مفتاح الطفايا السائله هي نفس
اللحظه اللي هتصعق فيها .....
لا قدر الله
شفتوا كان بيني وبين خبر كان أقل من ثانيه
إييييييييه عمر الشقي ..هههه
كفايه كلام عن نفسي بقى ... إيه الرغي ده

اختار 5 ومرر لهم التاج
مش عندي الكلام ده
إنتم عارفين سياستي الديمقراطيه التعسفيه
كل اللى لينكات مدوناتهم عندي
وكل اللي يحب يجاوبه يتفضل على طول
**************
لو تحب تضيف مقطع صوت لمدونتك + اشياء أخرى
تفضل في مدونه عالم الكمبيوتر من هنــــــــا

53 comments:

khobayb said...

لا لا لا

دول 8 بس

مش 10

متأسف ..

التاج ده يتجاوب من أول وجديد

سلوى said...

خبيب

إيه ده بقى
وأنا اللي قلت محدش هياخد باله

وعايزني أجاوبه من أول وجديد كمان
دا أنا ماصدقت إنه نزل أصلا

عموما هما 10
يعني حضرتك وبكل هدوء تجاوب 10
ماشي

شكرا ع التواجد خبيب
تحياتي

رحــــيـل said...

تانى مره النهارده اقرا التاج ده
ايه الحكايه
ههههههههههه

على العموم انا شخصيا هاخده
على فكره الكاسيت بتاعى بايظ بقاله مده انا هجيبهوك
وهشتغل بليه وامرى لله لغايه مايتصلح
ههههههههههههه
تحياتى لكى

سلوى said...

ra7eel
سارسورة حبيبتي

إتفضلي التاج طبعا
إنت صاحبه مكان يا بنتي

وبعدين ماتنسيش وإنت جايبه الكاسيت
تجيب العده
أمال هتبقى بليه إزاي
وأهم حاجه
شوفي أهم الحاجه
الشاكوش .. أوعي يا ساره تنسيه
أنا بقولك أهو

دمتي بكل خير
نسيت أقولك
بوست الأخير جميييييييييييل

Anonymous said...

Salwa

مش ممكن خفة الدم دى .. هذا أولا

ثانيا .. أين يمكننى أن أرى رسوماتك؟

أشكرك على مرورك عندى

Rehab Mostafa said...

التاج ده صعب أوي فعلاً :)
كويس انك عرفتي توصلي للأخر
أنا هحاول اعمل عمليه انتحاريه واجاوبه :)


سوري اني غايبه عنك كتيير بجد :$

عصفور المدينة said...

ربنا يبارك فيك
:)

L.G. said...

جميل بس عيب تخمي وعمر الشقي بقي
وبعدين الراجل قال 5 اللينكات أكتر
لازم تحددي موقفك مش حاخده الا لما تديهوني أنا بنت مؤدبة

وبعدين الاجابة واح واتنين خمة
مبتحطيش لينا رسوماتك ليه عشان نشوفها كل موضوع حطيله رسمة من ايديك مهم جدا نعرفك أكتر
عندي فيديو بيسف أجيبه معايا لو جيت عندك
كخ ابعدي عن الكهربا
صحيح فين 9 وعشرة

لالالالا ده انتي محدش يلعب معاك كوتشينة ولا طاولة

http://kasperb4.blogspot.com/ said...

هههههههه
حلوة اوي حكاية الفيشة دي
قدر الله وما شاء فعل
كان زماننا منعرفش حاجة عن طوق الحرية ولا تأملات قلب و عالم الكمبيوتر
ولا كان زماني بحضر بوستات عشان انزلها في عالم الكمبيوتر
يااااااه
حاجات كتير مكانتش هتحصل
:D

canary said...

مش عارفه ليه حاسه ان الانفجار دة كان عندك انتى مش عند الجيران
يا بنتى مش محذراكى تلعبى فى الحاجات دى
لا بقى بجد الثلاث مدونات جمال جدا
واسلوبك فى الكتابه حلو اوى
كمان صفاتك دى كويسه ولو انك سرقتى منهم اتنين
وحكايه اللعب والتصليح دى مش عارفه ليه عندى شك فقدرتك على تصليح الحاجه بعد ما بتفكيها
تحياتى وتقبلى مرورى

سلوى said...

Sherif
الله يخليك
وأشكرك لمرورك
على فكره حصل تحديث بسيط في البوست

بالنسبه للرسومات
إن شاء الله ممكن زي ما إل جي قالت
ممكن أضيفها للبوستات بدل الصور من النت
أو إني أعرضها كبوست مستقل
المهم
أسعدني تواجدك بجد
تحياتي

سلوى said...

Rehab Mostafa

رحوبه ولا يهمك أكيد إنت مش فاضيه
وكلنا ساعات بنكون كده

المهم
آجي أشوف العمليه الإنتحاريه إمتى ؟

يالا عايزه أعرفك أكتر

نورتيني يا رحوبه

نحياااااتي

سلوى said...

عصفور المدينة

ربنا يبارك في حضرتك

ودايما تزور مدونتي على طول
وتشرفها

دمت بكل خير

سلوى said...

L.G.

5 لينكات إيه بس
أنا عايزه أعرف كل اللي لينكاتهم عندي

لأنى فعلا لهم مكانه عندي

وبعدين إنت تقولي إني بخم
طيب شفتيني بخم عديهالي
علشان أعديلك وكده
طيب يا إل جي
جنت على نفسها براكش
ههههههههههههه
التاج يتجاوب من سكات
وبعدين او كنت كتبت خمس لينكات
كنت هتكوني أول حد أكتبه يا بنتي طبعا
بخصوص الرسومات فكرتك حلوة
إن شاء الله هعمل كده أو أحطها في بوست مستقل
على فكرة في تحديث في البوست

ياريت تقرأيه

كنت هنسى
بخصوص الفيديو
أنا ما وصلتش للدرجه دي

عموما هاتيه
بس برده ماتنسيش الشاكوش
ده أهم شئ في عده التصليح
نحياااااااتي

سلوى said...

آلام وآمال
عجباك حكايه الفيشه يا محمود

فعلا كان في حاجات كتير مش هتحصله

كان زمانك مرتاحين
ههههههههههه

ربنا يوفقك يا رب يا محمود
دمت بكل خير

سلوى said...

canary

كده يا كناري
الإنفجار كان عند الجيران
أصلي كنت بصلح لهم حاجه ع السريع كده

ههههههههه

وبعدين إيه عندك شك دي بقى
هو في حاجات بتتصلح وحاجات كتير لأ

التاج لك طبعا تجاوبيه
أوك

نورتيني بجد وسعيده إني اتعرفت عليكي

Omar El-Tahan said...

متعددة المواهب ... جديدة حكاية الرسم دي ... وكمان كهربا .. خايف اقوللك انك كده فيوزاتك ضربت لحد تعملي عليا قفلة :)

بوست حلو ومعلومات جديدة وخاصة الإسم
:D

مدحت محمد said...

سلوى
بجد انا سعيد جدا انك قبلتى التاج
ربنا يكرمك يارب
بالنسبة الاجابات بقى
ايه ياعم الاجابات الجميلة دى
طبعا مبقتيش ترسمى بسبب التدوين اكيد
مفيش وقت

وبالنسبة لشعرك
لو انتتى زى مابتقولى تخاريف مكانش حد دخل واقرالك يااستاذة

بتحبى تصلحى الاشياء انتى قلتيلى شغالة محاسبة ولا ايه انا نسيت
هههههههه


طبعا الانسان ساعات ربنا بيبتليه بحاجات
عشان نعرف فضل ربنا علينا
ونقول الحمد لله
اجابات كافية شافية
جامعة مانعة
وبكرر شكرى وتقديرى لقبولك التاج
تحياتى

عبده الرايق said...

اطالب بتشكيل لجنه علميه دوليه للتحقيق من صحه هذا التاج
وهل يجوز 8 بنود
من 10 بنود
ام ان التاج باااااااطل
بااااااااااااااااااطل
والى ان تقول اللجنه كلمتها
اشكرك على معلومه طفايه الحريق

أحساس لسه حى...كلام من جوه روح لكل روح said...

عزيزتى
تقريبا كل الحاجات اللى قولتيها عن نفسك كل اللى حوليكى عرفنا

لان قولت ى عن نفسك الظاهر منها

ومفيش واحده منها عن الباطن او سر

ينفع كده

ولا السؤالين التانين عن الباطن فى نفسك والرقابه شايتها

تحياتى

سلام

الربان said...

تحياتي

فعلا تاج جميل و اجابات اجمل...ربنا يحميكي...

فعلا لكل نوع من الحريق نوع معين من وسيلة الاطفاء....و يوجد ثلاثة انواع
السائلة...و الجافة و الثالثة هي الرغوية....

تحياتي و تقديري...

رئيس جمهوريه نفسى said...

اختصرتى فى الاجابات فا اوجزتى فا انجزتى وشكرا على السر الحربى انى اسمك سلوى

جنّي said...

سلوى
كل يوم امر على تأملات قلب ولا أجد جديد .. وانت هنا بتجاوبي على التاج
المهم معظم الإجابات عارفينها .. عايزين حاجة جديدة .. أما أهم الإجابات على الإطلاق إجابة السؤال الثامن .. أن يحس الإنسان أنه في معية الله معناه منتهى الشعور بالأمان والسعادة والرضى والإيمان
تحياتي
said

الطائر الحزين said...

بارك الله فيك

هما عشر اجابات

لان هناك سؤالين كل واحد يضعها من عندة ويجاوب بردة من عنده


تحياتى

منى said...

ازيك يا لولو
على فكره انا شفت الرسومات كلها فى الخباثه
جد انتى موهوبه يا سلوى
ياريت فعلا تنزليهم
او تعملى مدونه للفن التشكيلى
ايه رايك؟
تحياتى

سلوى said...

Omar El-Tahan

من ناحيه إن الفيوزات ضربت
ضربت

ماشي يا باشمهندس

مرورك أسعدني جدااااا

تحيااااااااااتي

سلوى said...

مدحت محمد

إجابتي ع التاج شئ أسعدني يا مدحت والله
وأسعدني إنك افتكرتنا أصلا

بس واضح إنك قرأته بتمعن

شكرا يا مدحت

تحياااااااااتي

سلوى said...

عبده الرايق

ماشي يا رايق
لجنه مرة واحده

عموما اللجنه قالت كلمتها

يجوووووووووووز

تحياااااااتي

سلوى said...

احساس لكل النساء

مفيش أسرار ولا حاجه

أنا بس ماعرفتش أقول إيه تاني بصراحه

مش بحب أتكلم عن نفسي
دي كل الحكايه
يا أحساس

سعيده بجد بتواجدك

دمت بكل خير

سلوى said...

الربان

بارك الله فيك

أشكرك على تواجدك وردك الطيب
بالنسبه لطفايات الحريق
ما هو انا مكنتش اعرف

بس ربنا سلم
والحمد لله
دمت بكل خير

سلوى said...

رئيس جمهوريه نفسى

خد بالك من السر الحربي

أوعى حد يعرفه

تحيااااتي

سلوى said...

جني

يا خبر

قريب جدا هينزل بوست في التأملات

أشكرك جدا جدا

دمت بكل خير

سلوى said...

الطائر الحزين

وفيك بارك الله
وأسعدك

كما تسعدني بتواجدك

تحياااااااتي

سلوى said...

منى

عارفه طبعا إنك شفتي الرسومات يا لولو

شفتي بقى
أديكي أخدت سبق لمدونتك

هههههه

نورتيني يا منى

وفكرتك بخصوص الرسم حلوة

الفارس الملثم said...

هو التاج ده كل ما اروح حتة الاقيه ولا ايه مممممممم

لا انا مش بحب الحساب خالص وكنت متعقد منه

متاكدة انك بتعرفي تصلحي طيب نبقي نجربك الاول ولو كده انبعتلك زباين

الحمدلله ان ربنا ستر في حكاية الحريقة دي,عارفة فكرتيني بحد اعرفه جي يطفي الحريقة بالجاز ههههههههه

جميلة اجاباتك يا سلوي وربنا يوفقك كده دايما

تحياتي

almasry said...

أنا جاوبت التاج بطريقه أوضح منك سامحينى على صراحتى وأرجوا تشوفيها وتقوليلى رأيك

تحيـــــــاتى
المصـــــرى

Tamer Nabil Moussa said...

كل تاج وانتى طيبة

ربنا يكرمك

تحياتى

محمد حمدي said...

على فكره فى حاجات كتير بينا مشتركه

انا محاسب وبحب الكمبيوتر لدرجه انى ويب ديزاينر

klmat said...

سوسو الجميله
اجابتك جميله ودمها خفيف
وماشاء الله كمان بترسمى ياريت نشوف
الانتاج . اختصرتى الاسئله بذكاء
ربنايوفقك ويكرمك ياااارب

walaa said...

عارفه يا سلوى كل ما ادخل عند حد اشوفه كاتب ايه الاقيه مجاوب التاج ههههه
ربنا يكرمك اجابتك جميله وبلاش تطفى حرايق تانى صحى بابا يا شيخه
انا كمان مش بحب النوم الظهر لاننى بصحه منه الاقى نفسى عيانه
تحياتى ولاء

و القادم....أجمل said...

طيب فين الرسومات
أنا عايز أتفرج
:)
ربنا يكرمك و يوفقك
فين بقية الإجابات
:\

صالح سعيد said...

ازيك يا سلوى
انا قريت البوست عند لماضه وعندك
وبصراحه اجابتك اقوى
ودى مش مجامله منى
بس الفكره نفسها حلوه
وانتى دمك زى العسل
ربنا يزيدك ويوفقك
وبرافو عليكى انك بتحطى ايدك فى كل حاجه وتصلحيها
او بتحاولى تصلحيها
هههههههههههه
صباح الورد

تــــ(حـنة)ــــر said...

انا كمان بموت فى حاجة اسمها كمبيوتر و يمكن دا سبب تعبي كمان
بس تعرفيى أسلوبك يهبل
كمان عايزة اقولك حاجة فرحت قوى و زعلت قوى لما قولتى اللى فى المفضله عندك يا خد التاج
فرحت علشان التاج دة لحد دلوقتى متمررلى أكتر من 3 مرات ولأنى مش فى المفضله فمكنتش هدبس فيه
واكيد بقى انتى دلوقتى عرفتى انا ابقى زعلانه ليه
تحياتى ليك وربنا يوفقك

Tamer Nabil Moussa said...

فين الجديد

انتى وقفتى على التاج ولا اية

ههههه

فى انتظارك

تحياتى

سلوى said...

الفارس الملثم

تصدق وانا كمان
كل ما أروح مدونه ألاقيه

بس هو تاج حلو
شكرا لتواجدك ايها الفارس

وربنا يوفقك دوما

سلوى said...

almasry
شرفت المدونه وأرجو تكرار الزياره

بالنسبه للاجابات
انا فعلا مش بعرف أتكلم عن نفسي

تحياتي

************************

Tamer Nabil

وانت طيب
ودايما منور المدونه
تحياتي

********************
Mohamed Hamdy
يشرفني ان يكون في أشياء مشتركه
مدونتك على فكرة حلوة

أرجز تكرار الزياره

تحياتي

سلوى said...

klmat
أميرة الجميله

انت منوراني والله

ان شاء الله هعمل بوست للرسم

دمتى بكل خير

سلوى said...

walaa

والله وأنا كمان كل ما ما اروح في مكان ألاقيه

انت نورتيني

وخلاص أنا اتعلمت
هبقى أصحي بابا إن شاء الله
ههههههههههههههه

سلوى said...

و القادم....أجمل

الرسومات في القريب ان شاء الله

على فكرة
شرفت المدونه بالزياره
وأرجو تكرارها

خالص تحياتي

سلوى said...

و القادم....أجمل

الرسومات في القريب ان شاء الله

على فكرة
شرفت المدونه بالزياره
وأرجو تكرارها

خالص تحياتي

سلوى said...

صالح سعيد
انت بجد منورني

وسعيده بتشريفك

عندك شئ مستغني عنه عايز تصلحه
ههههه

تحيااااتي

سلوى said...

تــــــــــ(حـنة)ـــــــر

تمورتي تزعل منى

ينفع كده

أوعى تزعلى منى خالص

أنت بجد بتنوريني وبتسعيدني بوجودك
كفايا لما بغيب بتسألي عليا في الشات بوكس يا بنتى

دمتى بكل خير

سلوى said...

Tamer Nabil

والله يا تامر انت كنت بتكتب التعليق ده وانا كنت بجهز البوست الجديد

تحياااااااتي